SA LEVITNA 13

Gatta kay lawta vi moy-kuturuna

1Ma-Vatɗina di tam Musus hiɗi Aaron ala: 2Hay li ma mil gi sana lebo tuwam cuk bihiriwi lebo burayka-buray ka talamu, la mil namna ma hay tuwamna sli moy-kuturun nala, ma naram tam mul-ma-ɗifinna Aaron, lebo naram tam sa kep jar gurona valamu muliyan-sa-ɗifinna. 3Mul-ma-ɗifinna ma sar mil ma talamna goy ŋaa'a. La ɗuŋus ma tam milla muɗi haɓi, la mil ma talamna vunam kalay gaa zulu, kayn mi moy-kuturuna mul-ma-ɗifinna ma sar moy namna as gi ir san kayni kuɗ sa liwisna. 4la vun liy namna ɓoy haɓ ɦawa, may kalay gaa zul kuɗ sliwamɗi, la ŋus ma kay milla may muɗi haɓɗi kaw, mul-ma-ɗifinna as duk vun sa namna kalafi ir buur siɗiya. 5Hay buurta siɗiyata mul-ma-ɗifinna as sar sa namna goy ŋaa'a lo. La mil namna may ɦur vokom ŋolɗi, la biya goy talamɗi kaw, mul-ma-ɗifinna as dukum vunam kalaf sem mara kep lo ir buur siɗiya. 6Sem ma ma'na lo mul-ma-ɗifinna as saram goy ŋaa'a. La milla vunam hiyamiya, may giy goy tam tuwam kafɗi, mul-ma-ɗifinna as gum iram kuɗ sa liwisna loɗi, kay kayni mi bihiriwi; nam ma muz sligara valam goyo, nam muɗi bay-liwisi. 7May la bugol ɗekŋa vi tuwamu hiɗi muɗna valam goy bay-liwisna lo, moy namna hotiyawa, jaŋawa goy kuɗ ŋusam kafe ni, nam ma hot tam mul-ma-ɗifinna, kay nam ma saram sem mara kep lo. 8Mul-ma-ɗifinna ma saram goy ŋaa'a, la bihiriwn jaŋay goy kuɗ ŋusamu, mul-ma-ɗifinna ma gum iram kuɗ sa liwisna, kayn mi moy-kuturuna. 9Hay li ma moy kuturun coowa tam sana, ma naram tam mul-ma-ɗifinna. 10Mul-ma-ɗifinna ma saram goy ŋaa'a. La mil ma talamna vunam haɓi, la mil namna muɗ ɗuŋus ma talamnawa haɓi, la liy namna soy ŋuroŋo, 11Kayni mi moy-kuturuna ma musi kuɗ ŋus sa namna ta-ta, mul-ma-ɗifinna as kay gum iram jar sa liwisna, nam as dukum kalaf loɗi, kay nam liwisi. 12La moy-kuturun dus goy kuɗ ŋusam kaf, la ŋuy tuw sa namna kafe, tun caw kulo kalamu ta-ta gaa selemu, hay liyn kaf mul-ma-ɗifinna ma cuk iramu, nam ma saram goy ŋaa'a, 13hay li ma nam waawa ala moy-kuturun ka meri goy kuɗ ɗuŋusam noŋ kafe, mul-ma-ɗifinna as gum iram jar sa bay-liwisna, kay tuwam kaf ɓoy goy haɓi, nala nam may liwis loɗi. 14May hay buur ma naŋ wum tuwam soy ŋuroŋo, nam muɗi liwisi, tuwam ma soy ŋuroŋ kayni liwisi, kayn mi moy-kuturuna. 15Hay li ma mul-ma-ɗifinna wum tuwamawa soy ŋuroŋo, nam ma gum iram kuɗ sa liwisna, tuwam ma soy ŋuroŋ kayn mi moy-kuturuna. 16La tuwam ma soy ŋuroŋ kayn vunam ɓo haɓi, nam ma tuɗ tam mul-ma-ɗifinna; 17mul-ma-ɗifinna ma saram goy ŋaa'a, la vun milla ɓoy haɓi, mul-ma-ɗifinna as gum iram kuɗ sa bay-liwisna.

18Hay li ma guɗoŋ gi sanawa, may bugolda nam citawa, 19may bugolda lo, la hay baŋal guɗoŋ namna, mil mara gi goy hiɗi vunam haɓi, lebo guro-guro hayamu, san kayni ma ɗek tuwam kir mul-ma-ɗifinna. 20Mul-ma-ɗifinna ma saram goy ŋaa'a, la mil namna vunam jugoɗ gaa zulu, la ɗuŋusam muɗ haɓi, mul-ma-ɗifinna ma gum iram kuɗ sa liwisna: Kay kalay goy hay baŋal guɗoŋ kayni mi mulla vi moy-kuturuna. 21La mul-ma-ɗifinna ɗuw na kayni, ɗuŋus ma haɓ may hay vun millaɗi, la milla may jugoɗay gaa zulɗi kaw, la vun milla tun caw so'o, sa namna nam dukum vunam kalafi ir buur siɗiya. 22La bugol kayni milla biya goy kuɗ ɗuŋusamu, mul-ma-ɗifinna ma gum iram kuɗ sa liwisna: Kay kayni mi moy-kuturuna. 23La milla hin kayn hay liy namna, may dus goyɗi, kayni mi baŋal ɦuɗukŋa vi guɗoŋŋa, mul-ma-ɗifinna ma gum iram kuɗ sa bay-liwisna.

