YEREMIYAS 49
49
Di vun-jobta kat sa Amonna
1Law kat gurona vi Amon.
Ki kayn nala Ma-Vatɗina di'e:
Sum sa Israyella goor visi may noŋɗi su?
Sa ma yaw vocota visi may noŋɗi su?
Malkom ŋom nagat Gad kay mige?
Sumuna visiya lak hay nagata vi sa Israyella kay mige?
2Kay na'ta humgiya, buura ka co'o,
Din mi Ma-Vatɗina,
mi buura ma nan ma ci ɗuwulta vi duura
kat nagat Rabbat vi gurona vi Amon;
na' ma muɗ mi yam-jono ma toy gaana,
hoyok-ziy ma kuɗa'na kut ma ŋalam goyo;
hay na'ta sum sa Israyella ma digiɗ sum sa digiɗsi jewna,
Din mi Ma-Vatɗina.
3Mungi tiyna, nigi sum sa hay Hesbon,
kay Ay vurumiya, cigi ɗuwulla,
guro-boyna vi Rabba,
cukgi sligar-bolla tigiya,
yorgi tuwgiya,
jaŋgi kuɗ fiyokka vi gulmunna hay galam kafe.
Kay Malkom ka kal goy gorvo'o,
hiɗi muliyan-sa-ɗifinna hiɗi sa ŋulona valam kaf.
4Nak subur tuwag kay lokŋa vagu kay mige?
Lokŋa vagu ka hiɗak goyo,
goota ta ŋel gatta,
naku ta tun vida vagu kay farayna vagu:
ala sa ma co duranu mi gige?
5Humagu, nan min hin narta co kagu,
din mi Bum-Sumuna,
Ma-Vatɗina vi vok-ma-duura,
narta ma co hay gal kafe,
san jargi gigekaw ma pir jaŋ vokom ɗiger,
sa as jaŋ kuɗ niram loɗi.
6May bugol slen kayni,
sa gorvona vi gurona vi Amon nan ma hotsiyaya,
Din mi Ma-Vatɗina.
Vun-jobta kat Edom
7Law kat Edom.
Ma-Vatɗina vi vok-ma-duura di'e:
Yalda may hay Teman loɗi su?
Ɗek-yalla vi sum sa yalla vatawa goyo su?
Yalda visiya sehawa goyo su?
8Pirgi jaŋi, muɗgi ŋorgiya,
ŋaygi goy hay zul-hiɗiyna,
nigi sum sa hay Dedan,
kay nan hin joota co kay jafna vi Esaw,
liyn ma kitata visiya.
9Hay li ma sum sa ja gulda-guldan coowa hay sinena visiya,
nisi as hin wal gulda-gulda su?
La sum sa kulla coowa hay henjeta,
sle ma nisi as kalamna nisi as tum ɓuraŋi.
10May nanu, nan ma fok Esaw goy nala'a,
nan ma fi liyn ma nam ŋayay hayna,
nam as a ŋay tuwam loɗi;
gurona valamu,
ɓosiyomna hiɗi sum sa goy galamna ma mit goyo,
namu sa as fum loɗi.
11Hingi sa gorvona vigiya,
nan ma hinsi lak iriya,
hin boy sa duhulla vigiya tun vida visi hayanu.
12Kay Ma-Vatɗina ka di ala:
Humgiya, nisi sa as ci kaway-ma-cinaɗina nisi ma cumu;
may nigiya, nigi as hin goy bay kitata su?
Nigi as hin goy bay kitatɗi,
nigi kaw ma cumu.
13Kay nan yi va kanu hiɗi semda vanu,
Din mi Ma-Vatɗina.
Bosra ma hin goy hiweŋ',
ma muɗ zulo'o,
ma to gaa'a, ma fi be'da kaw,
hoyok-ziy ma gala'na kaf ma ɓulak goyo ta-ta dok-doko.
14Nan hum labara ay goy vi Ma-Vatɗina pa,
sa ma sunda giyay jar sumuna:
tokgi tuwgiya, tuɗgi dura'a,
fokgi kulo kay tuɗ li duura.
15Kay humaŋu, nan ma muɗaŋ gooro jar jaf-sumuna,
fiy panta jar sum sa jufayna.
16Niŋata vaŋu,
subur-tuwta vi dikaŋu viyaŋawa goyo,
naŋ ma li ziy jar hulukŋa vi hiɗiyna,
ma sli yam liyn ma kulo ɗiŋiriŋŋa,
la naŋ tun dokosayna vaŋ kulo jami
ki dokosayna vi bakŋa kaw,
nan ma zutaŋ gaa'a,
Din mi Ma-Vatɗina.
17Edom ma hin goy ɦawa hiweŋ',
nisi kaf sa jik goboy hiɗi na'na,
ma li ɦuyum, ma feɗ kuy-kuy' kay bakmara ma fa'na.
18Ki Sodoma hiɗi Gomora
hiɗi hoyok-ziy ma ŋuyi ta'na ma ɦo gaana nala,
sa as mus hay Edom loɗi,
Edom ma muɗ mi liyn ma musta vi sa loɗi,
Din mi Ma-Vatɗina.
