YEREMIYAS 50
50
Ni-gaata vi Babilon hiɗi butta goyta vi Israyel
1Ma-Vatɗina di yoboyna valamu kat Babilon,
kat nagata vi sa Kaldeena,
hay vun Yeremiyas ma jobta:
2Digi labara goy jar jaf-sumuna,
siwelgi labara, meɗgi bay-bayt kulo'o,
siwelgi labara, ŋaygi vaɗi.
Digi ala: Babilon sliya,
Bel ɦiwiriya, Merodak toy goyo.
Lawayn ma waana visiya toy goyo.
3Kay jaf-sum sara hay gal gaa pa co dursiya,
jaf-sum nisina ma muɗ yam nagata visi goy mi ful ma hiweŋŋa,
sa as li ziy haya' loɗi;
sumuna hiɗi farayna pir jaŋi, kala kaw.
4Hay buur namna,
hay liy namna ɗawni,
gurona vi Israyel hiɗi gurona vi Yuda
ma hotay kuɗ tuwsiya;
nisi ma tuɗ ɗawni hiɗi tiyn vunsi kay',
nisi ma gar Ma-Vatɗina Lawna visiya.
Din mi Ma-Vatɗina.
5Nisi ma vi labara kay hagata vi Siyon,
nisi ma muɗ irsi kira'a, nigiyaya,
jungi tuwgi tam Ma-Vatɗina,
hiɗi bonota vatɗita ta sa yalam as joka'ɗita.
6Sumuna vanu as ki farana vi fok-dimi ma bay-goyna nala;
sa ŋomda visiya viysi goyo,
ka tulursi kulo kay yam hiɗiyna;
nisi ka tuɗ jar hiɗiyna hiɗi liy ma jiŋiliŋŋa,
yisi jok gulina visiyawa.
7Sum sa fisin kaf vurumsiya,
sa gaw kisina di ala:
numa may li va ma joo noŋɗi,
kay nisi li suluk kat Ma-Vatɗina,
liyn ma musta vi ɗigerta,
kay nisi li suluk kat Ma-Vatɗina,
cubta-sle'ta vi sumaysiya.
8Pirgi goy hay Babilon pa,
kalgi goy hay nagata vi sa Kaldeen pa,
ligi ki fok-ŋekŋa tun vok farana vi fukunayna nala.
9Kay humgiya,
jaf-sum sa ŋolo dak-daki kaw sa gal gaa pana,
nan min foksi kulo'o kay Babilon;
nisi ma zlar goyo kay dur Babilon,
nisi ma sla'a;
ɓarawta visiya ki ɓarawta vi sa ma wi duur ŋolo nala,
na' hot ɦawaɗi.
10Sum sa Kaldeena vuli goyo vun vurumta;
sum sa vurumsin kaf haysi ma hoba.
Din mi Ma-Vatɗina.
11Awa, ligi firiya,
kalgi hay firita ŋolda,
nigi sa vurum vocota vanu,
awa, pirgi kulo'o ki put-gunayta jar hatna nala,
Ciriygi ki kulumay-ŋurman nala.
12Sugi tulurawa,
na'a ta vuɗgita cawawa hiɗi zulota;
humgiya, na'a ta vuɗgita ti ta cawta vi jaf-sumuna,
na'a ki fulda nala,
nagata ta soy goyo ta ya' hini goy pusɗaki.
13Kuɗ ɦiyda vi Ma-Vatɗina,
sa as li ziy hay Babilon loɗi,
na' ma hin ɗawn goy kay tuwa'a,
sumun kaf sa jik goboy hiɗi Babilon ma li ɦuyum',
nisi ma feɗ kuy-kuy' kuɗ bakmara ma fa' kafna.
14Zlargi goy kat Babilon kay dura'a,
nigi kaf sa dur ɓarawta.
Gigit hiɗi ɓarawta,
ŋaygi ɓarawt goyɗi.
Kay mige na' li sulukawa kat Ma-Vatɗina.
15Cigi ɗuwulla vi duura goy hay gala' kafe,
na' ka vi ɓa'ay goyo;
sem ziyna va'a ɦoy gaa'a;
gulmunna va'a ɦoy gaa'a.