24Hay li ma san ka hiɗi ɦuɗukŋa vi kun talamu, la vun huɗuk namna hot gi goy mili, vunam hol goy haɓi, lebo la guro-guro ka hayamu, mul-ma-ɗifinna ma ɗuwum goy ŋaa'a. 25La hay vun liy namna ma holina, ɗuŋusn muɗ haɓi, la nam kal gaa kuɗ ɗuŋusam zulu, kayn di ala kalay goy hay ɦuɗukŋa vi kun kayn mi moy-kuturuna, san kayni mul-ma-ɗifinna as gum iram kuɗ sa liwisna, kay kayni mi moy-kuturuna. 26Hay li ma mul-ma-ɗifinna saram na kayni, la ɗuŋus ma haɓ may kay vun liy ma holi goynɗi, la vun milla may jugoɗay gaa zulɗi, la vun liy namna ɦiyamiya ni, sa namna nam as dukum kalaf ir buur siɗiya. 27Hay buurta siɗiyata mul-ma-ɗifinna as saramu, la tuwam kaf holi goyo, mul-ma-ɗifinna as gum iram kuɗ sa liwisna, kay kayni mi moy-kuturuna. 28May la tuwam ma hol goyna hin kayn hay liy kep ɦawa'a, may mer goy hay liyn kafɗi, la vun liy namna tun caw ɦiyama kaw, kayni mi baŋal liy ma kun ŋalamna, mul-ma-ɗifinna as gum iram kuɗ sa bay liwisna.

29Hay li ma mil gi sa'a, la sa jufu lebo ca'a kaw, la mil gum kulo kalamu lebo kuɗ dumamu, 30mul-ma-ɗifinna ma sar milla goy ŋaa'a, la mil namna jugoɗ gaa kuɗ ɗuŋusam zulu, la ɗuŋusam tun caw muɗ slaw ɦoyoŋ', tun caw yir kaw, mul-ma-ɗifinna ma gi ir san kayn kuɗ sa liwisna, kay kayni mi vulyuwna, mi moy-kuturuna vi yam-sana lebo dum-sana. 31Hay li ma mul-ma-ɗifinna saram na kayni, la vulyuwn may jugoɗay gaa kuɗ sliwam zulɗi, la ɗuŋus ma slaw ɦoyoŋ' mayɗi kaw, san namna ma vulyuwn cuki kalamna kayni nam ma dukum vunam kalafi ir buur siɗiya. 32Mul-ma-ɗifinna ma sar milla hay buurta siɗiyata, la vulyuwn may mer goy kuɗ ɗuŋusamɗi, la ɗuŋus ma slaw ɦoyoŋ' mayɗi kaw, la milla jugoɗ gaa kuɗ sliwam zulɗi kaw, 33sa namna ma vulyuwn cuki kalamna ma wel yalam goyo, may liy ma vulyuwn cuki hayamna nam as welem goyɗi, mul-ma-ɗifinna ma dukum kalafi ir buur mara siɗiya lo, 34hay buurta siɗiyata mul-ma-ɗifinna ma sar vulyuwna, la vulyuwn biya goy kuɗ yalamɗi, la vulyuwn may jugoɗ gaa kuɗ sliwam zulɗi, mul-ma-ɗifinna as gum iram kuɗ sa bay-liwisna, nam ma muz sligara valam goyo, nala nam muɗi goy bay-liwisi. 35May la vulyuwn merawa goy kuɗ ɗuŋusamu bugol muɗ ma mul-ma-ɗifinna muɗum goy bay-liwisna, mul-ma-ɗifinna ma hot saram lo. 36May la vulyuwn merawa goy kuɗ ɗuŋusamu, mul-ma-ɗifinna mak tuwam kay sar ɗuŋus ma slaw-hoyoŋŋa loɗi. San kayn liwisi. 37La vulyuwn may mer goy kuɗ ɗuŋusamɗi, la ɗuŋus ma wura dayawa hay baŋalamu, moy vulyuwn muɗi goy ŋaa'a, nam may liwis loɗi, mul-ma-ɗifinna gum iram kuɗ sa bay-liwisna.

38La sa jufu lebo ca'a kaw, tuwam holawa goyo, la holi goy hiɗi vunam haɓi ni, 39mul-ma-ɗifinna ma saramu, la tuwam ma holin kayni vunam ir haɓi, hot ɦiyama ni, tuwam hol goy kayn holi hawa'a. Nam may liwis loɗi.

