ŊAƁTA 7
7
Vulda ta sa ŋulona vi jafna mara'aya kay mal vun tabernaklena
1Van li nala, hay li ma ɓam Musus vat hiɗi lop ma vi tabernaklen kulon vatna, nam ɦok mul kalamu, lum goy peldete hiɗi jak ma hayam kafna, giwin-ma-ɗifinna nam lum nala kaw, hiɗi jak ma talam petna, nam ɦok mul kalamu, lum goy peldete. 2Bugol kayni, sa ŋulona vi Israyel, sa ŋulona hay jafna vi sumaysiya mar vulda visiya, nisi kayni si sa ŋulona kuɗ jafn kaf, si sa li ŋaɓta vi sumun goyna. 3Nisi mar vulda visi vok ir Ma-Vatɗina, saretn ma yalam kuluɓin karkiya, luwayn doogo yam ma'; kayn di ala saretn kep kay muliyan ma', put kep kay mul kepe may; nisi tuɗum goy vok tabernaklena.
4Ma-Vatɗina di tam Musus ala: 5Sle namna naŋ ma yawam hay ɓisiya, kay li lop ma hay guɗuk ma fi-tuwn hiɗi namu; naŋ ma vulum mi sa Levitna, gigekaw ma fi ɗawn kuɗ lopna valamu valamu. 6Musus yaw saretna hiɗi luwayna, nam vulum mi sa Levitna 7Nam vul saret ma' hiɗi luway-jufayn fiɗi' mi gurona vi Gerson, kuɗ lopna visiya; 8nam vul saret fiɗi hiɗi luway-jufayn glafandi mi gurona vi Merari, kuɗ lopna visiya, gaa kuɗ gaŋeraŋa vi Itamar, goora vi mul-ma-ɗifinna Aaron. 9May nam min vul mi gurona vi Kehat noŋɗi, kay mige, kuɗ lopna visi kayni, nisi ziy sle ma peldetn kulo kisiya.
10Sa ŋulona kuɗ jafna mar vulda visiya kay mal vun giwin-ma-ɗifinna, nisi mar vulda visi kayni hay buur ma ɦok mul kay giwin-ma-ɗifinna. 11Ma-Vatɗina di tam Musus ala: Hay li ma sa ŋulon mar vulda visi ɗawni, nisi ma tun tuni kay tuwsiya, gigekaw hay buur tara'a tara'a.
12Sa ma mar vulda valamu hay buurta jewta mi Nahson, goora vi Aminadab, ma hay jafna vi Yudana. 13Nam mar pla ma doorona nekka valam ir sikel kis-hiɗi diram dok-ɦidi. Tasata doorota kaw nekka va' ir sikel dok-siɗiya, ŋray hiɗi sikel ma ka li lop hay liyn ma peldetna. Ma' pete hobay hiɗi futuw ma digeɗna ma hiliɓi hay mula, kay ɗifinna; 14tasa ta ora ir sikel doogo, hobay hiɗi urdi ma hisna; 15put-guju ma joriyo kepe, ɦu-gamala kepe, goor ɦu-dimi ma busata valam kepn kepe, kay ɗifin ma ŋal-goyna, 16ɦu-ŋek kepe, kay li ɗifin ma poora, 17kay ɗifinna vi lop ma slugon kayni, luway-gujun ma', fok-gamala vasl, fok-ŋek vasl, guro fok-dimi ma busata valam kepn vasl. Kayni ti vul na'ta vi Nahson goora vi Aminadab.
18Hay buurta ma'ta, Netaneel, goora vi Suwar, ma ŋolla hay jafna vi Isakar, nam mar vulda valamu. 19Nam mar plana ma nekka valamu ir sikel kis kalam dok-ɦidi, tasata doorota nekka va'a ir sikel dok-siɗiya, ŋray hiɗi sikel ma ka li lop hay liyn ma peldetna, ma' kaf hobay hiɗi futuw ma digeɗna ma hiliɓi hiɗi mula, kay li ɗifinna. 20Tasata ta ora ta nekka va' ir sikel doogo hobay hiɗi urdina; 21put ma joriyo kepe, ɦu-gamala kepe, goor ɦu-dimi ma busata valam kepn kepe, kay ɗifin ma ŋal-goyna. 22ɦu-ŋek kepe, kay li ɗifin ma poora; 23lo, luway-guju ma', fok-gamala vasl fok-ŋekŋ vasl, guro fok-dimi ma busata valam kepn vasl. Kayni ti vulda vi Netaneel, goora vi Suwar.
