ŊAƁTA 29
29
Buur ma firita ŋolda
1Hay til ma siɗiyana hay buurta jewta vi tilla, nigi ma li dakka ta peldetta: Nigi as li lop ma nekɗi. Nigi ma buw togolomna hay tun cawta vi buur namna. 2Kayni mi ɗifin ma ŋal-goyna ma nigi ma lumu, ma hista valam ŋaa'a ŋolo kir Ma-Vatɗina: Put ma joriyo kepe, ɦu-gamala kepe, guro fok-dimi siɗiya ma busata valam kep kep ma moy may talamɗina. 3Nigi ma tap talamu ɗifinna vi futuw ma digeɗna ma hiliɓi hiɗi mula, goto zleeŋe kay putna, goto karkiya kay ɦu-gamalana, 4goto ɦidi kay guro fok-dimin kalam siɗiya kafe. 5Nigi ma ŋat ɦu-ŋek kep kay li ɗifin ma poora, kay por tuwgi hiɗi namu. 6Ɗifin hena ma nigi ma tapam hiɗi namna: Nigi ma li ɗifin ma ŋal-goyna hiɗi ɗifin ma hay tilla kafna, hiɗi ɗifin ma yamam goyna ma nigi ma tapam talamna, ki lawt coli kalam nala. Kayni mi ɗifin ma ŋalay hay kuta, ma hista valam ŋaa'a ŋolo kir Ma-Vatɗina.
7Hay buurta doogota vi til namna ma siɗiyan zawni, nigi ma li dakka ta peldetta, nigi ma hot yigi gaa'a, nigi as li lopɗi. 8Kayni mi ɗifinna ma hista valam ŋaa'a kir Ma-Vatɗina, ma nigi ma ŋalamna: Put-guju kepe, ɦu-gamala kepe, guro fok-dimi siɗiya ma busata valam kep kepna, ma moy may talamɗina. 9Nigi ma tap talamu futuw ma digeɗna ma hiliɓi hay mula, goto zleeŋe kay put-gujuna, 10goto karkiya kay ɦu-gamalana, goto ɦidi kay goor ɦu-dimi kep kep kalam siɗiya kafe. 11Nigi ma ŋat ɦu-ŋek kepe kay li ɗifin ma poora, tam ɗifin ma poora nigi as tap ɗifin ma ŋal dok-dokŋa, hiɗi niy ma yamam goyna kaw.
12Hay buurta doogo yam vaslta vi til ma siɗiyana, nigi ma li dakka ta peldetta: Nigi ma li lop ma nek noŋɗi, nigi ma li yuldeta kay subur sem Ma-Vatɗina ir buur siɗiya. 13Kayni mi ɗifin ma hista valam ŋaa'a ŋolo kir Ma-Vatɗina, ma nigi ma lumna: Luway ma joriyo doogo yam ɦidi, fok-gamala ma', guro fok-dimin doogo yam fiɗi, ma busata valam kep kepna, ma moy may talamɗina. 14Nigi ma tap talamu futuw ma digeɗna ma hiliɓi hay mula, goto zleeŋe kay put-guju kep kep kalam kafe, goto karkiya kay ɦu-gamala kep kep kafe, 15goto ɦidi kay goor ɦu-dimi kep kep kafe. 16Nigi ma ŋat hu-ŋek kep kay li ɗifin ma poora, nigi ma tap ɗifin ma ŋal dok-dokŋa talamu, hiɗi niy ma yamam goyna.
17Hay buurta ma'ta, nigi ma ŋat luway ma joriyo doogo yam ma', fok-gamala ma', guro fok-dimi doogo yam fiɗi ma busata valam kep kep, ma moy may talamɗina. 18tapay hiɗi ɗifinna hiɗi slen ma yamam goyna kay luway-jufayna, fok-gamalana hiɗi guro fok-dimina, kuɗ ŋaɓta valamu, ki gatta coli nala. 19Nigi ma ŋat ɦu-ŋek kepe kay li ɗifin ma poora, tapay hiɗi ɗifin ma ŋal dok-dokŋa, tapay hiɗi vulda hiɗi slen ma yamam goyna.
