SA LEVITNA 14

Gatta kay por-goyta vi sa ma kuturuna

1Ma-Vatɗina di tam Musus ala: 2Nan min vulaŋ gatta kay buur ma por-goyta vi sa ma moy-kuturuna. Ma naram vok mul-ma-ɗifinna, 3mul-ma-ɗifinna ma kalay goyo kay saramu. La sa namna yeri goy kay moy-kuturuna. 4Mul-ma-ɗifinna ma vul hagata kay nisi ma yaw layn ma irin ma', lay ma liwisɗina, yaw gu-gamna, sligar ma slawna, hiɗi hisopna 5Mul-ma-ɗifinna ma vul hagata kay ŋat lay ma kepna kulo kay doway-firina ma koti hiɗi nagana ma niy ma kilir hayamna. 6Nam ma vi lay ma irina, sli gu-gamna, yaw sligar slawna hiɗi hisopna tapam hiɗi layn pet, jiyobom gaa hay busuwna vi lay ma ŋatam gaa hay niy ma kilira. 7Nam as yam niyn sem siɗiya kat sa ma min yer goyo kay moyna vi kuturuna. Bugol kayni nam tapam kuɗ sa peldetna, lay ma irina nam gum iram goy fulu.

8Sa ma por tuwam goyna ma muz sligara valam goyo, wel ɗuŋus ma talamna goy kafe, muz tuwam goloŋ hay niyna; nala nam muɗi bay-liwisi. Bugol kayni nam ma hotay hay guɗukŋa, may nam mus goy ŋor guɗukŋa valam ir buur siɗiya. 9Hay buurta siɗiyata, nam ma wel ɗuŋus ma talamna goy kafe; ɗuŋus ma kalamna, ma dumamna, ma goŋ-iramna, wel ɗuŋus ma talamna goy kafe; muz sligara valam goyo, muz tuwam goloŋ hay niyna, nala nam may liwis loɗi.

10Hay buurta glafandita, nam ma yaw guro fok-dimi ma moy talamɗin ma', ɦu-dimita ta busata va' kepta ta moy may ta'ɗita, hob futuwn hay dutta-kusta, yaw gal ma ɦidina valamu, li ɗifin ma hiliɓi hiɗi mula hiɗi namu, hiɗi mula ir gasas kep may. 11Mul-ma-ɗifinna ma muz san goyna mar sa namna hiɗi slen kaf vok ir Ma-Vatɗina, goy vun guɗuk ma fi-tuwna. 12Mul-ma-ɗifinna ma vi goor ɦu-dimi ma kepna, nam ma li ɗifin ma kay sulukŋa hiɗi ɦu namna, hiɗi gasas ta mula, nam ma geɗem kulo'o vok Ma-Vatɗina. 13Nam ma ŋat goor ɦu-dimina hay liyn ma ŋat faray ma poora hiɗi faray ma ŋal-goyna, hay liyn ma peldetna, kay hay ɗifin ma kay sulukŋa hiɗi ɗifin ma ŋal-goyn kayni, va ma ŋatamna nam vi mul-ma-ɗifinna, kayni mi va ma peldet suwiya. 14Mul-ma-ɗifinna ma yaw busuwna vi ɗifin ma kay sulukŋa, nam ma jom hay hum sa ma ka por tuwamna, hay cita-ɓalam ta ŋolda ta jufta, hay cita-selem ta ŋolda ta jufta kaw. 15Mul-ma-ɗifinna ma sli gasas ta mula, nam ɦokom hay way-ɓam san ta gulda. 16Mul-ma-ɗifinna ma jo cita-ɓalam ma jufna gaa hay mula ma ka hay way-ɓam san ta gulda, nam ma yam mul namna goy sem siɗiya vok ir Ma-Vatɗina. 17Dir mul ma hin hay ɓam sana mul-ma-ɗifinna as tunum hay hum sa namna ma ka por tuwamna, tunum hay cita-ɓalam ta ŋolda, hiɗi cita-selem ta ŋolda, kayn hiɗi busuwna vi ɦu ma lum ɗifin kay sulukŋa. 18Mul ma hin hay ɓalam ne'na mul-ma-ɗifinna as jomti kulo kalamu: Mul-ma-ɗifinna ma li ɗifin ma poora kalamu vok Ma-Vatɗina. 19Bugol kayni mul-ma-ɗifinna ma li poora, nam ma li poora kay sa namna ma ka muz tuwam goyo kay liwis ma talamna. 20Bugol kayni nam ma ŋat ɦu ma ŋalam goyna, mul-ma-ɗifinna ma ŋalam kulo kay giwin-ma-ɗifinna, hiɗi ɗifin ma vulda, nam ma li poora kay san kayni, nala nam ma muɗ goy peldete.

