LAW MA NIR-NIRAMNA 19
19
1Sa ma hawna ma poy hiɗi ɗigerta vi dikga,
nam ŋaa suw sa ma law guniya ma ɦay-ɦayna.
2Bay-wida na' may ŋaa kay sa kep noŋɗi,
sa ma sukam kelemna nig gaa hay sulukŋa.
3ɦay-ɦayta vi sana slugut hagata valamu,
may dikam ɓulak kayni kat Ma-Vatɗina.
4Sa ma farayna boniyomna ka ŋolo,
may sa ma hawna boniyomna ɓuraw goy hiɗi namu.
5Sa ma li di-goyta ta sinda lop bay fi kitatɗi,
sa ma ka sinda as hulot goyɗi kaw.
6Sumun ŋolo subur sa ma ŋolla,
gigekaw gar as li bono hiɗi sa ma vul slena.
7Sa ma hawna ɓosiyomna kaf kaam gawi,
may boniyomna mer goy talamu sem gaage,
la nam gar a tap hiɗi nisi kaw?
8Sa ma fi yaldawa min ciwta valamu;
sa ma ŋom yamda-wida fi ŋaata.
9Sa ma li di-goyta ta sinda lop bay fi kitatɗi,
sa ma ka sinda ma ba goyo kaw.
10Lop ŋolo kay sa ma ɦay-ɦayna,
a mus mulu jar farayna,
nala kaw lop ŋolo kay sa ma gorvona a ti mul kay sa vuɗina.
11Sa ma ka hiɗi yalda as muɗ ɦiy gosoyɗi,
gajijita valam kayni mi yalam ma jok law ma joona.
12ɦiyda vi mulla ŋray ca ki zlon ma ci gum nala,
may slugota valamu ki maɗay ma hum usna nala.
13Goor ma ɦay-ɦayna mi bakmarana kay bulumu,
cata ta cirepta na' ŋray ca hiɗi ziy ta sutta.
14Ziyna hiɗi farayna san as fum voco kuɗ bulumu,
may cata ta yalda na' ti vulda vi Ma-Vatɗina.
15zulomda gi san gaa hay senda ŋolo,
sa ma liŋiriyna mayt ma cumu.
16Sa ma ŋom vun-ma-gatna ŋom ciwta valamu,
may sa ma jiɓer kay kaynɗi ma fi mitta.
17Sa ma wi haw sa ma maŋayna ni bal mi Lawna,
nala Lawn ma hotom ŋaa na'ta.
18Gat goora vaŋu,
kay cubta-sle'ta ka tuwa,
may naŋ ma gar kay cum goy matɗi.
19Sa ma ɦiyna nagay kay ziy tuw-tita;
kay la naŋ butum goyo,
naŋ ɗawn ma hot kalam lo.
20Humaŋ gatta, vaŋ hatta,
kay naŋ ma li yali hay buur ma vokŋa.
21San ka hiɗi varta hay dikamu kay li slen ŋolo,
may hob kulo kayni ti minda Ma-Vatɗina tuta.
22Tiy sem san kayni ti ŋaata valamu;
sa ma hawna nam ŋaa suw sa ma sinna,
23narta kuɗ Ma-Vatɗina nar san tam irita,
san as kal sen hobaya bay joot fumu.
24Sa ma poyna kal ɓalam gaa hay ŋalayta,
may as a nara' kulo vunamɗi.
25Wataŋ sa ma burahta,
nala sa ma loyna nam ma muɗ yali;
daŋ sa ma yalam wina kiramu,
nala nam ma hum caw wida.
26Nam ma ɓulak slena vi bulumu hiɗi digiɗ sulum goyo,
kayni mi goor ma mar zulota,
mar ɦiyda kaw.
27Goora vanu, may ŋaa kay hum hattaɗi,
la hatta na'ta jaŋ jaraŋ goy hiɗi yoboyn ma yalla.
28Sa ma li di-goyta ta gunita nam cen kayn kuɗ ɗigerta,
sum sa joona vunsi lig jiw-zlata.
29Kitata ka goboy hiɗi sa ma burahta,
libetna ka buri ŋor sum sa ɦay-ɦayna waŋ'.
BIBALDA TA PELDETTA © L'Alliance Biblique du Cameroun, 2001