YEREMIYAS 48
48
Vun-jobta kay sa Mowabna
Es 15; 16
1Vun-jobta kay Mowab,
Ki kayn nala, Ma-Vatɗina vi vok-ma-duura
Lawna vi Israyel ka di'e:
joot kay Nebo, kay na' tiy ɓuraŋi,
Kiryatayim muɗi zulo'o,
nisi sla'awa; Misgab muɗi zulo'o,
kay na' kusi goyo.
2Gajijita vi Mowab tay loɗi;
hay Hesbon nisi ka var kay ɓulakka va'a:
Tuɗaya, nay ma vata' goyo jar jaf-sumuna,
naku Madmen kaw, nak ma to gaa'a;
kew-gaferaŋa ka tuɗ bugolagu.
3Tiyn ka may hay Koronayim pa;
kayni mi ɓuraŋŋa;
kayn ti yorta ŋolda.
4Mowab toy goyo,
gurosgurayna ka tiya.
5Kay sumun ka tiya hay liy ma jik kulona vi Lukit,
tiy ma yorta ka tiya hay liy ma jik gaana vi Koronayim.
6Pirgi jaŋi, suɗgi irita vigiya,
nigi ma li ki gu ma noyay goy hay fulda nala.
7Kay kuɗ ta ala nak tun vida vagu
kay lopna vagu hiɗi farayna vagu,
nak kaw, nisi ma slagu,
Kemos kaw ma tuɗ goy gorvo'o,
hiɗi muliyan-sa-ɗifinna valamu,
hiɗi sa ŋulona valamu.
8Sa ma ti ɓuraŋŋa ma kal kulo hay hoyok-ziyn kaf,
hoyok-ziy kep kaw as hulot goyɗi;
liy ma lokŋa ma vat goyo,
liy ma beɗna ma ɦo gaa'a,
ki Ma-Vatɗina di nala.
9Vulgi zlimitna mi Mowab,
hina' fok kulo'o,
hoyok-ziyna visiya ma muɗ goy mi ful ma wiŋŋa,
nisi ma fi sum sa ziyna loɗi.
10Be'da kay sa ma li lopna vi Ma-Vatɗina hiɗi wasta,
be'da kay sa ma min ala kew-gaferaŋa valam jaŋ busuw goyɗina.
11Mowab ay tuni ŋal kiliŋ hay joriyota va' pa,
ɦirɗiyna va' tuni gaa ŋal kiliŋ,
ɦirdiy ma kuɗ dowayta va'na may ɦiwiri kuloɗi,
na' may tuɗ goy gorvoɗi,
nala jibetta va' ay hini ta'a,
hista va' kaw may mu'ɗi.
12Kuɗ na'ta Ma-Vatɗin di'e:
humgiya, buura ka co'o,
mi buura ma nan ma cuk sum sara'a,
kay muɗ niy ma hay dowayta visi goyo,
nan ma ɦok niy ma hay dowayta visi goyo,
nan ma to dowayna visi goyo,
13Sum sa Mowabna tuwsi ma li nari kay Kemos,
ki jafna vi Israyel tuwsi li zulo'o kay Betel,
sa vida visi ay tuni kisina nala.
14Nigi as di ala numa si sum sa donona,
soje sa tuwsi koti kay duura,
nigi as di nala nanige?
15Mowab vurumiya,
hoyok-ziyna va' ka pat kulo nuku,
sa donona jar sa joriyona va' kalay hay liyn ma ŋatna,
din mi mulla,
ma semda valam ala Ma-Vatɗina vi vok-ma-duura.
16Ɓulak-goyta vi Mowab ka goboy a co'o,
Joota ka co ka' koloy wit'.
17Gilagi yigi ta'a,
nigi kaf sa ŋuyi ta'a,
nigi kaf sa wi semda va'a, digi ala:
Zugul na'ta ta donota,
zugulda mulda na'ta kus goy kayn kustige?
18Jikagay gaa hay liyn ma musta vi gajijita pa,
musag hay nagata ta soy goyta,
nak goot-cata ta ziyna vag hay Dibon,
kay sa ma ɓulak liyna ka fok kulo kagu,
nam ka to gulmunna vag goyo.
19Colag hay hagata, ɗuwagu,
nak ta ziyna vag hay Arower,
jobag sum sa pir jaŋŋa, sa hin goyna,
jobsi ala li kayn mi mige?
20Mowab muɗi zulo'o,
kay na' toy goyo,
Yorgi tuwgiya, tiygi ŋolo kaw,
siwelgi kulo kay Arnon ala Mowab vurumiya.
21Kitata coowa kay naga ma hay beɗna,
kay Holon, kay Yahat, kay Mefaat,
22kay Dibon, kay Nebo,
kay Bet-Diblatayim,
23kay Kiryatayim, kay Bet-Gamul,
kay Bet-Mewon,
24kay Keriyot, kay Bosra,
kay hoyok-ziy ma hay nagata vi Mowab kaf,
ma ginena hiɗi ma goboyna kaf.
25Donota vi Mowab vatawa,
ɓa' kusawa goyo,
Din mi Ma-Vatɗina.