40La ɗuŋus ma kay yam san yak goyo ni, kayn mi sa ma yalam vaniya, nam may liwisɗi. 41La yak goy kayn mi ɗuŋus ma vokomna ni, kayn mi sa ma vokom vaniya, nam may liwisɗi. 42May vun liy ma kuloti goy vanayn kayni, la goy vokomu lebo goy jakamu kaw, la mil ma vunam guro-guro ka hayamu ni, giy goy hayam mil kayn mi moy-kuturuna. 43Mul-ma-ɗifinna ma saram goy ŋaa'a. La milla ka hiɗi vunam giy goyo, hiɗi guro-guron hayamu, la goy vokomu, la goy jakamu kaw, la nam sli moy-kuturu ma kuɗ ɗuŋus san nala ni, 44kayn mi sa ma moy kuturu'u, san kayni liwisi, mul-ma-ɗifinna as gum iram kuɗ sa liwisna, kay milla valam kayni kulo kay yalamu.

45Sa namna ma moy-kuturun talamna ma cuk sligar jetayn talamu, kusuɓ yalam loɗi, nam ma kusuɓ dumamu, ma siwel ala: Liwisi! Liwisi! 46Hay li ma mil kayni ka talam tuwana, nam dok-dok liwisi, nam ma mus goy valam kepe, liyn ma musta valam may gaa hay gurunɗi.

Moy-kuturuna vi sligara

47Hay li ma moy-kuturun tunawa tam sligara, la mi sligar ma koti hiɗi bak-mirisna lebo hiɗi barawi kaw, 48la mi sligar ma vun tuwam fiyoko lebo mi sligar ma cuku kaw, ma koti hiɗi bak mirisna lebo barawna, la cuk tam ɗigiyna lebo va ma koti hiɗi ɗigiyna, 49Mil namna, la nam tun tam sligari, lebo tam ɗigiyna, tam sligar ma vun tuwam fiyokŋa lebo sligar ma cukŋa lebo la tam va ma koti hiɗi ɗigiyna, la vun mil namna goɗa lebo cor slawi, kayn mi milla vi moy-kuturuna, tuɗ ɗekem kir mul-ma-ɗifinna. 50Mul-ma-ɗifinna ma sar mil namna goy ŋaa'a, va namna ma mil cuki talamna nam ma dukum kalafi ir buur siɗiya. 51Hay buurta siɗiyata nam ma sar mil namna. La mil namna mer goy tam sligara, tam sligar ma vun tuwam fiyokŋa, sligar ma cukŋa, ɗigiyna, lebo va ma koti hiɗi ɗigiyna, kayn mi milla vi moy-kuturu ma musi kuɗ ɗuŋus va namna ta-tana, va namna liwisi. 52Nam ma ŋal sligar namna goyo, la mi sligar ma vun tuwam fiyokŋa, la mi sligar ma cukŋa ma koti hiɗi bak-mirisna lebo hiɗi barawna, la mi va ma koti hiɗi ɗigiyna kaw, la mil ka talamu, kayn mi mil ma musi kuɗ ɗuŋusam ta-ta, nam ma ŋalam goyo. 53May la mul-ma-ɗifinna sar kayni, sligara, sligar ma fiyokŋa lebo sligar ma cukŋa, lebo va ma koti hiɗi bakŋa kaw la milla may mer goy talamɗi, 54nam ma vul hagata kay muz va namna goyo, nam hot dukum vunam kalaf sem mara kep lo ir buur siɗiya. 55Mul-ma-ɗifinna ma sar milla lo bugol muzta-goyta vi sligara, la milla muɗ va maraɗi, mer goyɗi kaw, van kayni liwisi; ma ŋalam goy hay kuta, kay galam hena lebo ŋoromu kaw muti goyo. 56La bugol muzta vi sligar namna, la vun mil ma tam sligar namna tun caw so goyo, va namna ma tuni tam ɗigiyna, tam sligar ma vun tuwam fiyokŋa lebo sligar ma cukŋa, nam as ɦirikim goyo. 57La nam hoti lo tam sligara, tam sligar ma vun tuwam fiyokŋa, lebo tam va ma koti hiɗi ɗigiyna, kayn di ala vul tuwam goy kayn mi moy-kuturuna, va namna ma mil talamna kayni ma ŋalam goyo.

58la mi sligara, sligar ma vun tuwam fiyokŋa, sligar ma cukŋa, la mi va ma koti hiɗi ɗigiya kaw, la nam goy muziya, may mil ma talamna vatawa goyo, ma muzum goy sem mara kep lo, nam may liwis loɗi.

59Kayni ti gatta kay milla vi moy-kuturuna, hay li ma moy namna cuk tam sligar ma koti hiɗi mirisna lebo hiɗi barawna kaw, sligar ma vun tuwam fiyokŋa lebo sligar ma cukŋa, lebo va ma koti hiɗi bakŋa, kayn ti gatta kay muɗum goy peldete lebo liwisi.

Currently Selected:

SA LEVITNA 13: Massana

Highlight

Copy

Compare