HOSEYA 7
7
1Hay li ma nan min yer sa Israyel goyo,
jiw-zlata vi sa fi Efrayimna,
hiɗi joota vi sum sa Samariyana dira' patawa goy lo,
kay nisi minim mi law ma gunina,
sa ma kulla coowa,
sum sa coŋ-coloŋŋa ka meray goy siɗak-ɗak,
2nisi may var ala nan ka wi joota visiya noŋɗi,
wulin kayn lopna visi ka ŋuyi tisi cusl',
nan iran ka cuki kalam miriŋ'.
3Nisi ka li dik mulla firi hiɗi jiw-zlata visiya,
ka sleɗ hay sa ŋulona visi hiɗi sinda visiya.
4Nisi kaf li zlata-bulo'o.
Ŋray ca ki giwin ma yi funa ŋal kut kuɗum ŋol nala,
hay li ma ko futuwnawa hayana,
ŋal kut kuɗum loɗi kaw,
nam fok kulo kufa'a.
5Hay buura vi mulla vay kayni,
sa ŋulo sa kuɗumna muɗ tuwsi moy noŋo,
kay dolay ma nisi cum ŋolla,
mulla kaw vi ɓam sum sa burahta.
6Hay li ma nisi var kay li joota,
haysi muɗi ku keŋ ki duwayta ta yi fun haya nala,
hay henjet kaf sum sa ŋal kut kuɗ duwayt cuki sene,
may liyn fo goy grawt kayni,
giwinna ka viy ku ŋol suwa ki kut ta ŋal liyn nala.
7Nisi kaf ku keŋ' ki giwinna nala,
nisi ci sum sa kaasi kitata visin goyo,
muliyana visi ka yak gaa zaw,
may sa ma joban ala nan gutumu mayɗi.
Nisi gar sum sa waana kay gutsiya.
8Sumuna vi Efrayim rigasay hiɗi jaf sum segena,
nisi kayni ki hambul ma galam hena bay gi'e nala.
9Jaf sum segen vatsi donosi goyo,
may nisi wi noŋɗi,
yisi tun caw cuk vati,
may nisi may wi noŋɗi.
10Subur-tuwta vi Israyel ka li di goyt kisi kay tuwa'a,
Nisi min hotay tam Ma-Vatɗina Lawna visiɗi,
hiɗi kayn kaf nisi min garamɗi.
11Efrayim muɗi ki gukka ta ɦoyayta nala,
yal mayɗi.
Nisi giɗel del sum sa Egiptena,
nisi ka tuɗ hay Asiriya.
12La nisi tuɗa,
nan min cuk dena van goy voksiya,
nan ma yaksi gaa'a ki layayn ma dukalawn nala;
nan ma watsiya,
ki nisi humi goy jewe hay tokŋa visi nala.
13Joot kisiya,
kay nisi ka ŋay tuwsi kanu!
Ɓulak-goyt kisiya,
kay nisi min hum kuɗanɗi.
Nan min suɗsi goyo,
may nisi dum kan mi yoboy ma sinna.
14Hay diksi kalafi,
nisi may siwel tan noŋɗi,
may hay liyna visi ma nisi buri gaa hayamna,
nisi ka yor tuwsiya;
nisi ka tok tuwsiya kay gar alkamarena hiɗi gulda-guldana,
may nisi vi tuwsi goy gine hiɗi nanu.
15Nan hatsiyawa,
nan muɗsi gilaŋatsi dono'o;
may nisi dum kan mi law ma joon dok-doko.
16Nisi hotay kayn tam nam ma kulo ginenɗi,
nisi kayn ki diŋ-diŋ ɓarawta ta ɗut san nala,
sa ŋulona visiya kew-gaferaŋa ma calsi gaa'a,
kayn kuɗ vunsi ma di law ma galakŋa,
kayni mi law ma min muɗsi a sum sa Egiptena ma cen kuɗsin ɗawni.
Currently Selected:
HOSEYA 7: Massana
Highlight
Share
Compare
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
