SA LEVITNA 23
23
Yuldeta
1Ma-Vatɗina di tam Musus: 2Naŋ ma di tam gurona vi Israyel ala: Yuldena vanu ma nisi lumna ɗawni, nam ma li mi dakŋa ma peldetna. Kayni mi yuldena vanu. 3Nigi ma li lop ir buur karkiya; may buurta siɗiyat kayni mi sabatna; buur ma tun sukŋa: Nigi ma yi dakka ta peldetta. Nigi ma li lopɗi, kayni mi sabatna vi Ma-Vatɗina, hay liyn ma musta vigi kafe.
4Kayni mi yuldena vi Ma-Vatɗina, dakŋa ma peldetna ma nigi ma lumu hay li ma liyna valam ma colin coowa. 5Lum hay til ma jewna, hay buurta doogo yam fiɗita vi tilla, hay vulatita, kayni ti paskata vi Ma-Vatɗina. 6Hay buurta doogo yam vaslta vi til namna ɗawni, ti yuldeta vi fun-bay-kufna kay subur sem Ma-Vatɗina. Nigi ma ti fun-bay-kufna ir buur siɗiya. 7Hay buurta ta jewta, nigi ma yi dakka ta peldetta, nigi ma li lop ma nekɗi. 8Nigi ma li ɗifin ma ŋalay hay kuta ir buur siɗiya mi Ma-Vatɗina. Hay buurta siɗiyat ɗawni, nigi ma yi dakka ta peldetta, nigi as li lop ma nekɗi.
9Ma-Vatɗina di tam Musus: 10Naŋ ma di tam gurona vi Israyel ala, hay li ma nisi coowa hay nagata ta nan vulsit ɗawni, la nisi feɗ wanawa, nisi ma git wa-tulla kuɗ vun jaf ma niyi jewna, maram mi mul-ma-ɗifinna. 11Mul-ma-ɗifinna ma muɗum galam kulo kaf vok Ma-Vatɗina, kay nam ma li kir Ma-Vatɗin ŋaa'a. Goy jifini bugol sabatna lo, mul-ma-ɗifinna ma muɗum galam kulo kaf vok Ma-Vatɗina. 12Hay buur ma nigi muɗ gal wa-tulla kulo vok Ma-Vatɗin ɗawni, nigi ma li ɗifin ma ŋal-goyna mi Ma-Vatɗina hiɗi goor ɦu-dimina ma busata valam kep, ma moy talamɗina; 13nigi ma tapam hiɗi futuwna ma hiliɓi hay mula ir goto karkiya, ki ɗifin ma ŋalay goyna nala, hista valam ŋaa ŋolo kir Ma-Vatɗina, vin ma yamam goyna hay gal ma fiɗina vi gasasta kaw. 14Nigi ma ti funɗi, mut yam wan ma warayna hiɗi ma hawaynɗi, ta-ta hay buur ma nigi mar ɗifinna vigi mi Lawna vigiya. Kayni ti gatta ta hini dok-dok kay jafna vigiya, hay liyn ma nigi lak hayna kaf.
15Hay buurta ka'ta vi sabatna, tun caw tam buur ma nigi mar wa-tulla ma muɗum galamna pa, nigi ma ŋaɓ lumut siɗiya. 16Tun caw tam buurta ka'ta vi sabatna ma siɗiyan pa, nigi ma ŋaɓ buurta dok-vasl, bugol kayni nigi ma li vulda ta wuliya tam Ma-Vatɗin lo. 17Nigi ma mar funay kigi vo hay ziyna vigi ma', ma muɗ gal fun namna kulo vok Ma-Vatɗina, tapam hiɗi futuwna goto karkiya, zalam hiɗi kufna, kayni mi vun-jaf ma jewna vi Ma-Vatɗina. 18Lo, nigi as mar guro fok-dimin siɗiya ma busata valam kep kep, ma moy talamɗina, goor-put ma joriyo kepe hiɗi ɦu-gamala kepe, kay li ɗifin ma ŋal-goyna mi Ma-Vatɗina. Nigi ma tap talamu vulda hiɗi mul ma yamam goyna ma nigi ka lum dok-dokŋa, ki ɗifin ma ŋalayna, ma hista valam ŋaa'a ŋolo kir Ma-Vatɗina nala. 19Nigi ma ŋat ɦu-ŋekŋa kay li ɗifin ma poora, nigi as ŋat guro fok-dimin ma' ma busam kep kepna kaw kay li ɗifinna vi lop ma slugona. 20Mul-ma-ɗifinna ma muɗum galam kulo kaf vok Ma-Vatɗina, hiɗi funa vi vun-jaf ma jewna, hiɗi guro fok-dimi ma ma'na; ma vulum goy mi Ma-Vatɗina, namu vi mul-ma-ɗifinna. 21Hay buur namna ɗawni, nigi ma li yuldeta, nigi ma yi dakka ta peldetta, nigi as li lop ma nekɗi. Gatta kayni hini dok-dok kay jafna vigiya, hay liyn ma nigi lak ziy hayamna kaf. 22Hay li ma nigi li feɗna vi sinen ɗawni, nigi ma hin gal sine mara goy bay feɗa, ɦelena nigi ma vilekemɗi. Nigi ma hin kayni goy mi sa ma hawna hiɗi sa ma pulla. Nanu mi Ma-Vatɗina, Lawna vigiya.
