YEREMIYAS 47
47
Di vun-jobta kat sa Filistina
1Ma-Vatɗina di yoboyna valamu tam Yeremiyas ma jobta,
kay sa Filistina, jew a Farawn sli Gaza.
2Ki kayn nala Ma-Vatɗin di'e:
Humgiya, niyn ka pat kulo'o hay gal ma gaana,
namu ki niy-lumna ma subur goyna nala,
nam ti nagata hiɗi sle ma haya'na,
hoyok-ziyna hiɗi sum sa hayamna.
Sumun ka ciriya,
sum sa hay nagat kaf ka yor tuwsiya.
3Kuɗ sem kulumay ma donona ma ci gaa rim-rimna,
kuɗ suwana vi keke-ma-duura hiɗi sem keke-ma-duura,
sumayna muɗ irsi kir guronɗi,
ɓisi muɗi maŋay ŋolo.
4Kay mige buura ma sum sa Filistin kaf ma cim goyna ka co'o.
buura ma nisi sa tuni vok sum sa Tirus hiɗi Sidonna;
kay Ma-Vatɗina min ci sa Filistin goyo,
nam min ci sum sa hin kuɗ jokota vi Kaftor.
5Gaza ya' welay goy cutut',
Askalon vuna' zani helmes',
galla vi fulda visi ma hinna kaw,
nigi ma jir tuwgi goy nala ta-ta lancitige?
6Hih! Kewta vi Ma-Vatɗina,
nak ma tun sukag lancitige?
Kalag kulo hay faara vagu,
cal loɗi, musag kiliŋ.
7Nak as tun sukag ir nanige?
Ma-Vatɗina vul dita valamu,
kewta nam muɗa' ira' kayni hay galla vi Askalon
hiɗi deŋella vi niy-lum ŋolla.
Currently Selected:
YEREMIYAS 47: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