19Hay deŋel niy-lumna Yordan ma de kulona pa,
nam ka jik kulo'o kat ziyna ma donona ki zlona nala,
nan ma digiɗ Edom koloyo,
sa ma nan vilekemna nan ma tunum ka'a,
kay sa ma ŋray hiɗi nan mi gige?
Sa ma as ɗekan hagata mi gige?
Mulla ma as col diganu mi gige?
20Kuɗ kayni humgi slen ma Ma-Vatɗina min lum kat Edom,
slen ma nan colom col' kay lum tam sum sa hay Teman.
Gasiya, sumun ma sabsi ki fok-dimi ma maŋayn nala,
gasiya, sumun ma vurum ziyna visiya.
21Hay suwana vi ni-gaata visiya nagat geɗa,
ciriyna visi humis ta-ta hay niy-lum ma slawna.
22Nam ka tuɗ vokomu ki bakŋa nala,
nam fok kulo'o,
nam meɗ gilaŋatam goyo kay Bosra,
dikga vi sum sa donona vi Edom hay buur namna
muɗi ki dikga vi cata ta ka puka nala.
Di vun-jobta kat Damas
23Law kay Damas.
Hamat hiɗi Arpad tiwiniya,
kay nisi hum labar ma joonawa,
tuwsi ka visi bat-bat';
nisiya mi niy-lumna ma gi pesle,
ma tun gaaɗi.
24Damas ka geɗa,
na' ka muɗa kay pir jaŋi,
narta bowo'awa;
yorta hiɗi tuw-tita fa'awa ki cata ta ka puka nala.
25Haha! Nam may noyay goyɗi,
hoyok-ziyn ma gajijita,
hoyok-ziyn ma vulan firita.
26Kay na'ta sum sa joriyona visiya ma cuk gaa hay hagana,
sumuna visi sa wi duur kaf ma mit goyo hay buur namna ɗawni,
din mi Ma-Vatɗina vi vok-ma-duura.
27Nan ma tun kut gulmunna vi Damas,
kut ma ŋal ziy ma mulda vi Ben-Hadad.
Di vun-jobta kat Kedar
28Law kat Kedar hiɗi muliyana vi Hatsor,
sa Nebukadnesar mulla vi Babilon kol kisiya.
Ki kayn nala Ma-Vatɗina di'e:
Yawgi kulo'o, tuɗgi durgi Kedar,
cigi gurona vi nagata gal kuɗuwta goyo.
29Sumun ma yaw guɗukŋa visiya hiɗi farayna visiya,
sumun ma pat balakŋa visi kulo'o,
farayna visiya hiɗi lamgana visi kaf,
sumun ma pat ciriy ma li san ɦuyumna kisiya hay liyn kaf.
30Pirgi jaŋi, pirgi jaŋi hiɗi donota vigi kaf,
gargi liy ma ŋayna goy gal tuɗoŋo,
nigi sum sa hay Hatsor,
kay Nebukadnesar mulla vi Babilon col lawta valamawa kigiya,
nam min li va katgiya,
Din mi Ma-Vatɗina.
31Yawgi kulo'o,
tuɗgi durgi sum sa lakay ŋal kiliŋ lakŋa,
sa lakay hay sle'ta hay ziyna visiya,
cokorom may vun ziyna visiɗi,
malla mayɗi kaw,
nisi lakay goy kay tuwsiya,
Din mi Ma-Vatɗina.
32Lamgana visiya sumun ma vurumumu,
farayna visi ma gu' gu'na sumun ma tum ɓuraŋi;
nan ma mersi goy jar simeɗn kafe,
nisi sa wel gal-jiwersi goyo,
nan ma mar ɓulakka kisi hay galsi kafe,
Din mi Ma-Vatɗina.
33Hatsor ma muɗ mi zul-cekemna,
ma muɗ mi fulu kay dok-doko;
sa as mus hayam loɗi,
sa as li ziy ɗawni loɗi.
Di vun-jobta kat Elam
34Ma-Vatɗina di yoboyn tam Yeremiyas ma jobta kay Elam,
hay tun cawta vi mulda vi Sedekiyas mulla vi Yuda.
Ma-Vatɗina dum ala:
35Ma-Vatɗina vi vok-ma-duura ka di ala:
Humgiya, diŋ-diŋ ɓarawta vi Elam
ta vula' donot ŋolta nan ma kusa' goyo,
36simeɗ ma biwn fiɗi hay gef-nagat fiɗi pete
nan ma hinim co kay Elam,
nan ma mersi goyo jar simeɗn kaf,
naga tara ma hin goy bay sum sa pir goy hay Elam pana
co haya'ɗi tayɗi.
37Nan ma geɗ sum sa Elamna vok sa gawt kisina,
vok sum sa min irita visiya kaw,
nan ma hin joota co kisiya,
ɦiyda vanu ta ŋolda,
Din mi Ma-Vatɗina.
Nan ma gi kew-gaferaŋa bugolsiya,
ta-ta nan ma vatsi goy kafe.
38Nan ma tun zlamda-mulda vanu hay Elam,
muliyana hiɗi sa ŋulona nan ma cisi goyo,
Din mi Ma-Vatɗina.
39May hay liy ma vok ɗawna,
sa gorvona vi Elam nan ma hotsiyaya,
Din mi Ma-Vatɗina.
Currently Selected:
YEREMIYAS 49: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
