LAW MA NIR-NIRAMNA 18
18
1Sa ma min mus goy valam kepna gara' ti darta vi dikam tuta,
nam muɗ ɦiy kat gasita kafe.
2Sa ma ɦay-ɦayna dikam may tum kay yamda-widaɗi,
nam garam kayni mi va ma dikam dum kalamna tuta.
3Hay li ma sa ma joon co'o,
panta co kaw, hay li ma ŋulda co'o,
zulota co kaw.
4Yoboy ma may goy hay vun sana ŋray ca hiɗi niy ma zulla;
liyn ma yalda may goy hay pana jaŋ goy ki niyna nala.
5May ŋaa'a kay tap varta hiɗi sa ma joonɗi,
kay nam ɓulak hagata ŋaa'a vok sa ma ɗigera.
6Sa ma joona vunam tap hiɗi ci-wayta,
vunam yi libetna kalamu.
7Yoboyna vi sa ma bay-yalla mar ba-goyta kalamu,
vunamu gan jawta vok ciwta valamu.
8Yoboyna vi sa ma sinda ki tin ma jibetna nala,
nam kal ta-ta gaa hay ruwat sana.
9Sa ma cuk ɓalam gaa kuɗum hulos' hay lopna valamu,
nam mi ɓasum sa ma ɓulak slena.
10Semda vi Lawna ŋray ca hiɗi simdir ma donona;
sa ma ɗigera jaŋ kay ŋay haya,
va as fumɗi.
11Sa ma farayna,
farayna valam mi hoyok-ziy ma donona,
niŋata valam ala:
Kayn mi gulmun ma giy talamna.
12Jew a san ɓulak kayni,
dikam sli yam tuwam kulo'o,
sa ma hot yalam gaana fi suburta.
13Sa ma hot dita jew bay nam huma,
kayni ŋray ca hiɗi to'ofta hiɗi tiwinta.
14Varta vi sana gutum vun moyna,
may sa ma sutiyam toyna,
musum kulo ɗawn mi gige?
15Dikga ta yalda fi wida,
humda vi sa yalla gar wida kaw.
16Vulda-ɦawata vi sana mal hagat vokomu,
vulum liyna kay nam co tam sa ŋulona.
17Sa ma di lawta valam jewna lawta valam hay liya'a,
la sa ma lawt ka jarsin coowa,
nay as fek lawta.
18Ŋaɓta kuɗ ɦayta vat cirepta,
ɓuraw jar sum sa dono sa ma'na.
19Ɓasumna ma san nefemna muɗ hirliŋi
ki hoyok-ziy ma gulmun talamna nala,
cirepta ɗeŋ ŋray ca ki vun-ziyna vi mulda nala.
20hiɗi vuɗna vi vunamu san hob hayamu,
hiɗi vuɗna vi dita valamu nam hoba.
21Mitta hiɗi irita ka hay gaŋeraŋa vi vunna,
sa ma min kayni ma ti vuɗna va'a.
22Sa ma fi cata nam fa' kayn ti ŋaata-ŋolda,
nam fa' kayn ti slugota vi Ma-Vatɗina.
23Sa ma hawna law hiɗi giɗel-delta,
may sa ma mayanda law hiɗi delem ɗeŋe.
24Sa ma boniyomna ka dak-dakŋa nisi as maram joo kalamu,
may banaŋ ma juni hiɗi naŋŋa suw ɓasuŋŋa.
BIBALDA TA PELDETTA © L'Alliance Biblique du Cameroun, 2001