24Hay buurta ɦidita mi ma ŋolla vi gurona vi Zabulon Eliyab goora vi Helon, 25nam mar plana ma doorona, nekka valamu ir sikel kis kalam dok-ɦidi, tasa ma doorona ma ir sikel dok-siɗiya, ŋray hiɗi sikel ma ka li lop hay liyn ma peldetna, ma' kaf hobay hiɗi futuw ma digeɗna, ma hiliɓi hiɗi mula, kay li ɗifinna. 26Tasat ta ora ir sikel doogo, hobay hiɗi urdina; 27put ma joriyo kepe, ɦu-gamala kepe, goor ɦu-dimi ma busata valam kepn kepe, kay ɗifin ma ŋal-goyna; 28vul ɦu-ŋek kepe kay ŋatam kay por sulukŋa; 29kay ɗifinna vi lop ma slugon kayni, luway-gujun ma' fok-gamala vasl, fok-ŋek vasl, guro fok-dimi ma busata valam kepn vasl, kayni ti vulda vi Eliyab goora vi Helon.
30Hay buurta fiɗita mi Elisur goora vi Sedewur, ma ŋolla hay jafna vi Ruben. 31Nam mar plana ma doorona ma nekka valamu ir sikel kis kalam dok-ɦidi. Kaway ma doorona ma nekka valam ir sikel dok-siɗiya, ŋray hiɗi sikel ma li lop hay liyn ma peldetna, ma' kaf hobay hiɗi futuw ma digeɗna, ma hiliɓi hiɗi mula, kay li ɗifinna; 32tasata ora ir sikel doogo, hobay hiɗi urdina. 33put ma joriyo kepe, ɦu-gamala kepe, goor ɦu-dimi ma busata valam kep kepe, kay ɗifin ma ŋal-goyna; 34ɦu-ŋek kepe ŋatam kay ɗifin ma poora; 35kay ɗifinna vi lop ma slugon kayni, luway-guju ma', fok-gamala vasl, fok-ŋek vasl, guro fok-dimi ma busata valam kep kepn vasl. Kayni ti vulda vi Elisur, goora vi Sedewur.
36Hay buurta vaslta, mi Selumiyel, goora vi Suriskaday ma ŋolla hay jafna vi Simeyon. 37Nam mar plana ma doorona ma nekka valamu ir sikel kis kalam dok-ɦidi, tasat doorota ta ir sikel dok-siɗiya, ŋray hiɗi sikel ma hay liyn ma peldetna. Ma' pet hobay hiɗi futuw ma digeɗna ma hiliɓi hiɗi mula, kay li ɗifinna; 38tasat ta ora ta ir sikel doogo, hobay hiɗi urdina. 39put ma joriya kepe, ɦu-gamala kepe, goor ɦu-dimi ma busata valam kepn kepe, kay ɗifin ma ŋal goyna; 40ɦu-ŋek kepe kay ɗifin ma poora; 41kay ɗifinna vi lop ma slugon kayni, luway-jufayn ma', fok-gamala vasl, fok-ŋek vasl, guro fok-dimi ma busata valam kepn vasl. Kayni mi vulda vi Selumiyel goora vi Suriskaday.
42Hay buurta karkiyat kayni, mi Eliyasaf goora vi Rewel, ma ŋolla hay jafna vi Gad, 43nam mar plana ma doorona ma nekka valamu ir sikel kis kalam dok-ɦidi, tasa ma doorona ma ir sikel dok-siɗiya, ŋray hiɗi sikel ma hay liyn ma peldetna, ma' pet hobay hiɗi futuw ma digeɗna ma hiliɓi hiɗi mula, kay li ɗifinna; 44tasat ta ora ir sikel doogo, hobay hiɗi urdina; 45put ma joriyo kepe, ɦu-gamala kepe, goor ɦu-dimi ma busata valam kepn kepe, kay ɗifin ma ŋal-goyna; 46ɦu-ŋek kepe, kay ɗifin ma poora; 47kay ɗifinna vi lop ma slugon kayni, luway-guju ma', fok-gamala vasl, fok-ŋek vasl, guro fok-dimi ma busata valam kepn vasl. Kayn mi ɗifinna vi Eliyasaf goora vi Rewel.
