WID-ŊAYAYTA 11

Hoyok-ziyn ma peldetna hiɗi sum sa li di-goyta sa ma'na

1Nisi vulan libetna kepe ma sli zugulda nala, nisi di tanu: Fokaŋ kulo'o, ŋaɓaŋ Tempella vi Lawna, ŋaɓaŋ giwin-ma-ɗifinna hiɗi sum sa ka girif hay liy namna kaw. 2May wur-daŋŋa ma ka goy jiy vi Tempella, naŋ ma hinim goyo, naŋ ma ŋaɓamɗi, kay nam vuli mi jaf-sumuna, hoyok-ziy ma peldetna nisi ma tayam gaa kuɗ sesiya, ir til dok-fiɗi yam ma'.

3Nan ma vul vulda ta di vun-jobta mi sa di-goyna van sa ma'na, nisi ma di vun-jobta ir buur birim kep hiɗi diram kis-ma' kalam dok-karkiya. 4Nisi kayni si gu-olive ma ma'na, hiɗi slen ma tun fitilla ma ma'na, ma ka lakay vok Bum-Sumuna vi nagata#11:4 Fi lawta kayni hay Zak 4:2-3. 5La sa min li va ma joo tisiya, kut kal goy hay vunsiya, ŋal sum sa gawt kisina, la sa min li va ma joo tisiya, nam ma fi cita-goyta hiɗi hagat na'ta. 6Donota visi ka'a kay duk vun-dukalawna, kay niyn ma siɗi, hay li ma nisi ka di vun-jobta, nisi ka hiɗi gaŋeraŋa kay muɗ niyn goy busuwu, kay gi bakmara mara'a mara'a gaa kay nagata, hay liyn kaf ma nisi mina.

7Hay li ma nisi hob vun di-goyta visiyawa, muura ma may goy hay zul ma wiŋŋa pana ma dur hiɗi nisiya, nam ma kol kisiya, nam ma cisi goyo kaw. 8Tuwna visiya ma mitina ma lak goy hay hagata vi hoyok-ziyna ma ŋolla, hoyok-ziyna ma yum hiɗi hagata vi Ŋusta ala Sodoma hiɗi Egipte, mi liyn ma Bum-Sumuna visiya ay ɓalay kat gu-ma-grakŋa hayamu. 9Sara'a jar sumuna hiɗi jaf-sumuna, vuɗna vi sumuna, jaf-sumuna kuɗ vunna kaf, ma ɗuw tuwna visi ma mitina ir buur ɦidi hiɗi gali, nisi ma vul hagata kay pisi gaa hay zulda noŋɗi. 10Sum sa gaa kay nagatna ma li firiya, haysi ma sleɗ ŋolo kaw kuɗ kayni. Nisi ma jok slen jar-tuwsiya tuwsiya, kay mige sum nisi sa jobta sa ma'n lakŋi las sum sa gaa kay nagatna ŋolo.

11Bugol buur ma ɦidi hiɗi galla, sukŋa vi irita vi Lawna kal haysiya, nisi yaw kulo kay sesiya, narta ŋolo cuk kay nisi sa ka ɗuwsina. 12Goy hay wuralawn pa nisi hum della ma ka di tisi dono ŋolo ala: Jikgi ay kulo tani! Hay ɗugulla pa nisi jik kulo hay wuralawna, sa gaw kisina wisi hiɗi irsiya. 13Hay leer namna wiira vi nagata li ŋolo, gal-ma-doogona vi hoyok-ziyna ɦo gaa'a, sumun birim siɗiya miti hay wiira-nagata namna. Sum sa hinina muɗi nar ŋolo, nisi subur Lawn ma wuralawna.

14Joota ta mul ma'ta kalawa. Wulini joota ta sem ɦidita ka co goboyo.

Togolomna ma siɗiyana

15Sunda-wuralawna ma siɗiyana buw togolomna. Del ma dono'o ka di goy wuralawn pa ala: Mulda vi nagata vuli mi Bum-Sumuna vaya hiɗi Kristuna valamu. Nisi ma ti mulda ta-ta hay vatɗita vatɗita.

16Sa maariyana sa dok-ma' yam fiɗina sa ka lakay vok ir Lawna kay zlamda-mulda visiya dab voksi gaa'a, subur Lawna. 17Di'e: Numa gaŋ deɓe, naŋ Bum-Sumuna Lawna, ma Gaŋeraŋ-Petna, ma ka'a, ma aya kaw, kay naŋ yaw gaŋeraŋa vaŋ ma ŋollawa, naŋ tun mulda vaŋawa kaw. 18Jaf-sumuna muɗi ɦiya, ɦiyda vaŋu coowa, hiɗi liyn ma ka kitat kay sa mitina, kay wurak sa sunda vaŋu sa jobta-Lawna sa peldetna, sa li nar kay semda vaŋu, sa gurayna hiɗi sa ŋulona, hay li ma naŋ ci sum sa min ɓulak nagatna goyo.

19Tempella vi Lawna hay wuralawna mal goyo, arkena vi bonota valamu vul tuwam goyo hay Tempella valamu, wileta li'e, della di'e, lawn tiya, nagat wira, mogoyn yak ŋolo kaw.

Currently Selected:

WID-ŊAYAYTA 11: Massana

Highlight

Copy

Compare