21La nam hawi, slena valam kiɗaya, nam as vi goor ɦu-dimi kep ɦawa, nam ma vum kulo'o, muɗum galam kafe, bugol kayni nam ma li poora hiɗi namu, nam ma sli gal ma doogona vi futuw ma hiliɓi hiɗi mula, kay li vulda hiɗi namu, sli mula ir gasas kep may. 22Nam as yaw guk ma' lebo gukguli ma joriyon ma' kaw, kuɗ asta valamu, kep kay ɗifin ma poora, kep kay ɗifin ma ŋal-goyna. 23Hay buurta glafandita, sle namna can kaf nam maram mi mul-ma-ɗifinna goy vun guɗuk ma fi-tuwna vok ir Ma-Vatɗina kay por tuwamu. 24Mul-ma-ɗifinna ma vi goor ɦu-dimina ma li ɗifin ma kay sulukŋa, sli mul ma hay gasasna; nam ma geɗem kulo'o vok Ma-Vatɗina. 25Nam ma ŋat goor ɦu-dimina ma li ɗifin ma kay sulukŋa, nam ma yaw busuwna vi goor ɦu-dimina ma ŋatam kay ɗifin ma kay sulukŋa; sa ma ka por tuwamna nam ma tun busuwn hay humam ta jufta, hay cita-ɓalam ta jufta, hay cita-selem ta jufta kaw. 26Mul-ma-ɗifinna ma ɦok mula hay way-ɓam san ta gulda. 27Mul ma hay way-ɓam san ta gulda mul-ma-ɗifinna ma yamam goy sem siɗiya vok ir Ma-Vatɗina. 28Mul ma ka hay ɓalamna mul-ma-ɗifinna ma jomti hay humamu, jomti kay cita-ɓalam ŋol ta jufta, kay cita-selem ŋol ta jufta hay baŋal liyn ma nam tun busuwna vi ɦu ma lum ɗifin kay sulukŋa. 29Dir mul ma hin goy way-ɓalamna mul-ma-ɗifinna ma jomti kulo kay yalamu, kay li poora kalamu vok ir Ma-Vatɗina. 30Bugol kayni nam ma li ɗifini hiɗi gukka ta kepta hiɗi gukguli ma kepna ma nam fumina, 31kep kay ɗifin ma poora, kep kay ɗifin ma ŋal-goyna, hiɗi ɗifin ma nam vulumna. Nala mul-ma-ɗifinna ma li poora kay sa namna vok ir Ma-Vatɗina.

32Kayni ti gatta ta vuliya kay poora vi sa ma moy kuturun talamu ma slena valam kiɗayna.