Kay kayni mi job-yamda vi Ma-Vatɗina,
jobgi yigi kata'a,
nigi ma li ta'a ki na' li nala.
16Sa cuk jafna hay Babilon nigi ma vatsi goyo,
nisi sa li lop hiɗi hiramna hay liyna vi feɗna kaw.
Vok kew-gaferaŋa ma vat sumun goyna,
hin san gigekaw muɗ iram kir sumuna valamu,
hin san gigekaw pir hay nagata valamu.
17Sum sa Israyella ay ki ɦu-dimita ta viy-goyta,
ta zlon digiɗa' goyta nala;
mul ma Asiriyan vurumsi jewe;
may bugolda Nebukadnesar mulla vi Babilon kussi zoksiyawa.
18Kuɗ kayni Ma-Vatɗina vi vok-ma-duura
Lawna vi Israyel di'e:
Humgiya
nan min wat mulla vi Babilon hiɗi nagata valamu,
ki nan wat mulla vi Asiriya nala.
19Sum sa Israyella nan ma hotsiyay hay liy ma musta visiya;
nisi ma fi hatna kay hiɗiyt Karmel hiɗi Basan,
haysi ma hoba kulo kay hiɗiyta vi Efrayim hiɗi Galaad.
20Hay buur namna ɗawni,
hay liy namna ɗawni,
sumun ma gar jiw-zlata vi sa Israyella,
may na' ma li loɗi,
nisi ma gar sulukŋa vi jafna vi Yuda may nisi ma fum loɗi;
kay nan ma vul gida mi cawsi ma nan hinimna.
21Tuɗgi durgi nagata ta ŋel gatta sem ma',
durgi sum sa haya'na,
watsiya, digiɗsiya, cisi mati,
vatsi goyo kaw,
Din mi Ma-Vatɗina.
Ligi kuɗ dita van noŋ kafe.
22Ɗuwulta vi duura ka ci hay nagata,
ɓulak-goyta ka ŋolo.
23Heh! Martona ma kay nagat kuɗulu'na kusi goyo,
muni goyo.
Babilon ɓulakay goy jar jaf-sumun kafe.
24Nan gan jawt vokagu,
may nan vagawa haya'a, Babilon,
bay nak wi goy jewe,
nan coowa kagu, vagawa,
kay mige nak dur hiɗi Ma-Vatɗina.
25Ma-Vatɗina mal vun zul-bunukŋawa goyo,
nam yaw sle-ma-duura vi ɦiyda valamiyawa goyo,
kayni mi lopna vi Ma-Vatɗina,
lopna vi Bum-Sumuna Ma-Vatɗina vi vok-ma-duura
hay nagata vi sum sa Kaldeena.
26Cukgi kulo hay Babilon hay gal kafe,
malgi vun feera va' goyo,
molgi nagan yam tuwam ki wan hay muɗakŋa nala,
ɦogit gaa'a.
Hin va goy kuɗa' noŋɗi.
27Cigi luway-takalina va' goy kafe,
ŋatgit goyo, joot kisiya,
kay buura visi coowa,
liyn ma kitata visi coowa.
28Humgi ciriyna vi sa mun jaŋŋa,
ciriyna vi nisi sa pir jaŋi hay nagata vi Babilon,
kay kal hay Siyon vi labar job-yamna vi Ma-Vatɗina,
Lawna vaya, job-yamna vi Tempella valamu.
29Yigi sa dur ɓarawta ay kat Babilon,
nigi kaf sa wi duura vi ɓarawta,
ŋuygi goy ta'a, hin sa pir goyɗi,
nigi ma hot ta'a kuɗ lopna va'a,
nigi ma li ta' ŋray ca ki na' li nala kaw.
Kay na' fok kulo'o hiɗi dika' firiya kat Ma-Vatɗina,
kat ma peldetna vi Israyel.
30Kay mige sa joriyona va'a ma yak gaa hay hagana,
sumuna va' sa wi duura kaf ma ba goyo hay buur namna,
Din mi Ma-Vatɗina.
31Humagu, fay tuwayawa!
