SA KA KITANA 14

Samson sli goota ta Filistita

1Samson tun iram hay Timna, iram wi goot cat kep jar gurona vi sa Filistina. 2Hay li ma nam hotay vo hotna, nam di goy tam bulum hiɗi sulum ala, hay Timna nam wi goot cat kep jar guro-boyna vi Filistina, iram va'a, nam ala nisi ma slumta.

3Bulum hiɗi sulum ka dumu: Jar guro-biyoŋŋa hiɗi sumuna vaŋ noŋ kaf kayn guro-boyn sayɗi su? Lebo naŋ tuɗ goy sli goot jar sum sa Filistina sa bay ka gosayna kayni kay mige? Samson hot di bulumu: Slanti migi hay', kay na' kiran ŋaa'a ŋolo. 4Bulum hiɗi sulum may wi ala lawt kayn may goy vi Lawn paɗi, dolay Samson gar kayni mi yalla ma curob jaram hiɗi sa Filistina, kay hay liy namna kayni, sa Filistina ka ti mulda kay sa Israyella.

5Samson kalay hay Timna hiɗi bulumu hiɗi sulumu. Hay li ma nisi co hay sine gulda-guldana vi sa Timna, zlon ma joriyona ci gumu, nam kalay goyo, ŋaf ir Samson. 6Ŋusta vi Ma-Vatɗina cuk kay Samson; nam vi zlona, hawam goyo ki san haw goor ɦun ɦawa nala. Va ma nam lumna nam min dum mi bulum hiɗi sulum noŋɗi. 7Nam kaliya, ka kasla hiɗi ca na'ta, iram va' ŋaa'a ŋolo.

8Bugol buur neeɗa kayni, nam hot hay Timna kay sli cata valamu, nam cal goyo kay tuɗ ɗuw ŋumna vi zlon ma nam cumna. Nam ɗuw na kayni, yumna ka viya hay hoyok zlon namna, liy mul ŋolo. 9Nam pat yum namna yawam hay ɓalamu, nam ka ti'e hay li ma nam ka tuɗ hay hagata; hay li ma nam co tam bulum hiɗi sulumu, nam vulsiya nisi ti kaw. May nam may disi ala yum namna nam patamay hay hoyok zlona paɗi.

10Bum Samson tuɗ goy vi cata, ɗawni Samson li yuldeta kay sa joriyona ay li dok-dok nala. 11Hay li ma nisi wumu, nisi yi sa joriyon dok-ɦidi, nisi co'o nal hiɗi namu: 12Samson disiya: Nan min digi vanbona, kay nigi dum cawam goyo, jar buur ma siɗiyana vi yuldet lakŋi, la nigi dum cawamawa goyo na, nan ma vulgi sligar fiyok ma cuk hoyokgi dok-ɦidi lay, vulgi sligar ma muɗumna dok-ɦidi lay. 13May la nigi fi a danti cawam goyɗina, sligar ma cukŋa dok-ɦidi hiɗi sligar ma muɗumna dok-ɦidi lay vulanti ɗawn si nigiya. Nisi dumu: Daŋ law ma zul namna aya, numa humum tuwa. Nam di'e: 14Goy hay nam ma mut slen pa va ma tin kalay goyo, goy hay nam ma donon pa va ma lumaɗna kalay goyo. Nisi garam cawam ta-ta buur ɦidi, may fumɗi.

15Hay buurta siɗiyata nisi di tam cata vi Samson ala: Nak ma nilam jufagu kay nam ma duma caw law na'ta goyo, la naɗina nak hiɗi ziyna vi bug noŋ kaf numa min ŋalgi goyo, dolay nigi yuma'ay kayn kay yaw sle ma kuma'an su? 16Cata vi Samson tiy talam hiɗi zimiyna, ka dum ala: Naŋ dolay minanɗi, nan kiraŋ bisi, naŋ di law ta zulda mi sumuna vanu may naŋ min danti cawa' goyɗin kay mige? Nam hota' dita: Bun hiɗi sun kaw nan may disi caw law na'taɗi, may nan as dag law na'ta mag nak da su? 17Jar buur ma siɗiyana vi yuldet kaf lakŋ na' ka gaɓi kulo kelem tiy na waŋ', co hay buurta siɗiyat kayni, nam makawa ka'a, nam da' caw vanbon goyo. Na' tuɗa da' cawa' goy mi sumuna va'a. 18Hay buurta siɗiyata jew a fatta ɗig gaa'a, sum sa hay hoyok-ziyna di tam Samson: Va mara ma sleɗ suw yumda ka su? Va mara ma dono suw zlona ka su? Nam ka hotsi dita: La nigi zum zumi hiɗi put-gunayta vanɗi ni, law na'ta nigi as fa' cawa' su?

19Ŋusta vi Ma-Vatɗina cuk kalamu, nam tun iram hay Askalon. Ɗawni nam ci sumuna dok-ɦidi, yaw sligara visiya, sum sa di caw lawt goyna nam vulsita. Nam muɗi ɦiy ŋolo, nam kal hay ziyna vi bulumu. 20Nisi vul cata valam mi san kep jar boniyomna, nam ma ay tapay hiɗi nam ŋaa'a ŋolo.

Currently Selected:

SA KA KITANA 14: Massana

Highlight

Copy

Compare