YEREMIYAS 46
46
DI VUN-JOBTA KAY JAF-SUMUNA
Vun-jobta kat Egipte
1Yoboyna vi Ma-Vatɗina ma nam dum tam Yeremiyas ma jobta, kay jaf-sumuna. 2Dita ta nam da' kay Egipte. Kay sojena vi Farawn Neko, mulla vi Egipte, ma ka goboy hiɗi niy-lumna Eufrata, hay Karkemis, ma Nebukadnesar mulla vi Babilon kol kalamu hay busata fiɗita vi Yoyakim, goora vi Yosiyas mulla vi Yuda.
3Kotgi kuroŋ ma goora hiɗi ma ŋolla,
tuɗgi vun duura,
4Gangi kulumayna, ɓegi kay kulumayna,
cukgi goyo hiɗi ŋalayta duura vigiya,
ligaɗgi siy kawayna vigiya, cukgi ŋoŋŋa.
5Nan ka wum mi mige?
Nisi muɗi nari,
nisi hot bugolsiya;
sumuna visi sa donon ciya;
nisi jaŋa bay hot bugolsiya.
ɦuyumda ka hay liyn kaf,
Din mi Ma-Vatɗina.
6Hin sa hefteŋŋa fi su da kuɗ pirta visiɗi,
hin sa donona pir jaŋɗi.
Hay gal gaa'a, kel niy-lumna Eufrata,
nisi ka tupa'a, nisi ka puk gaa'a.
7Nam ka de kulo ki niy-lumna Nil nala kayn mi gige?
Nam ma ka gi pesle ki niy-lumna nala kayni mi gige?
8Kayni ti Egipte.
Na' ka tuɗ voka'a ki niy-lumna vi Nil nala,
niyna va' ka gi pesle ki niy-lumna nala.
Egipte di'e: Nan ma kala, nan ma kuluɓ yam nagata,
hoyok-ziyna hiɗi sum sa hayamna nan ma ɦom gaa'a.
9Tuɗgiya, kulumayna, ligi koloyo, keke-ma-duura,
hin sum sa jufayna ɗek tuwsi goyo,
nisi sa hay Etiopiya hiɗi sa hay Lud sa ziy marayta,
nisi sa hay Lud sa nir ɓarawt goyna.
10Buur namna mi buura vi Bum-Sumuna,
Ma-Vatɗina vi vok-ma-duura;
mi buura ma job yamna,
buur ma nam job yalam tam sa gaw kalamna.
Kew-gaferaŋa vunam ka ti'e,
nam ka hoba,
nam ɦoyay hiɗi busuwna visiya.
Kay Bum-Sumuna Ma-Vatɗina vi vok-ma-duura
ka li ɗifinna valamu hay nagata ta gal gaata,
kel niy-lumna Eufrata.
11Tuɗag hay Galaad, garag gurgununa,
goor-wayata, goot-cata vi Egipte.
Nak mak tuwag gar gurgunun kayn ɦawa'a,
nak as fi yerta-goytaɗi.
12Jaf-sumuna hum labara kay zulota vagu,
ciriyna vagu ka hob yam nagata,
kay sa duura ka tupa kulo kay tuwsiya,
nisi ka yak gaa'a kuɗ tuwsiya.
13Yoboyna vi Ma-Vatɗina ma nam dum tam Yeremiyas ma jobta, kay cota vi Nebukadnesar mulla vi Babilon, nam min sli nagat Egipte.
14Vigi labara hay Egipte,
siwelgi labara hay Migdol,
siwelgi labara hay Nof hiɗi Takpanes,
digi ala:
Fokag kulo'o, kotag tuwagu,
kay kew-gaferaŋa ka cal goy galagu.
15Sumuna vag sa donona yawiya kay mige?
Nisi as lak kuloɗi,
kay Ma-Vatɗin puksiyawa gaa'a.
16Nam geɗ sumunawa ŋolo;
nisi ka puk gaa kay tuwsiya,
nisi di ala: Tuɗaya,
hotay kat sumuna vaya,
hay nagata ta nay vuɗ haya'ta,
gine hiɗi kew-gaferaŋ ma cim sumuna.
17Ɗawni, nisi ka siwel ala:
Farawn mulla vi Egipte,
kayni mi winek ɦawa'a;
nam hin liynawa capa.
18Nan ka iriya, din mi mulla,
ma semda valam ala Ma-Vatɗina vi vok-ma-duura.
Ki Tabor jar hiɗiyna nala,
ki Karmel tuɗ voka' hay niy-lumna nala,
nam ma ma'a.
19Junag jakŋa vagu kay kal gorvo'o,
naku goot-cata ta ziyna vag hay Egipte.
Kay Nof ma muɗ goy fulu,
nisi ma ŋala'a,
ziy as lak haya' loɗi.
20Egipte kayni ti goor-put gunay ta jifiyta,
sa ma ɓulak liyna ka co'ay hay gal gaa pa,
nam ka co'o.
21Sa gar gurjuta va'a ka kulo'o haya'a
ki guro-luway ma ɗoromna nala,
nisi kaw, nisi ka muɗ ŋorsiya,
nisi kaf mun jaŋi bay col vun lawta,
kay buura ma joot co kisina coowa,
liyn ma kitata coowa kisiya.
22Dela' ka di'e ki del guyn nala;
kay nisi ka tuɗ voksiya hiɗi sojena,
nisi ka tuɗay dura'a hiɗi ceɗna,
ki sum sa ka guna nala.
23Juruta va'a siy ɦizik,
sa jik kuɗa'ɗi,
may hiɗi kayni pet nisi ka para' gaa'a.
kay nisi ka ŋol hini hini ki baara nala,
sa as ŋaɓsiɗi.
Din mi Ma-Vatɗina.
24Goot-cata vi Egipte muɗi zulo'o,
na' vuli goy hay ɓam sum sa gal gaa pana.
25Ma-Vatɗina vi vok-ma-duura,
Lawna vi Israyel di'e:
Humgiya, nan min ka kitat kay Amon hay No,
Farawn, Egipte,
lawayna visiya hiɗi muliyana visiya,
Farawn hiɗi nisi sa tun vida visi kalamu.
26Nan ma vulsi goy hay ɓam nisi sa min irita visiya,
hay ɓam Nebukadnesar mulla vi Babilon,
hay ɓam sa sunda valamu kaw;
bugol kayni,
sumun ma li ziy hay Egipte ki hay buur ma jewn nala.
Din mi Ma-Vatɗina.
27May nigiya, sa sunda vanu Yakub,
jafna vi Yakub, ligi narɗi;
tuwgi ma wirgiɗi, Israyel,
kay nan ma butgi goy vun nagata ta gineta,
nan ma but jafna vigi goy vun nagata ta nigi ka haya' gorvota;
Jafna vi Yakub ma hotiya,
nisi ma lak hay sle'ta hiɗi tun-sukka,
sa as kay ɦiwirsi loɗi.
28Nigiya sa sunda vanu, jafna vi Yakub,
ligi narɗi, Din mi Ma-Vatɗina;
kay nan ka hiɗi nigiya,
jaf-sumun kaf sa nan mergi goy jarsina nan ma vatsi goyo,
may nigiya, nan ma vatgi goyɗi;
nan ma ka kita kigi hay hagata va'a,
nan as hingi bay ka kitat kigiɗi.
Currently Selected:
YEREMIYAS 46: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
