SA LEVITNA 24
24
Gatta ta vuli kuɗ va ma tun fitilla hiɗi fun ma peldetna
1Ma-Vatɗina di tam Musus ala: 2Naŋ ma di tam gurona vi Israyel ala nisi ma maraŋ mul olivena ma kilira, ma bay-rigasna, kay fitilla ma li doy dok-doko. 3Aaron ma kotom ɗawni goy bugol sligar ma gaɓayna ma ka vok di-goyta, hay guɗuk ma fi-tuwna, ma Aaron kotomna ɗawni, kay a fitilla ma ŋal dok-dok, tun caw tam vulatita pa ta-ta graw culumta, hay vok ir Ma-Vatɗina. Kayni ti gatta ta hini dok-doko kay jaf ma bugolgina. 4Nam ma zlar fitilla kulo kay va ma tun fitilla ma koti hiɗi ora ma bay-rigasna, kay nam ma ŋal dok-dok vok ir Ma-Vatɗina.
5Naŋ ma yaw futuw ma digeɗna, naŋ ma kot hambulla doogo yam ma'; kot hambul ma kepna hiɗi futuwn ir goto karkiya karkiya. 6Naŋ ma jakam kulo kay tuwam kuɗ batam ma', kayn di ala ma karkiyan naŋ jakam kulo kay tuwam kepe, kulo kay tablena ma kori hiɗi or ma bay-rigasna ma ka vok ir Ma-Vatɗina. 7Naŋ ma jo urdi ma hisna kalam kafe, naŋ ma tunum kay funa ki gi-humda nala, ki ɗifin ma ŋalay hay kuta nala vok ir Ma-Vatɗina. 8Hay buur ma sabatna kaf, ma zlar fun namna vok ir Ma-Vatɗina dok-doko. Kayni ti bonota ta vatɗita ta gurona vi Israyel ma li kuɗa'a. 9Tin namna ma hin vi Aaron hiɗi gurona valamu, nisi ma tum hay liyn ma peldetna; kay nam ma hin ɗawni mi va ma peldete kisiya, galla vi ɗifinna ma ŋalay hiɗi kuta vok ir Ma-Vatɗina. Kayni ti gatta ta hini ta-ta hay vatɗita.
Kitata vi sum sa ŋulda hiɗi sa ci matna
10Goor mara kep sulum ti cat ta Israyelta, bulum mi sa ma Egiptena, nam co jar gurona vi Israyel hay farana. Nam nef tuwam hiɗi sa ma Israyella. 11Goora vi cata Israyelta yi sem Lawn hay vunamu, ŋul sem Lawna. Nisi maram tam Musus. Sulum ya' ala Selomit, goota vi Dibri, hay jafna vi Dan. 12Nisi gum daŋgaya, ta-ta nisi cub va ma Lawn min dum mi Musus kay sa namna.
13Ma-Vatɗina di tam Musus ala: 14Sa ma yi semda van hay vunam waan kayni naŋ ma kalamay goy hay guɗukŋa, sum sa humumna kaf ma tun bisi kalamu, tokŋa kaf ma gum hiɗi goorhoyona. 15Naŋ ma di tam gurona vi Israyel ala: San gigekaw, la nam ŋul semda vanawa, nam ma ziy zumalda vi sulukŋa valamu. 16Sa ma yi semda vi Lawnawa waa'a, kitata valam ti mitta. Tokŋa kaf ma gum hiɗi goorhoyona. La nam mi sa mi pulu lebo goor ma vuɗiya kaw, ma cum goy hiɗi goorhoyona, kay mige nam ŋul sem Lawna. 17La san ci mara mati, kitata vi san kayni ti mitta. 18La san ci va ma faray mati, nam ma vurna mara hay baŋalamu. Irita kay irita. 19La san ka tuw sugolomna goy mili, ma li talamu ki nam li nala kaw. 20Kus-zokŋa kay kus-zokŋa, ira kay ira, siya kay siya, ma ka mil tam sana ki nam ka mil tam sugolomna nala kaw. 21La sa ci va ma faraya, nam as vurna mara hay baŋalamu, may sa ma ci sa mati, kitata valam ti mitta. 22Gatta nigi ma tuna' ŋray ca kay sa ma pulla hiɗi sa ma vuɗina, kay nanu mi Ma-Vatɗina Lawna vigiya.
23Musus di tam gurona vi Israyel, sa ma ŋul sem Lawna nisi kalamay goyo, cum goy hiɗi goorhoyona. Nala gurona vi Israyel hot yisi gaa kuɗ dita ta Ma-Vatɗin da'ays mi Mususta.
Currently Selected:
SA LEVITNA 24: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