Moy-kuturu ma tam ziyna

33Ma-Vatɗina di tam Musus hiɗi Aaron ala: 34Hay li ma nigi ma co hay nagata Kanaan ta nan min vulgit ɗawni; la nan tun moyna vi kuturunawa tam ziya vi sa'a hay naga na'ta, 35sa ma mul ziy namna ma tuɗ di kayni tam mul-ma-ɗifinna, nam ma dum ala: nan ɗuw ki mil ka tam ziyna vanu nala. 36Jew a mul-ma-ɗifinna kal kalafi kay sar ziyda, nam ma vul hagata kay yaw sle ma hay ziyd goyo, kay slen ma hay ziyd kaf ma muɗ liwisɗi. Bugol kayni, mul-ma-ɗifinna ma kal kalafi kay sar ziyda,

37mul-ma-ɗifinna ma sar milla goy ŋaa'a, la nam ɗuw kulo tam ziyd kayni, la liy hen ka kalaf beɗe, hen goɗiya, hen cori slawi, jugoɗi kalaf tam ziyd zul lay ni, 38nam ma kalay goy hay ziyda, hay li ma nam coowa hay vun-ziyda, nam ma duk vun-ziyd ir buur siɗiya. 39Hay buurta siɗiyata mul-ma-ɗifinna ma hot sara'a. La nam ɗuw kayni milla ka meri goy tam tuw ziyda, 40hiɗiy ma mil talamna nam ma vul hagata kay yawam goyo, cukum goy gine hiɗi hoyok-ziyna, goy hay liyn ma liwisi. 41Nam ma tok hay ziyd goy noŋ kafe, butuw ma tokom goyna ma kom goy gine hiɗi hoyok-ziyna, hay liyn ma liwisi. 42Nisi ma yaw hiɗiy mara'a, lakam baŋal ma jewna, yaw naga mara'a kay kor tuw ziyn hiɗi namu.

43Bugol yaw-goyta vi hiɗiyna, tok-goyna hiɗi koora vi hay-ziyda, la milla hotay hay ziyd lo, 44mul-ma-ɗifinna ma hota, la nam fi ala milla ka meri goy tam ziyda, kayn mi moy-kuturuna ma ka musi kuɗ ɗuŋus-ziyd ta-ta, na' liwisi. 45Ziy na'ta ma to' gaa'a, hiɗiyna, guna, naga ma hay ziyd kaf, sle namna ma naram goy gine hiɗi hoyok-ziyna, hay liy ma liwisi.

46Ziy na'ta hay li ma vuna' dukin kayni, sa ma kalawa haya'na, nam muɗi liwisi ta-ta hay vulatita. 47Sa ma burawa hay ziy na'tana, ma muz sligara valam goyo, sa ma ti-fuwawa hay ziy na'tana, ma muz sligara valam goyo.

48Hay li ma mul-ma-ɗifinna hot hay ziyd ɗawni, la nam fi ala bugol koora vi tuw ziyda, milla may jor goy ta'ɗi, ziy na'ta nam muɗa' bay-liwisi, kay mil ma ta'na vatiya. 49Kay por ziy na'ta kayni, nam ma yaw layayn ma', yaw gu-gamna, sligar ma slawna hiɗi hisopna. 50Lay ma kepna nam ma ŋatam kulo kay doway ma nagana ma niy ma kilir ka hayamna. 51Nam ma sli gu-gamna hisopna, yaw sligar-slawna hiɗi lay ma irina, jiyobom gaa hay busuwna vi lay ma ma nam ŋatam gaa hay niy ma kilira, nam yamam goy kay ziyn sem siɗiya. 52Nam ma por hay ziyd goyo hiɗi busuw layna, hiɗi niy ma kilira, hiɗi lay ma irina, hiɗi gu-gamna, hiɗi hisopna, hiɗi sligar ma slawna. 53Lay ma irina nam ma gum iram goy fulu, goy gine hiɗi hoyok-ziyna. Ki kayn nala nam ma li poora kay ziy namna, nala ziy namna ma hin hay liwista loɗi.

54Kayni ti gatta ta vuli kay moyna vi kuturun noŋ kaf, kay moy vulyuwn lay. 55Kay moy-kuturuna vi sligara hiɗi ziyna 56kay tuw ma gi goy milla, kay bihiriwna, kay tuw ma holla: 57Gat na'ta hat kay sle ma liwisna, kay sle ma bay-liwisna kaw. Kayni ti gatta kay moy-kuturuna.

Currently Selected:

SA LEVITNA 14: Massana

Highlight

Copy

Compare