23Ma-Vatɗina di tam Musus: 24Naŋ ma di tam gurona vi Israyel ala: Hay til ma siɗiyana, hay buurta jewta vi tilla, nigi ma sli buur kep kay tun sukgiya. Nigi ma yi tuwgiya, buw togolomna hay buur namna. 25Nigi as li lop ma nekɗi, nigi ma li ɗifin ma ŋalay hay kuta tam Ma-Vatɗina.
26Ma-Vatɗina di tam Musus ala: 27Buurta doogota vi til namna ma siɗiyan zawni, ma li ti buurta vi poora, nigi ma yi tuwgi hay dak ma peldetna, nigi ma las ciwta vigiya, nigi ma li ɗifin ma ŋalay hay kuta tam Ma-Vatɗina. 28Hay buur namna ɗawni nigi ma li lopɗi, kay kayni mi buur ma li poora kigiya vok ir Ma-Vatɗina Lawna vigiya. 29Hay buur namna ɗawni san gigekaw ma hot yalam gaa kuɗ Ma-Vatɗinɗina ma kaam selem goy jar sumuna valamu. 30Hay buur namna ɗawni, la san gigekaw li lopawa, nan ma kaam selem goy jar sumuna valamu. 31Nigi ma li lop noŋɗi. Kayni ti gatta ta hini dok-dok jar jafna vigiya, hay liyn kaf ma nigi ma li ziy hayam ɗawni. 32Nam ma li ɗawni mi buur ma sabatna vigiya, mi buur ma tun sukŋa, nigi ma las ciwta vigiya, tun caw hay vulatita vi buurta zleeŋeta ta-ta tam buurta ka'ta, nigi ma li kuɗ sabatna.
33Ma-Vatɗina di tam Musus: 34Naŋ ma di tam gurona vi Israyel ala: Buurta doogo yam vaslta vi til nam ma siɗiyan zawni, nigi ma li yuldeta vi tabernaklena kay suburan semda vanu, ir buur siɗiya. 35hay buurta jewta, nigi ma yi dakka ta peldetta, nigi as li lop ma nek haya'ɗi. 36Ir buur siɗiya, nigi ma li ɗifin ma ŋalay hay kuta tam Ma-Vatɗina; hay buurta glafandita nigi ma yi dakka ta peldetta, nigi ma li ɗifin ma ŋalayna tam Ma-Vatɗina. Kayni ti dakka ta ŋolda, nigi as li lop ma nek hay buur na'taɗi. 37Kayni ti yuldeta vi Ma-Vatɗina, dakka ta peldetta ta nigi ma la'a kaw, kay ɗifin ma vulum tam Ma-Vatɗina ma li ŋalay hay kuta, ɗifin ma ŋal-goyna, sle ma vulda, sle ma ŋatamna, hiɗi mul ma yamam goyna. Va marige kaw buura valam ka coli zaw zaw. 38Nigi ma li kuɗ sabatna vi Ma-Vatɗina kaw, nigi ma li vulda vigi tam Ma-Vatɗin dok-doko, nigi ma li ɗifinna vigi ma hob vun va ma nigi yum kigina hiɗi vulda kuɗ minda kaw.
39Hay buurta doogo yam vaslta vi til ma siɗiyan ɗawni, hay li ma nigi feɗ vuɗ jaf ma hay nagatnawa, nigi ma li yuldeta tam Ma-Vatɗina ir buur siɗiya, buurta jewta ma lin ti buur ta tun sukŋa, buurta glafandita ma li ti buur ta tun sukŋa kaw. 40Hay buurta jewt ɗawni, nigi ma yaw vuɗna vi gu ma ŋaana, ɓam gomona, hum gu ma goɗayna, hiɗi liwin ma kel-niyna, nigi ma li firi vok ir Ma-Vatɗina, Lawna vigiya ir buur siɗiya. 41Hay busat kaf nigi ma li yuldeta na'ta tam Ma-Vatɗina ir buur siɗiya. Kayni ti gatta ta hini dok-dok kay jafna vigiya. Nigi ma li yuldet na'ta hay til ma siɗiyana. 42Nigi ma lak goy hay guɗukŋa ir buur siɗiya; sum sa vuɗi hay Israyel kaf ma lak hay guɗukŋa. 43Kay a gurona vigi ma wi ala hay li ma nan yaw sum sa Israyella ay goy hay Egipte pa kayni, nan laksi hay guɗukŋa. Nanu mi Ma-Vatɗina Lawna vigiya.
44Ki kayn nala, Musus di tam gurona vi Israyel kay nisi ma wi yuldeta vi Ma-Vatɗina.
Currently Selected:
SA LEVITNA 23: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
