LAW MA NIR-NIRAMNA 22
22
YOBOYNA VI SUM SA YALLA
1Sem ma tiyna suw faray ma ŋol dak-dakŋa,
slugota ŋaata va' suw doorota hiɗi ora.
2Sa ma farayna hiɗi ma hawna fi tuwsiya,
kotsi kaf kayn mi Ma-Vatɗina.
3Sa ma yalla iram wi joota,
nam ŋay tuwam goyo.
May sa bay yalla jik ka'a, nisi fi kitata.
4Vuɗna vi hot-yamda, vuɗna vi narta kuɗ Ma-Vatɗina,
mi farayna, gajijita hiɗi irita.
5Zigiyna hiɗi jawta ka hay hagata vi sa ma gunina;
may sa ma ŋom ciwta valamu co goboy hiɗi namɗi.
6Hat goora hay hagata ta nam ma sli kuɗa'ta,
kay hay li ma nam muɗawa ŋolo, nam ma cal goyɗi.
7Sa ma farayna ti mul kay sa ma hawna,
sa ma ni balla mi gorvona vi sa ma nam mi bal kalamna.
8Sa ma was ɗutta feɗ bay-ɗigerta,
mulda valamu mus ta-taɗi.
9Sa ma ɗuw sa hena hiɗi ŋaata ma fi bolda,
kay nam ɓuraw tina valamu hiɗi sa ma hawna.
10Digiɗaŋ sa ma burahta goyo,
nala cirepta ma vat goyo;
ci-wayta hiɗi ŋulda ma vata.
11Sa ma min peldetta vi dikga,
ma slugota ka hay vunamu,
mulla mi banamna.
12Ma-Vatɗina ŋom wida,
may sum sa ɦay-ɦayna nam muɗ dita visi goy waa'a
13Sa ma zulomda di'e:
Zlon ka goy jiya,
la nan kal goy hay hagata,
nam ma can goyo.
14Vun boy sa pulla kayni mi zul ma wiŋŋa,
sa ma dik Ma-Vatɗina ɓulak talamna ma nig gaa hay zul namna.
15ɦoyta ka juni hay dik goorgoora,
tilekŋa vi gatta ma digiɗa' goy gine'e hiɗi namu.
16Curoɗ sa ma hawna muɗum faray suwa,
vul mi sa ma farayna muɗum hawi.
17Tunaŋ humaŋu kay hum dita vi sa ma yalla;
hin dikaŋ tam yalla vanu.
18Ŋaa'a kay naŋ ma ŋoma' hay dikaŋu,
na' ma li tuni hay vunaŋ dok-doko.
19Kay naŋ ma tun vida vaŋ kay Ma-Vatɗina,
nan min hataŋ vaydi, awa naŋu.
20Nan ɗo gatta hiɗi vartawa ŋolo kaŋu hay ɓa-ɓa.
21Kayni ɗekaŋ sle ma hay liyamna,
kay yoboyn ma gasina,
a naŋ ma hot yoboyn ma gasina tam sa ma gaŋayna.
22Naŋ ma yaw slena vi sa ma hawnɗi kay nam hawi,
curoɗ sa ma hawna vun kitatɗi.
23Kay Ma-Vatɗina gut kuɗ sa hawna,
sum sa curoɗsina nam yaw irita visi goyo.
24Naŋ ma li bono hiɗi sa ma ɦiynɗi,
naŋ ma poy hiɗi sa ma waskaynɗi,
25kay la naɗi naŋ ma hat hiɗi hagata valamu,
nam ɗawni ma gan jawt vok ciwta vaŋu.
26Tap tuwaŋ hiɗi sum sa yi slen kisinɗi,
tap hiɗi nisi sa col tuwsi hay baŋal sum sa yaw ballaɗi kaw;
27la va ma naŋ wurakam mayɗi,
naŋ min ala nisi ma sli va ma buura vaŋu kay mige?
28Sinena ma sumiyaŋ-ŋolo poŋom iramisna ma jokom jaram goyɗi.
29La naŋ wi sa ma iram yali hay lopna valamu,
nam col kayni vok muliyana;
nam may col vok sum sa jufunnaɗi.
BIBALDA TA PELDETTA © L'Alliance Biblique du Cameroun, 2001