Nak ta subur tuwakga,
kay buura vag coowa,
liyn ma kitata vag coowa,
din mi Bum-sumuna Ma-Vatɗina vi vok-ma-duura.
32Na' ta subur tuwa'ta ma tuwura,
cap nig gaa'a kaw,
sa as kay va' ɓa' kulo loɗi;
nan ma tun kut kuɗ hoyok-ziyna va'a,
kut ma ŋal liy ma ta'na kafe.
33Ki kayn nala Ma-Vatɗina vi vok-ma-duura di'e:
Gurona vi Israyel hiɗi gurona vi Yuda kaf ka vun curo'da;
sum sa yawsi gorvon kaf ka ŋomsiya, min kay hinsiɗi.
34May nam ma jobsi yisina nam dono'o,
namu ma semda valam ala Ma-Vatɗina vi vok-ma-duura,
nam ma gut kisiya, kay vul tun-sukka mi nagata,
kay muɗ sum sa hay Babilon geɗa kaw.
35Hin kew-gaferaŋa cal sa Kaldeena,
Din mi Ma-Vatɗina,
hin kew-gaferaŋa cal sum sa hay Babilon,
sa ŋulona va'a hiɗi sa wi yalla.
36Hin kew-gaferaŋa cal sa jobta vi sinda,
hinsi muɗ ki sa ɦay-ɦayna nala,
hin kew-gaferaŋa cal sumuna va' sa donona,
hinsi sutaysi to'o.
37Hin kew-gaferaŋa cal kulumayna visiya,
hiɗi keke-ma-duura visiya,
hinim cal sum sa haya' kuɗ batsi kafna,
hinsi muɗ ki boyn nala.
Hin kew-gaferaŋa cal farayna visiya,
hin sumun yawamu.
38Hin koɓoron li niyna visiya,
hin niyna visi so goyo.
Kay kayni ti nagata vi lawayn ma waana;
nisi ɦoyay kuɗ lawayn ma waana visiya.
39Kuɗ kayni muuriya ma fulla hiɗi cekemna
ma li ziy yam-jono visiya,
rigetna kaw ma lak ziyna valam baŋalsiya;
sa as li ziy hay liy namna loɗi,
sumun as biya hay liy namna loɗi.
40Ki Sodoma hiɗi Gomora hiɗi naga ma ŋuyi galamna
Lawna ɓulakam goy nala,
sa as li ziy hay Babilon loɗi,
na' ma muɗ mi liyn ma musta vi sa loɗi.
Din mi ma-Vatɗina.
41Sum sara ka co'o hay gal ma gaana pa,
sum sa jafsi ŋolo ka fokay kulo'o
hay vun-dabaŋgu'ta vi nagata pa.
42Nisi ka wileɗ ɓarawna visiya hiɗi yakana visi kulo'o,
nisi taŋgasi, haw sa kirsiɗi,
delsi ci gumu ki niy-lum ma ŋolla nala;
nisi ɓey kulo kay kulumayna,
zlari kuɗ tuwsi ki san kepe nala,
kay durag naku, goota vi Babilon.
43Mulla vi Babilon hum labar kayni,
ɓalam maŋ goyo, yorta vumu,
ki tuw-tita vi cata ta ka puka nala.
44Ki zlona nala,
nam fok kulo'o hay deŋel niyna ma dena vi Yordan,
kay dur hoyok-ziy ma donona,
wulini wulini nan ma digiɗsiya,
sa ma nan min vilekemna nan ma tunum ka'a.
Kay sa ma ŋray hiɗi nanu mi gige?
Sa ma as ɗekan hagata mi gige?
Mulla ma as col diganu mi gige?
45Kuɗ kayni humgi slen ma Ma-Vatɗina min lum kat Babilon,
slen ma nam colom col' kay lum tam sum sa Kaldeena.
Gasiya, sumun ma sabsiya ki fok-dimi ma maŋayn nala,
gasita sumun ma vurum ziyna visiya.
46Hay suwana vi slita vi Babilon,
nagat geɗa, ciriyna visi humis ta-ta jar jaf-sumuna.
Currently Selected:
YEREMIYAS 50: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
