ŊAƁTA 31
31
Nisi kol kay sa Madiyanna
1Ma-Vatɗina di tam Musus ala: 2Naŋ ma job yam gurona vi Israyel tam sum sa Madiyanna; bugol kayni naŋ ma mita may. 3Musus ka di tam sumun ala: Gangi sum sara jargiya kay duura, nisi ma tuɗ dur sum sa Madiyanna, kay Ma-Vatɗina ma job yalam tam sum sa Madiyanna hiɗi nigiya. 4Nigi ma cuk sumun birim kep kep kuɗ jafna jafna kay nisi tuɗ vun duura. 5Kuɗ vokŋa vi sa Israyella, nisi yaw sumun birim kep kep kuɗ jafna, tapay pet sumun birim doogo yam ma' sa tuwsi koti kay duura. 6Sum nisina Musus cuksi vun duur kaf, tapay hiɗi mul-ma-ɗifinna Fineyas, goora vi Eliyazar, nam ka ziy slen ma peldetna hiɗi togolom ma buwumna.
7Nisi kalay dur sa Madiyanna, ki Ma-Vatɗina vul hagat mi Musus nala, nisi ci sa jufayn goy kafe. 8Muliyana vi Madiyan sa vaslna, Evi, Rekem, Sur, Hur hiɗi Reba nisi cisi goy kafe; hiɗi segen kaw. Balaam goora vi Bewor kaw nisi cum goy hiɗi kew-gaferaŋa. 9Sum sa Israyella yaw boyna vi sa Madiyanna hiɗi gurona visi kaf daŋgaya, nisi vurum farayna visi kafe, yaw luwayna visi kaf, hiɗi slena visi kaf kaw. 10Nisi ŋal hoyok-ziyna ma nisi hayamna hiɗi guru ma nisi hayamna kaf. 11Sle ma nisi tum ɓuraŋŋa kaf, sumuna hiɗi farayna kaw, nisi kalay hiɗi namu; 12Nisi kalay hiɗi sum sa nisi yawsi gorvona, sle ma ɓuraŋŋa hiɗi ma vurumin kaf, nisi tuɗum tam Musus hiɗi mul-ma-ɗifinna Eliyazar, hiɗi tokŋa vi gurona vi Israyel kafe, sa ka tokay hay fulda vi Mowab, goboy hiɗi Yordan, ɗiger vok Yeriko.
13Musus hiɗi mul-ma-ɗifinna Eliyazar hiɗi sa ŋulona vi Israyel kaf kalay goy kirsiya, goy bugol guruna. 14Musus muɗ ɦiy kat sa ŋulona vi sojena, sa ŋulona vi sum sa birimi, vi sum sa kisna kaw sa may vun duur pana. 15Nam disiya: Nigi hin boyn ay iri kaf kay mige? 16Nisi kayni si sa kuɗ dita vi Balaam, zut sum sa Israyella kay li suluk kat Ma-Vatɗina, kuɗ lawta vi Pewor; bakmaran li jar sa Israyella kay kuɗ law na'ta ɗisu? 17Wulin kayni sum sa jufayna jar gurosgurayn kaf nigi ma cisi goyo, boyna sa buri tam sum sa jufayn kaf nigi ma cisi goy kafe; 18may guro-boy sa bay bur tam sa tuwana nigi ma hinsi iri kafe. 19May nigiya, lakgi goy bugol guruna vigi ir buur siɗiya; sum sa jargiya sa ci sumun matna, sa tun ɓisi tam sum sa mitina kaf, ma muz tuwsi goyo hay buurta ɦidita hiɗi buurta siɗiyata, nigiya hiɗi sa daŋgayna vigi kafe. 20Nigi ma por sligara vigi goy kafe, sligar ma bakŋa kafe, sle ma koti hiɗi bak fok-meena, hiɗi gu ma li lop hiɗi namna kafe.
21Mul-ma-ɗifinna Eliyazar di tam sojen sa tuɗi vun duura kaf ala: Humgi va ma Ma-Vatɗin dum mi Musus hay gatta valamna: 22Ora, doorota, wayta kaway ɗeŋŋa, kaway ma yum eteŋŋa, hiɗi tuwtana, 23slen ma as yor hay kuta kafe, nigi ma yorom hay kuta kay muɗum bay-gese, slen ma yor hay kutɗina nigi ma porom hay niyna, nigi ma jikim hay niyna. 24Hay buurta siɗiyata nigi ma muz sligara vigi goyo, bugol kayni nigi muɗi bay-gese, nigi as kal kulo hay guruna may.