48Hay buurta siɗiyata, mi Elisama goora vi Amihud, 49ma ŋolla hay jafna vi Efrayim nam mar plana ma doorona ma nekka valam ir sikel kis kalam dok-ɦidi, tasata ta doorota ta ir sikel dok-siɗiya, ŋray hiɗi sikel ma hay liyn ma peldetna, ma' kaf hobay hiɗi futuw ma digeɗna ma hiliɓi hiɗi mula, kay li ɗifinna. 50Tasat ta ora ir sikel doogo, hobay hiɗi urdina; 51put ma joriyo kepe, ɦu-gamala kepe, goor ɦu-dimi ma busata valam kepn kepe, kay ɗifin ma ŋal goyna; 52ɦu-ŋek kepe kay ɗifin ma poora; 53kay ɗifinna vi lop ma slugon kayni, luway ma' fok-gamala vasl, fok-ŋek vasl, guro fok-dimi ma busata valam kepn vasl. Kayni mi ɗifinna vi Elisama goora vi Amihud.
54Hay buurta glafandita, mi Gamliyel goora vi Pedatsur, ma ŋolla hay jafna vi Manase. 55Nam mar plana ma doorona ma nekka valam ir sikel kis kalam dok-ɦidi, tasa ma doorona ma ir sikel dok-siɗiya, ŋray hiɗi sikel ma hay liyn ma peldetna, ma' kaf hobay hiɗi futuw ma digeɗna, ma hiliɓi hay mula, kay ɗifinna. 56tasat ta ora ir sikel doogo, hobay hiɗi urdina; 57put ma joriyo kep, ɦu-gamala kep, goor ɦu-dimi kep, ma busata valam kepna, kay ɗifin ma ŋal-goyna; 58ɦu-ŋek kep kay ɗifin ma poora; 59kay ɗifinna vi lop ma slugon kayni, luway-guju ma', fok-gamala vasl, fok-ŋekŋ vasl, guro fok-dimi ma busata valam kep kepn vasl. Kayni ti vulda vi Gamliyel, goora vi Pedatsur.
60Hay buurta zleeŋeta, mi Abidan goora vi Gidewni, ma ŋolla hay jafna vi gurona vi Benyamin. 61Nam vul plana ma doorona ma nekka valam ir sikel kis kalam dok-ɦidi, tasata ta doorota ta ir sikel dok-siɗiya, ŋray hiɗi sikel ma hay liyn ma peldetna, ma' pet hobay hiɗi futuw ma digeɗna ma hiliɓi hiɗi mula, kay li ɗifinna. 62Tasata ta ora ta ir sikel doogo, hobay hiɗi urdina, 63put ma joriyo kepe, ɦu-gamala kepe, goor ɦu-dimi kep, ma busata valam kepna, kay ɗifin ma ŋal-goyna; 64ɦu-ŋek kepe, kay ɗifin ma poora. 65Kay ɗifinna vi lop ma slugon kayni, luway-guju ma', fok-dimi vasl, fok-ŋek vasl, guro fok-dimi ma busata valam kepn vasl. Kayni ti vulda vi Abidan, goora vi Gidewni.
66Hay buurta doogot kayni, mi Ahiyezer, goora vi Amiskaday ma hay jafna vi Dan, 67nam vul plana ma doorona ma nekka valam ir sikel kis kalam dok-ɦidi, tasata ta doorota ta ir sikel dok-siɗiya, ŋray hiɗi sikel ma ka li lop hay liyn ma peldetna, ma' kaf hobay hiɗi futuw ma digeɗna ma hiliɓi hiɗi mula, kay li ɗifinna; 68tasat ta ora ir sikel doogo, hobay hiɗi urdina; 69put ma joriyo kepe, ɦu-gamala kepe, goor ɦu-dimi kep, ma busata valam kepna, kay li ɗifin ma ŋal-goyna. 70ɦu-ŋek kepe, kay li ɗifin ma poora. 71Kay ɗifinna vi lop ma slugon kayni, luway-guju ma', fok-gamala vasl, fok-ŋek vasl, guro fok-dimi ma busata valam kep kepn vasl. Kayni ti vulda vi Ahiyezer, goora vi Amiskaday.
