ŊAƁTA 8
8
Kotna vi fitilla
1Ma-Vatɗina di tam Musus. 2Naŋ ma di tam Aaron ala: Hay li ma lak fitilla kulo kay va ma tun fitilla ɗawni, fitil ma siɗiyan ma fo liyn goy vokomis ɗiger. 3Aaron li ki kayn nala; nam lak fitilla goy vok va ma tun fitilla, ki Ma-Vatɗina vul hagata tam Musus nala. 4Va ma tun fitilla nam koti hiɗi or ma rigasayna ta-ta gaa hay selem goŋ', ta-ta kulo hay yalam goŋ', nam koti hiɗi or ma rigasayna, Musus kot va ma tun fitilla kayni, nam ŋram hiɗi ma Lawn ɗekem kiramna.
Sa Levitna giy ɗifini
5Ma-Vatɗina di tam Musus ala: 6Naŋ ma yaw sa Levitna goy jar gurona vi Israyel, naŋ ma lisi goy peldete. 7Naŋ ma yam niyn ma poor kisiya; nisi ma wel ɗuŋus ma tisin goy kafe, nisi ma muz sligara visi goyo, li tuwsi peldete. 8Bugolda nisi ma vi put ma joriyo'o, hiɗi ɗifin ma ɦawana vi futuw ma hiliɓi hiɗi mula; lo naŋ ma vi put ma joriyo'o kay li ɗifin ma poora. 9Naŋ ma mar sa Levitna kulo goboy tam guɗuk ma fi-tuwna, naŋ ma tok gurona vi Israyel noŋ kafe. 10Naŋ ma mar sa Levitna vok Ma-Vatɗina; gurona vi Israyel ma bar ɓisi kay sa Levitna. 11Aaron ma muɗ ir sa Levitna hay gal hena gal hena kaf vok Ma-Vatɗina, ki ɗifinna ma may vi gurona vi Israyel nala; nala nisi ma vulis goyo kay li lopna vi Ma-Vatɗina. 12Sum sa Levitna ma tun ɓisi kay yam luwayna; naŋ ma vul ma kepn goyo kay ɗifin ma poora, hena kay ɗifin ma ŋal-goyna, kay li poora kay sa Levitna. 13Sa Levitna naŋ ma laksi kulo vok Aaron hiɗi gurona valamu, naŋ ma muɗsi galsiya ki san ka muɗ gal ɗifinna kulo vok Ma-Vatɗina nala. 14Naŋ ma poŋ ir sa Levitna goy jar gurona vi Israyel; sa Levitna nisi ma muɗ ir vanu. 15Bugol kayni, sum sa Levitna ma co'o kay li lop hay guɗuk ma fi-tuwna, ki kayn nala naŋ ma lisi goy peldete, naŋ ma muɗsi galsi kaf ki naŋ ka muɗ gal sle ma ɗifinna nala. 16Kay jar gurona vi Israyel kayni, nisi vuli goy man nanu, nan yawsi goy ir manu jar gurona vi Israyel: Nan muɗsi goy ir manu hay baŋal guro sa vuɗi jewna, kuɗ sa vuɗi jewn kaf jar gurona vi Israyel. 17Kay guro sa vuɗi jewna jar gurona vi Israyel kaf nisi ir manu, sumuna hiɗi farayn kafe; kay buur ma nan ci guro sa vuɗi jewna vi Egipte kayni, nan muɗ sa Israyella ir man may. 18Sum sa Levitna nan yawsi hay baŋal guro sa vuɗi jewna vi Israyel kafe. 19Sum sa Levitna nan vulsi mi Aaron hiɗi gurona valam noŋ kafe jar gurona vi Israyel, kay nisi ma li lopna vi gurona vi Israyel hay guɗuk ma fi-tuwna, kay nisi ma li poora kay gurona vi Israyel, kay hay li ma gurona vi Israyel co tam liyn ma peldetn ɗawni, bakmaran ma fisiɗi.
20Slen ma Ma-Vatɗin dum kay sa Levitna, Musus, Aaron hiɗi vokŋa vi Israyel kaf lum tisiya; gurona vi Israyel li tisiya ki kayn nala. 21Sum sa Levitna por tuwsi goyo, nisi muz sligara visi goyo, Aaron muɗsi galsi kaf ki ɗifin ma vok Ma-Vatɗina nala, nam li poor kisiya, kay lisi goy peldete. 22Bugol kayni, sum sa Levitna co kay li lop hay guɗuk ma fi-tuwna, vok Aaron hiɗi gurona valamu, kuɗ va ma Ma-Vatɗin dum tam Musus kay sa Levitna; nam li katsi ki kayn nala.
23Ma-Vatɗina di tam Musus ala: 24Kayni mi va ma law kay Levitna. Tun caw tam busat dok-ma' yam vasl ta-ta kulo kalam ɗaw kayni, sa ma Levitna as kal hay lopna vi guɗuk ma fi-tuwna kay li lopo, 25hay li ma busata valam coowa dok-vasli ni, nam ma li lop loɗi. 26Nam as gut ɓosiyomna hay lopna vi guɗuk ma fi-tuwna, kay ŋom sle ma hini hay ɓisina; may nam as li lopɗi. Naŋ ma li tam sum sa Levitn ɗawn ki kayn nala hay lop ma nisi lumna.
Currently Selected:
ŊAƁTA 8: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