25Ma-Vatɗina di tam Musus: 26Sle ma ɓuraŋŋa ma nigi yawamay vun duura, naŋu hiɗi Eliyazar, hiɗi sa ŋulona kuɗ jafn kaf, sumuna hiɗi farayn kaw nigi ma ŋaɓam goyo. 27Naŋ ma ɓuraw sle ma ɓuraŋŋa jar sa tuɗ vun duura kaf hiɗi vokŋa vi sumun noŋ kaf. 28Gal ma vulum mi soje sa tuɗ vun duura naŋ ma yaw kuɗumu ir vi Ma-Vatɗina: Kayn di ala kis-vasl sli goy kuɗum kepe; la mi sumuna lebo farayna, la mi kurona lebo fok-dimina kaw. 29Nigi ma yaw kuɗ galla valamu, naŋ ma vulum mi mul-ma-ɗifinna Eliyazar ki vulda tam Ma-Vatɗin nala. 30Galam hena ma hin mi gurona vi Israyel ɗawni, dok-vasl naŋ sli goy kuɗum kepe, la sumuna lebo farayna, la kurona lebo fok-dimina, farayn kaf; naŋ ma vulum mi sa Levitna, sa ka ŋom tabernaklena vi Ma-Vatɗina. 31Musus hiɗi mul-ma-ɗifinna Eliyazar li kuɗ va ma Ma-Vatɗin dum tam Mususna. 32Sle ma nisi sa tuɗ vun duura tum ɓuraŋŋa tapay noŋ pet: Fok-dimina birim kis-karkiya hiɗi diram dok-siɗiya yam vasl, 33luwayna birim dok-siɗiya yam ma', 34kurona birim dok-karkiya yam kep 35guro-boyna sa bay bur tam sa tuwa noŋo tapay birim dok-ɦidi yam ma'.
36Galla valamu, ma ir vi sa tuɗ vun duura tap noŋ pet ir fok-dimi birim kis-ɦidi hiɗi diram dok-ɦidi yam siɗiya kalam kis-vasl, nisi yaw goy kuɗum ir birim kis-ɦidi kalam kis-vasl, 37vul galla vi Ma-Vatɗina ir kis-karkiya kalam dok-siɗiya yam vasl; 38luwayn birim dok-ɦidi yam karkiya, vul galla vi Ma-Vatɗina ir luway dok-siɗiya yam ma'; 39kuron birim dok-ɦidi kalam kis-vasl, vul kuɗum mi Ma-Vatɗin ir dok-karkiya yam kep; 40sumun birim doogo yam karkiya, vul sumun kuɗsi dok-ɦidi yam ma' mi Ma-Vatɗina ki galla valam nala. 41Gal ma ir vi Ma-Vatɗina Musus vulum mi mul-ma-ɗifinna Eliyazar, ki Ma-Vatɗina vulum hagat nala.
42Galla vi sle ma ɓuraŋŋa ma vuli mi gurona vi Israyel, ma Musus poŋom iram goy hiɗi ma ɓurawam mi sa tuɗ vun duura, 43ma ir vi tokŋa tap noŋ pet ir fok-dimin birim kis-ɦidi hiɗi diram dok-ɦidi yam siɗiya kalam kis-vasl, 44luwayn birim dok-ɦidi yam karkiya, 45kurona birim dok-ɦidi kalam kis-vasl 46sumun birim doogo yam karkiya. 47Kuɗ galla namna ma vi kep tokŋa vi Israyel kayni, dok-vasl Musus sli goy kuɗum kep kepe, kuɗ sumuna hiɗi farayn lay, nam vulum mi sa levitna, sa ka ŋom tabernaklena vi Ma-Vatɗina, ki Ma-Vatɗina vulum hagat nala.
48Sa ŋulona vi vok ma birimi ɦidi vok ma kisna co tam Musus, 49nisi dumu: Soje sa gaa kuɗ gaŋeraŋa vumana numa li ŋaɓta visiyawa goy kafe, sa mara kep kaw may hini goyɗi. 50Gige gige jarma'a min mar ora ma nam fumna tam Ma-Vatɗina: Jaɓna, way-digilina va ma gum cita-ɓamna, sle ma cuk humna hiɗi kermena kay li poor kuma'a vok Ma-Vatɗina. 51Slen namna ma koti hiɗi ora Musus hiɗi mul-ma-ɗifinna Eliyazar yawam hay ɓisiya. 52Ora kaf, ma sa ŋulona vi vok ma birimna hiɗi vok ma kisna vulum tam Ma-Vatɗina hiɗi ɓisi kulo meɗayna, nekka valam co noŋ pet ir sikel birim doogo yam karkiya hiɗi diram kis-siɗiya kalam dok-vasl. 53Soje segena gigekaw ŋom sle ma nam yawamayna. 54Musus hiɗi mul-ma-ɗifinna Eliyazar yaw ora hay ɓam sa ŋulona vi vok ma birimi hiɗi vok ma kisna, nisi maram hay guɗuk ma fi-tuwna, kay Ma-Vatɗina humam ma gum kay gurona vi sa Israyella.
Currently Selected:
ŊAƁTA 31: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
