LAW MA NIR-NIRAMNA 23
23
1Hay li ma naŋ musawa ti fun hiɗi sa ma ŋolo,
naŋ ma li ŋali hiɗi sle ma ka vokaŋu;
2naŋ ma gi kew delaŋu,
la naŋ mi sa haram ŋolo.
3Naŋ ma niŋa ti ma jibetna valamɗi,
kay kayni mi tin ma ɗutta.
4Vul lasta mi tuwaŋu kay muɗ farayɗi,
tun vida vaŋu kay kaynɗi.
5Naŋ min cuk iraŋ kuɗ va ma vat goyna su?
Kay farayna zlimitna valam ka'a,
ki lay-ɓukana nala nam fok kulo'o dukalawna.
6Naŋ ma ti funa vi sa ma iram ɗuw joonɗi,
naŋ ma niŋa tin ma jibetna valamɗi;
7kay varta vi dikamu ŋray ca ki nam nala,
nam as daŋ ala taŋu caŋu;
may dikam may hiɗi naŋ noŋ ne'ɗi.
8Naŋ ma vin zutoŋ ma naŋ ligimna goyo,
law ma jibet ma naŋ dumna ma bays goy ɦawa'a.
9Naŋ ma di yoboyn hay hum sa ma ɦay-ɦaynɗi,
kay nam ɗuw dita ta yalla vaŋ birek-ceke.
10Naŋ ma jok jaara ma ɓa-ɓana vi sinen goyɗi,
naŋ ma kal kulo hay sinena vi sa kuyunɗi;
11kay ma gutda visiya nam dono'o,
nam kay tuwamu ma hulotsi goy hay ɓaŋu.
12Mal dikaŋ goyo tam hatta,
mal humaŋ goyo tam yoboyna vi wida.
13Tel gatta goy kay goorgoorɗi,
la naŋ watam hiɗi libetna,
nam as mit deɗi.
14Hay li ma naŋ ka watam hiɗi libetna,
naŋ ka hulot ciwta valam goy vun liyna vi mitta.
15Goora vanu, la dikaŋ ka yali,
dikan nan kaw ma li firiya.
16Hayanu ma hob hiɗi firita,
hay li ma vunaŋ di yoboy ma gasina.
17Hin dikaŋ var kay sa sulukŋ noŋɗi,
narta vi Ma-Vatɗina ma li hayaŋu buurta kafe.
18Nala naŋ ma tuɗ vok ɗaw,
cubta-sle'ta vaŋu ma vat goyɗi.
19Naŋu, goora vanu, humaŋu, muɗaŋ yali kaw,
hin dikaŋ tam hagata vi ɗigerta.
20Tap tuwaŋ hiɗi sa ci vinɗi,
tap tuwaŋ hiɗi sa ti haramnaɗi kaw.
21Kay sa ma ɦoyay kuɗ vinna,
hiɗi sa ma ti fun ŋolla muɗ hawi,
sa ma kal sen puslurina ma cukum talam mi sligar jireɓaya.
22Humaŋ vun buŋ ma vuɗaŋŋa,
naŋ ma ɗuw suŋ birek-cekɗi,
hay li ma na' muɗawa mari.
23Gusaŋ gasita, may naŋ ma gusa' goyɗi,
gusaŋ yalla, gatta hiɗi yamda-wida kaw.
24Goor ma ɗigera bulum ka hay firita,
sa ma vuɗ goor ma yalla hayam ma sleɗa.
25Hin dik buŋu hiɗi suŋu li firiya,
na' ta vuɗaŋga hina' dika' hob hiɗi firit ŋolda.
26Goora vanu, vulan dikaŋu,
tun iraŋ hay hagata vanu.
27Kay cata gawlaŋga ŋray ca hiɗi zul-ma-wiŋŋa,
cata pulta ŋray ca hiɗi kaar ma hebayna.
28Na' gan gini'na ki sa ma coŋcoloŋŋa nala,
sum sa ɦay-ɦayna na' biyasi hay nagat ŋolo.
29Sum sa siwel yayyo!
Kayn si sum sarige?
Sum sa siwel haha!
Kayn si sum sarige?
Ci wayt kayn vi sum sarige?
Pi lawt kayn si sum sarige?
Ka tuw sumun goy mili bay lawta kayni si sum sarige?
Sum sa irsi slaw keŋ' kayni si sum sarige?
30Kayni si sum sa ba liyna visi tam vinna,
kayni si nisi sa ci vin ma rigasayna.
31Vinna slaw keŋ' nam jifiy ŋolo,
nam wile pirik' pirik' hay tasata,
nam lig gaa goslaŋ golɓot ŋolo.
32May naŋ ma ɗuwumɗi,
hay dabta nam calaŋ ki guyn nala,
nam calaŋ ki guy-makayn nala.
33Nala nam ma muɗaŋ iraŋ kuɗ boy sa pulla,
dikaŋ ma tun caw di sle ma gunina,
34naŋ ma muɗ ki sa ma buri goy way niy-lumna waŋ nala,
ki sa ma buri sene hay caw lumna nala:
35Nisi tonu, may tuwan may tanɗi,
nisi watanu, may nan wi kayni tan ɓislek noŋɗi.
Nan ma zliy kulo lancitige?
Nan min dolay mara lo.
BIBALDA TA PELDETTA © L'Alliance Biblique du Cameroun, 2001