72Hay buurta doogo yam kepta kay kayni, mi Pagiyel goora vi Okran ma hay jafna vi Aser 73nam vul plana ma doorona ma nekka valam ir sikel kis kalam dok-ɦidi tasata ta doorota ta ir sikel dok-siɗiya, ŋray hiɗi sikel ma ka li lop hay liyn ma peldetna, ma' kaf hobay hiɗi futuw ma digeɗna ma hiliɓi hiɗi mula, kay li ɗifinna; 74tasat ta ora ir sikel doogo hobay hiɗi urdina; 75put ma joriyo kepe, ɦu-gamala kepe, goor ɦu-dimi kep, ma busata valam kepna, kay li ɗifin ma ŋal-goyna. 76ɦu-ŋek kepe, kay li ɗifin ma poora, 77kay ɗifinna vi lop ma slugon kayni, luway-guju ma', fok-gamala vasl, fok-ŋek vasl, guro fok-dimi ma busata valam kep kepn vasl. Kayni ti vulda vi Pagiyel, goora vi Okran.
78Hay buurta doogo yam ma'ta, mi Ahira, goora vi Enan, 79nam mar plana ma doorona, ma nekka valam ir sikel kis kalam dok-ɦidi, tasata ta doorota ta ir sikel dok-siɗiya, ŋray hiɗi sikel ma ka li lop hay liyn ma peldetna, ma' kaf hobay hiɗi futuw ma digeɗna ma hiliɓi hiɗi mula, kay li ɗifinna; 80tasat ta ora ir sikel doogo hobay hiɗi urdina; 81put ma joriyo kepe, ɦu-gamala kepe, goor ɦu-dimi kepe, ma busata valam kepna, kay li ɗifin ma ŋal-goyna, 82ɦu-ŋek kepe, kay li ɗifin ma poora, 83kay ɗifinna vi lop ma slugon kayni, luway-guju ma', fok-gamala vasl, fok-ŋek vasl, guro fok-dimi ma busata valam kep kepna vasl, kayni ti vulda vi Ahira, goora vi Enan.
84Kaf kayni ti vulda vi sa ŋulona vi Israyel, kay mal vun giwin-ma-ɗifinna. Plana ma doorona doogo yam ma', tasa ma dooron doogo yam ma', tasa ma ora doogo yam ma' kaw. 85Plana ma doorona marige kaw nekka valam ir sikel kis kalam dok-ɦidi dok-ɦidi, tasa ma doorona, ma kepn nekka valam valam ir sikel kis kalam dok-ɦidi ŋalay kep kayn nekka va' ir sikel dok-siɗiya, nekka vi dooron noŋ kaf co ir birim ma' kalam kis-fiɗi', ŋray hiɗi sikel ma hay liyn ma peldetna; 86tasa ma ora ma doogo yam ma' ma hobay hiɗi urdin kayni, ma kepn nekka valam ir sikel doogo doogo. Ŋray hiɗi sikel ma li lop hay liyn ma peldetna. Tasa ma ora tapay noŋ pet ir sikel kis kalam dok-ma'. 87Tapta vi faray ma vulum kay li ɗifin ma ŋalam-goyna; luway-jufay doogo yam ma', fok-gamala doogo yam ma', guro fok-dimi ma busata valam kep kepn doogo yam ma' tapay hiɗi vulda ɦawa'ta ta nisi ka la' dok-dokka, fok-ŋek doogo yam ma' kay ɗifin ma li poora. 88Tapta vi faray ma vulum kay ɗifinna vi lop ma slugon noŋ pet kayni: Luway-guju dok-ma' yam fiɗi, fok-gamala dok-karkiya fok-ŋek dok-karkiya, guro fok-dimi ma busam kep kepn dok-karkiya. Kayni ti vulda ta nisi mara'a kay mal vun giwin-ma-ɗifinna, bugol nisi yam mul kalam yamna.
89Hay li ma Musus kal kalafi hay guɗuk ma fi-tuwna kay law hiɗi Ma-Vatɗina, nam ka hum del mara'a ka law hiɗi namu, ay kulo kay va ma kuluɓi kay timgilla vi di-goyta, jar kerubena sa ma'na. Ki kayn nala nam ka law hiɗi Lawna.
Currently Selected:
ŊAƁTA 7: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
