WID-ŊAYAYTA 1

1Wid-ŋayayta vi Yesu Kristu, ta Lawna vulumu kay ɗek tam sa sunda valamu kay slen ma hini vok neeɗa min li'e, slen ma nam gi sa ma sunda valam tam Yohana kay ɗekem kiramu, 2kay Yohana wi slen hiɗi iramu, nam kus yoboyna vi Lawna, li di-goyta vi Yesu Kristu kaw kay slen ma nam wum kafna.

3Sle'ta ka kay nisi sa jaŋ ɗerwelda kayni, hiɗi nisi sa hum yoboyna vi vun-jobta, hiɗi nisi sa ŋom sle ma ɗoy haya'na kaw! Kay liyna coowa goboyo.

Gi-deɓta hiɗi suburta

4Yohana ɗo tam ziyna-Lawna siɗiya ma ka hay Asiya. Hin nam ma aya, ma ka'a, ma min ma'a kaw vulgi slugota hiɗi sle'ta tage, hiɗi ŋusiyan sa siɗiyana sa ka vok ir zlamda-mulda valamu kaw, 5hiɗi Yesu Kristu ma di-goyna ma gasina, ma vuɗi jewna jar sa mitina, mulla vi muliyana gaa kay nagata kaw. Tam namu ma minayawa, ma butayawa goy kay sulukŋa vaya hiɗi busuwna valamu,

6namu ma muɗayawa goy muliya'a, muɗayawa goy muliyan-sa-ɗifinna vi Lawna bulumu, talam namu gajijita hiɗi gaŋeraŋa hay vatɗita vatɗita, Amen.

7Humgiya, nam ma co hay ɗugulla, ir sumun kaf ma wumu, nisi sa jikimna kaw; jaf-sumun hay nagat kaf ma yor tuwsi kalamu.#1:7 Fi kayni hay Zak 12:10. Awa, amen! 8Nanu mi Alfa hiɗi Omega, din mi Bum-Sumuna Lawna, nam ma ka'a, ma aya, ma min ma'a kaw, ma Gaŋeraŋ-Petna.

Slen ma vul tuwam kir Yohana hay jokota vi Patmos

9Nanu Yohana, ɓasukina ma tapay hay lasta-cita, hay mulda vi so-tuwta hay Yesu, nan ay musi kay jokota Patmos, kuɗ yoboyna vi Lawna hiɗi di-goyta kay Yesu. 10Ŋusta kal hayanu hay buura vi Bum-Sumuna, goy bugolan pa nan hum della, dono'o ki buwna vi togolomna nala, 11nam di'e: Slen ma naŋ wumna, ɗoŋgi gaa hay ɗerwella, naŋ ma gum tam ziyna-Lawna ma siɗiyana: Tam Efesus, tam Smirna, tam Pergamum, tam Tiyatira, tam Sardis, tam Filadelfiya, tam Lawdikiya.

12Nan muɗ iranu kay hum del sa ma ka law hiɗi nanu, hay li ma nan muɗ iran kayni, nan wi slen ma tun fitil kamna ma ora siɗiya. 13Jar slen ma tun fitilla, sa kep ka coli zaw, nam sli goora vi san nala, nam cuki hiɗi sligar-tuw ma fiyokŋa, kanti ma ora juni hoyokamu may. 14Yalamu hiɗi ɗuŋusamu ay haɓi ki ɗuŋus haɓna vi fok-dimina nala, ki mogayna nala, iramu ay ki sin-kuta nala, 15Selemu ay ki wayna ma wile'e ma yoray hay kuta nala, delemu ki niyn-ŋolla ma ka suwa'a nala. 16Mislekŋa siɗiya ka hay ɓalam ta jufta, kew-gaferaŋa ma siyam ma' pet hiliw-hiliw' ka hay vunamu, vokom wile'e ki fatta wile ŋolo hay li ma na' ka ti'e nala.

17Hay li ma nan wumu, nan gi tuwan gaa vok gayamu ki nan ay miti nala. Nam tun ɓalam ta jufta kanu, ka dan ala: Laŋ narɗi. 18Nanu, nan mi ma jewna hiɗi ma cawna, nan ay mitiya, wulini nan ka iriya kay vatɗita vatɗita. Klena vi mitta hiɗi liyna vi mitta ka hay ɓanu. 19Kay na'ta ɗoŋ sle ma naŋ wumna, sle ma ka wulini hiɗi sle ma min li voko kaw. 20Kuɗ ŋayayta vi mislek ma siɗiyana ma naŋ wum hay ɓan ta jufta, hiɗi sle ma tun fitilla ma ora ma siɗiyana: Mislek ma siɗiyana kayni si sa sunda-wuralawna vi ziyna-Lawna ma siɗiyana, sle ma tun fitilla ma siɗiyana kayni mi ziyna-Lawna ma siɗiyana.

Currently Selected:

WID-ŊAYAYTA 1: Massana

Highlight

Copy

Compare