26Kay mige Mowab sli ya' kulo'o kat Ma-Vatɗina,
wulini nigi ma ɦoya' goyo, hiɗi dolayna,
hina' lugut gaa hay vinna va'a,
hina muɗ a sumun cen kuɗa'a.
27Nigi may cen kuɗ sa Israyella ɗisu?
Nigi gila yigi katsi kayni,
nigi fisi jar sa kulla hay fat tara su?
28Hingi hoyok-ziyn goyo,
lakgi jar hiɗiyna, nigi sum sa Mowabna,
muɗgi ki gukŋa nala,
ma li ziyna valam hay hulukŋa vi hiɗiyna.
29Numa wi subur-tuwta vi Mowab,
fiyokka va'a, ɦilayta va'a,
hiɗi dika' ma sli yam tuwam kulona.
30Ma-Vatɗina di'e:
Nan wi niŋata vi ɓakŋa visi ma waana,
hiɗi lopna visi ma goy waana.
31Kuɗ kayni nan ka yor tuwan kay Mowab,
nan ka yor tuwan kay sum sa Mowabna kafe.
Yorta ka'a kay sum sa hay Kir-Herez.
32Gu gulda-guldana vi Sibma,
nan ka tiy kagu suw Yayezer;
ɓag ma daɓay goyna kal ta-ta goy bugol niy-lum ma ŋolla,
nam daɓay ta-ta goy tam niy-lumna vi Yayezer,
may ma ɓulak liyna ɓulak vuɗna vagu,
hiɗi gulda-guldana vagawa.
33Firita hiɗi firita ŋolda vatawa goyo hay sinena,
hay nagata vi Mowab kaf kaw.
Vin ma hay doway-firina nan somawa goyo;
sa as kesl gulda-guldan hiɗi firita loɗi;
ka kayni mi ciriyna vi duura,
may mi ciriyna vi firit loɗi.
34Ciriyna ma hay Hesbon ka co ta-ta hay Eliyale,
della vi ciriyn ka co ta-ta hay Yahat,
fokay hay Sowar pa ta-ta hay Koronayim,
ta-ta hay Eglat-Selisiya;
kay niy ma hay Nimrim kaw hini goyo.
35Nan min vat hiɗi Mowab,
Din mi Ma-Vatɗina,
nan min vat hiɗi nam ma jik kulo kay hiɗiyn ma ɗiŋiriŋŋa,
namu ma li ɗifin-ma-no'osna tam lawayna valamu.
36Dikan ka tiy kay sum sa Mowabna ki zlekemda nala,
dikan ka tiy kay sum sa Kir-Heresna ki zlekemda nala,
kay faray ma nisi tokomna baawa goyo.
37Kay nisi kaf welay goyo,
kay jiwersi kaf kaay goyo,
kay ɓisi kaf ka ŋatay goyo,
bolla ka juni fursiya kaw.
38Kulo kay yam ziyna vi Mowab
hiɗi liyn ma lakka visi kaf kayni,
ka kayn mi do'olla tuta,
kay mige Mowab nan to'awa goyo
ki dowayta ta san mina' loɗita nala.
Dita vi Ma-Vatɗina
39Kay na' toy goyo,
nala nigi ma tiya'a.
Kay zulot muɗ ŋor Mowabawa,
Mowab muɗi kayni,
sum sa ŋuyi gala'na cen kuɗa'a,
li ɦuyum' ka'a kaw.
40Kay Ma-Vatɗina ka di ala:
Hinim fok kulo'o ki bakŋa nala,
hinim meɗ gilaŋatam goy kay Mowab.
41Keriyot sliya, gulmunna va' yawiya,
dikga vi sum sa donona vi Mowab hay buur na'ta
muɗi ki dik cata ta ka puka nala.
42Mowab cimiy goyo,
sum sa haya'na ma vat goyo,
kay na' fok kulo'o kat Ma-Vatɗina.
43Narta, zulla hiɗi jawta ka kigiya,
nigi sum sa hay Mowabna,
Din mi Ma-Vatɗina.
44Nam ma pir jaŋi vok narta ma nig gaa hay zulla,
nam ma jikay kulo'o hay zulla pana jawta ma vumu,
kay Mowab nan min hin busata va' ta kitata co ka'a.
45Sum sa pir jaŋŋa
lak kuɗ ŋus-guna vi Hesbon hiɗi sutaysi toya,
may kut kalay goy hay Hesbon pa,
kuta tilekka kalay goy hay way Sihon pa,
na' ŋal yam Mowab goyo,
na' ŋal jaf sum sa ɦawlana goyo.
46Joot kagu Mowab, sumuna vi Kemos baawa goyo,
kay guro-jufayna vagu kalay goy gorvo'o,
guro-boyna vag kaw kalay goy gorvo'o.
47May sa gorvona vi Mowab nan ma hotsiyaya
hay dabta vi liyna,
dita vi Ma-Vatɗina.
Kayni ti kitata ta ka kay Mowabta.
Currently Selected:
YEREMIYAS 48: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
