HOSEYA 13
13
Sum sa Israyella fi mittawa kuɗ ŋel-gatta visiya
1Ma-Vatɗin di'e:
Hay li ma sumuna vi Efrayim ka di va'a,
Sum segen li nar kisiya.
Sesi tiy ŋolo jar sa Israyella.
May nisi kal tuwsi hay joota kuɗ Baal.
Nala nisi mitawa.
2Wulin kaw,
sumuna vi Efrayim ka tuɗ vok dok-dok hay sulukŋa.
Wulin lo nisi ka kot va ma girifna,
ka yorom hiɗi gurjuta visiya.
Lawayn ma waana nisi kotom kuɗ minda visiya.
Kaf kayni mi lopna vi sa ma in slen hiɗi ɓalamna.
Sumun di kisi ala:
Nisi sa ɓi sumun ɗifinna, nisi ka bow guro-luwayn gaa'a.
3Kuɗ kayni nisi ma liys ki ɗugul ma graw culumta nala,
ki maɗay ma graw culumta ma gaz goy bay lopna nala.
Ki burana ma simeɗna dolom goy gine hiɗi muɗakŋa nala.
ki no'osna ma kal goy hay ir-ziyn nala.
4May nanu, nan mi Ma-Vatɗina Lawna vigiya,
ay hay nagat Egipte pa.
Nigi ma gar law maraɗi, garanti nan kepe.
Sa mara ma suɗgi mayɗi, mi nan kepe.
5Nan ŋomgi ay hay fulda hay liyn ma goy soyna
6Haysi hob hiɗi ŋom ma nan ŋomsina,
nala suburta kal hay diksiya,
kuɗ kayni yisi jokan goyo.
7Nala nan ma muɗ katsi ki zlon nala;
ki zinilla nala,
nan ma jetsi goy hay hagat neŋ neŋ'.
8Nan ma bowsiya, ki ursena,#13:8 ursena muur ma dono ŋolo, ka kel niy-lum ma ŋulona.
ma goora valam sliy goyn nala,
nan ma jetsi war-digsi goyo.
Nan ma mutsi ki zlon mut san nala,
muuriyan ma fulla ma jetsi goy neŋ neŋ.
9Sum sa Israyella,
nigi ma ɓulak goy ɗawni kay nigi min hum kuɗanɗi,
sa ma gut kuɗgina nigi noyom gatta valam goyo.
10Wulini mulla vigi ka arige?
Nigi yumi wulini kay nam butgi hoyok-ziyna vigi goy yo!
Sum sa ka kitana vigina sa nigi job tisi ala
nisi vulgi muliyana hiɗi yerimana, nisi wulin ka arige?
11Hay ɦiyda vanu nan vulgi mul kep,
hay li ma ɦiyda van jor ŋolo,
nan hot slum goy kigiya.
12Jiw-zlata vi sumuna vi Efrayim ka ŋomi ta',
sulukŋa visi ka ŋomi kan tuwa ta'.
13Tuwtita ta co kisit ɗawni,
ki tuw-tita vi cat ta min puka nala;
goor ma nisi vuɗum ɗawn yal ŋolɗi,
hay li ma liyna valam asawana,
nam ma kalay goy hay dig sulumɗi.
14Nan ma butsi goy ɓam mitta,
nan ma gussi hay ɓam mitta.
Mitta, bakmarana vag ka arige?
Liyn ma kiwena,
donota vaŋ ta ɓulak sumun ka arige?
May hamda ka viy goy kiranu.
15Sumuna vi Efrayim vuɗ jafn ŋolo jar ɓosiyosina,
may simeɗ ma gal kuɗuwna ma co'o,
simeɗna vi Ma-Vatɗina ma patay kulo'o hay fulda,
ma tosi sutaysi goyo,
kaata visi ta law niyn kaf ma so goyo.
Slena visi ma tek ŋolla,
hiɗi farayna visi kaf ma ŋalis goyo.
Currently Selected:
HOSEYA 13: Massana
Highlight
Share
Compare
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
