WID-ŊAYAYTA 12

Cata, goora hiɗi guy ma ŋulona

1Ɗekka ŋolda tara li hay wuralawna, cat kepe fatta ka cuki ta'a, tilla cuki gaa se'a, bogoray ma mislek talam doogo yam ma'na ka tuni kulo ka'a. 2Na' ka hiɗi hayna, na' ka tiy tuwa'a hay pukka hiɗi tuw-tita vi vu'da.

3Ɗekka tara'a li hay wuralawn lo, guy ŋolla#12:3 Guy ŋolla tani hay liy hena nam muɗi ala darmadina, gana-ganna, hurumna kaw, Es 30:6; Yer 51:34. ma slaw keŋ' yalam siɗiya, miyokom doogo, jakawat ka tuni kalam siɗiya kaw. 4Giɗerem tan gal ma ɦidina vi mislek ma dukalawna, cukum gaa kay nagata. Guyna lak vok cata ta min vuɗa, kay mut goora va'a hay li ma na' vuɗumawana.

5Na' vuɗ goor ma jufu, nam ma min ŋom jaf-sumun kaf hiɗi zugul ma kawaya. Goora va'a slumis kulo kat Lawna tam zlamda-mulda valamu. 6Cata pir goyo hay fulda, na' fi liyn ma Lawna kotom ka'a, kay na' ma ti tina va' ɗawni ir buura birim kep hiɗi diram kis-ma' kalam dok-karkiya.

7Duura li hay wuralawna. Mikayel hiɗi sa sunda-wuralawna valamu dur hiɗi guyna. Guy ma ŋolla hiɗi sa sunda valamu dura, 8may donota visi kiɗa goyo, nisi may fi liyn kisi hay wuralawn loɗi. 9Guyna namna ma ŋolla ma yum ala guy ma ɓa-ɓana, ma yum ala Matna hiɗi Satan kaw, namu ma ɗut sumun gaa hay nagat kafna, zutumay gaa kay nagata, sa sunda valamu zuti ay gaa hiɗi namu kaw.

10Nan hum del ma ŋolla hay wuralawna di'e: Wulini su'da coowa, hiɗi gaŋeraŋa hiɗi mulda vaya, hiɗi ŋolda vi Kristuna valamu, kay nam ma pi lawta kay ɓosiyayna zutumiyawa gaa'a, nam ma pi lawt kaya vok Lawna vaya falayta hiɗi henjet kafe. 11Nisi kolawa kalamu hiɗi donota vi busuwna vi goor ɦu-dimina, hiɗi yoboyna vi di-goyta visiya, nisi may min irita visiɗi, ta-ta tam mitta kaw, nisi li narɗi. 12Kuɗ kayni laŋ firiya wuralawna, nigi sa hay wuralawna, ligi firiya kaw. Joot kay nagata hiɗi niy-lum ma ŋolla, kay Matna kalaysawa gaa tigiya, nam muɗi ɦiy ŋolo, kay nam wi'e liyna valam hini kiɗaya.

13Hay li ma guy ma ŋolla wi ala nam digiɗiy ay gaa kay nagata, nam jaŋ kuɗ cata ta vuɗ goor ma jufna. 14Ki kayn nala nisi vul zlimitna ma ma'na vi bakŋa ma ŋolla mi cata, kay na' ma fok kulo'o, pir goy hay fulda, hay liyna va'a, hay liy ma na' fi tina va'a ir liyn kepe, ir liyn ŋolo hiɗi gal liyn kepe, goy gine'e vok ir guyna. 15Guyna cireɗ niyn hiɗi vunamu bugol cata, kay niy-lumna ma dola' kulo'o. 16May nagata gut kuɗ cata, nagat mal vuna' goyo, na' ci niy-lumna ma guyn cireɗem goy hiɗi vunamna. 17Guyna dikam ɓulak kat cata, nam kalay goyo kay dur hiɗi segena sa hay jafna va'a, nisi sa vi kuɗ vun-ma-gatna vi Lawna, sa vi di-goyta vi Yesu kisin kaw.

18Nan col kulo'o kay ŋeslna vi niy-lum ma ŋolla.

Currently Selected:

WID-ŊAYAYTA 12: Massana

Highlight

Copy

Compare