20Hay buurta ɦidita, nigi ma ŋat luway-jufay doogo yam kep, fok-gamala ma', guro fok-dimi doogo yam fiɗi ma busata valam kep kep, ma moy may talamɗi, 21ɦidi ɗifinna hiɗi sle ma yamam goyna kay luway-jufayna, kuɗ ŋaɓta valamu ki gatta coli nala. 22Nigi ma ŋat ɦu-ŋek kep kay li ɗifin ma poora, tapay hiɗi ɗifin ma dok-dokŋa, tapay hiɗi slen na yamam goyna.
23Hay buurta fiɗita, nigi ma ŋat luway-jufayn doogo, fok-gamala ma', guro fok-dimi doogo yam fiɗi ma busata valam kep kep ma moy may talamɗina, 24tapay hiɗi ɗifinna hiɗi sle ma yamam goyna kay luway-jufayna, fok-gamalana hiɗi guro fok-dimina, kuɗ ŋaɓta valamu, ki gatta coli nala. 25Nigi ma ŋat ɦu-ŋek kepe kay li ɗifin ma poora, tapay hiɗi ɗifin ma ŋal dok-dokŋa hiɗi slen ma yamam goyna.
26Hay buurta vaslta, nigi ma ŋat luway-jufayn vasl, fok-gamala ma', guro fok-dimi doogo yam fiɗi, ma busata valam kep kepe, ma moy may talamɗina, 27tapay hiɗi ɗifinna hiɗi slen ma yamam goyna kay luway-jufayna, kay fok-gamalana hiɗi guro fok-dimina kuɗ ŋaɓta valamu, ki gatta coli nala. 28Nigi ma ŋat ɦu-ŋek kep kay ɗifin ma poora, tapay hiɗi ɗifin ma ŋal dok-dokŋa, hiɗi sle ma yamam goyna.
29Hay buurta karkiyata, nigi ma ŋat luway-jufay glafandi, fok-gamala ma' hiɗi guro fok-dimi doogo yam fiɗi ma busata valam kep kep, ma moy may talamɗina. 30Tapay hiɗi ɗifinna hiɗi sle ma yamam goyo kay luway-jufayna, fok-gamalana hiɗi guro fok-dimina, kuɗ ŋaɓta valamu, ki gatta coli nala. 31Nigi ma ŋat ɦu-ŋek kepe kay li ɗifin ma poora, tapam hiɗi ɗifin ma ŋal dok-dokŋa, vulda hiɗi sle ma yamam goyna kaw.
32Hay buurta siɗiyata, nigi ma ŋat luway-jufay siɗiya, fok-gamala ma', guro fok-dimi doogo yam fiɗi ma moy may talamɗina ma busata valam kep kepna, 33tapay hiɗi ɗifinna hiɗi sle ma yamam goyo kay luway-jufayna, kay fok-gamalana hiɗi guro fok-dimina, kuɗ ŋaɓta valamu, ki gatta coli nala. 34Nigi ma ŋat ɦu-ŋek kep kay li ɗifin ma poora, tapam hiɗi ɗifin ma ŋal dok-dokŋa, vulda hiɗi sle ma yamam goyna.
35Hay buurta glafandita, nigi ma li dakka ta ŋolda, nigi ma li lop ma nekɗi, 36kayni mi ɗifin ma ŋalay hay kuta ma nigi ma lum tam Ma-Vatɗina, ma hista valamu kiram ŋaa'a ŋolo, nigi ma ŋat put-guju kepe, ɦu-gamala kepe, guro fok-dimi siɗiya ma busata valam kep kepna, ma moy may talamɗina, 37tapay hiɗi ɗifinna hiɗi sle ma yamam goyo kay put-gujuna, kay ɦu-gamalana hiɗi guro fok-dimina, kuɗ ŋaɓta valamu, ki gatta coli nala. 38Nigi ma ŋat ɦu-ŋek kepe kay li ɗifin ma poora, hiɗi ɗifin ma ŋal dok-dokŋa, vulda hiɗi sle ma yamam goyna.
39Kayni mi ɗifinna ma nigi ma ŋalam tam Ma-Vatɗina hay yuldeta vigiya, tapay hiɗi ɗifin ma ŋal-goyna hiɗi sle ma yamam goyna hiɗi vulda vigiya, hiɗi ɗifinna vigi ma toyta, kay hob vun va ma nigi yi kigiya lebo kay ɗifin ma kuɗ minda vigina.
Currently Selected:
ŊAƁTA 29: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
