SA KA KITANA 13

Vu'da vi Samson, nam ka kitata vi sa Israyella

1Gurona vi Israyel hot li va ma kir Ma-Vatɗin ŋaaɗi lo, nala Ma-Vatɗina hinsi goy hay ɓam sa Filistina ir busat dok-fiɗi. 2Sa mara ay kep hay Soreya hay jafna vi Dan, yum Manohak, goor valam mayɗi, kay cata valam gediya. 3Sunda-Wuralawn kep vul tuwam kir cata, ka di ta'a: Ɗuwagu, wulin kayn nak gediya, goor vag mayɗi, may nak ma sli haya, nak ma vuɗ gooro. 4May wulin pa nak ma tun caw li ŋali, nak ma ci vinɗi, ci dolay ma galakŋaɗi kaw, tun ti ma liwis vunagɗi kaw. 5Kay nak ma sli haya, nak ma vuɗ gooro, san as kay welem yalam goy hiɗi kew noŋɗi, kay mige goor namna kayni vuli goy tam Lawna kalaf hay sulumi pa, ma tun caw but sa Israyel goy hay ɓam sa Filistin ɗawn mi namu.

6Cat tuɗ vi labar namna mi jufa'a, na' ka dum ala: Sana vi Lawna kep co tanu, nam sli sunda-wuralawn nala, kay nam ɗuwan ɦuyum' ŋolo, nan may jobom kay liyn ma nam may hayam panɗi, nam may ɗekan selemɗi kaw. 7May nam ka dan ala nan ma sli haya, nan ma vuɗ gooro, wulin kayn nan ci vinɗi lay ci dolay ma galakɗi lay, nan ma ti va ma liwisɗi lay, kay goor namna kayni, kalaf hay sulumi pa ta-ta tam mitta valamu, nam vuli goy tam Lawna.

8Manohak hot giɗel del Lawna dumu: Bum-Sumuna, sana vaŋ ma naŋ gumi sun jewna hot ay tuma mara hot loge, nam ɗekma yal namna ma numa ma lum tam goor namna ɗawn ɗek ge. 9Lawn hum siɗawta vi Manohak. Sunda-wuralawna hotay tam cata valam mara lo: Na' ka musi goy hay sinen dam, jufa' may kuɗa'ɗi. 10Na' fokay jaŋi, mar labara mi jufa'a kay dum ala sa ma vul tuwam kiran hay buur hena hotiyawa tan mara'a lo. 11Manohak fok kulo gosoy wit' tap kuɗ cata valamu, tuɗ tam sa namna ka dumu: Zawn mi naŋ ma di yoboynis hiɗi cat zawn su? Nam ka hot dit ala: Awa mi nanu. 12Manohak ka dumu: Hay li ma vun dita vaŋ hobawa goyona, numa ma kot tuw goor kottige? Goor namna ma lum linige? 13Sunda-wuralawna di tam Manohak: Cat ma li kuɗ sle ma nan da'ti kafna. 14Va ma may goy hay vuɗ gulda-guldan pana na' as tamamɗi, vinna hiɗi dolay ma galakŋa na' as kay tamamɗi, na' as ti va ma liwisɗi. Sle ma nan da'ti kafna na' as ŋomom kulo ka' ŋaa'a. 15Manohak ka di tam sunda-wuralawna: Numa min ala naŋ ma kal deɗi, kay numa' min ŋataŋ goor ɦu ma jakayna. 16Sunda-Wuralawna hot di tam Manohak: La naŋ min telan kay ti fuwa, nan may ti fu vaŋɗi, may la naŋ min li ɗifin ma ŋal-goyna, laŋ ɗifin namna tam Lawna. Kay Manohak may wiy goy jew ala kayni ti sunda-wuralawnaɗi.

17Manohak hot job tam sunda-wuralawna: Semda vaŋ anige? Kay la va ma naŋ dumna laawana, numa ɗawn ma suburaŋ seŋu. 18Sunda-wuralawna ka dumu: Naŋ joban sen kay mige? Namu mi ma jifiy ŋolo. 19Manohak vi goor ɦu ma jakayna hiɗi va ma vulda, li difin tam Ma-Vatɗina kulo kay hiɗiyta. Hay li ma Manohak hiɗi cata valam ka sar na lak kayni, ɗekka kep li'e: 20Hay li ma sin-kuta ta nisi ŋala' kuɗ liyn ma ɗifinna ka tuɗ kulo'o hay wuralawn kayni, sunda-wuralawna jik kulo jar kuta vi giwin-ma-ɗifinna. Hay li ma Manohak hiɗi cat valam wi kayni, nisi dab voksi gaa'a kay nagata. 21Sunda-wuralawna min vul tuwam kir Manohak hiɗi cata valam loɗi. Bugol kayni Manohak wi ala dolay kayni mi sunda-wuralawna. 22Nam di tam cata valamu: Yaya! Nay mitay ɗawn mitiya, kay iray cukawa kay Lawna. 23Cata valam ka hotom dita: Hay! Lali Ma-Vatɗin mini ala nay mitana, vulda hiɗi ɗifin ma ŋal-goyna ma nay lum talamna nam as vum lo su? Lebo nam as a hinay ɗuw slen namna hiɗi iraya humum hiɗi humaya pet lo su?

24Cata vuɗ goor namna, na' tunum selem ala Samson, nam wul kulo'o. Ma-Vatɗina gi bol kalamu. 25Hay Makane-Dan jar Soreya hiɗi Estahol kayni, Ŋusta vi Lawna tun caw vum tuwam bat-bat'.

Currently Selected:

SA KA KITANA 13: Massana

Highlight

Copy

Compare