HOSEYA 14
14
1Sum sa hay Samariya kaf ma fi kitata,
kay nisi fok kulo kat Lawna.
Kew-gaferaŋa ma calsi goyo;
gurona visi sa gurayna ma kirapis gaa sem sumuna,
boyna visi sa ka wiira sumun ma ɓetsi haysi goyo.
Yita kay hamda
2Nigi sa Israyella,
hotgiyay tam Ma-Vatɗina Lawna vigiya.
Kay cukgi gaa kayn ti jiw-zlata vigiya.
3Margi yoboy hay vungiya (yoboy ma hamda),
Hotgiyay tam Ma-Vatɗina.
Nigi ma dum ala:
Sulukŋa vuma kaf zawn naŋ cukmat cage,
naŋ vuma hiɗi dikaŋ ŋaa vige,
wulin kayn numa vulaŋgi hay baŋal
luway ma jufayn ɗawn mi yoboy ma hay vunmana.
4Sa ma Asiriya ma suɗma goy mayɗi.
Numa as ɓe kulo kay kulumay loɗi,
sle ma numa kotom hiɗi ɓuma'na,
numa as yum ala Lawn vuma'a loɗi.
Kay kataŋ naŋ kayni sa ma kuyuna fi teŋ-irta.
5Nan ma yersi goyo kay bay-vida visiya,
nan ma minsiya hiɗi dikan kafe.
Kay dikan ma ɦiy kisin tunawa gaa'a.
6Nan ma li ki maɗay ma gina nala kay Israyel,
nisi ma ɓo ki tayn nala,
sutaysi ma cuk gaa'a ki gu ma hay Libaŋ nala.
7Ɓalam ma ɓet goy ŋolo.
Jifiyta valam ma ŋra hiɗi gu-diveŋ ca',
ma muɗ his faya ki gu ma hay Libaŋ nala.
8Nisi ma hotiya,
nisi ma lak gaa kuɗ ŋusanu.
Nisi ma hot zum alkamaren lo,
nisi ma hot ɓo ki vuɗna vi gulda-guldan nala;
sesi ma tiya ki vinna ma hay Libaŋ nala.
9Sumuna vi Efrayim,
nigi as lum hiɗi Lawayn ma waana mi meloge?
Nan ma humsiya,
nan ma cuk iran kuɗsiya.
Nanu, nan ki gu-sipre nala,
dok-dok humam goɗiya.
Vuɗna vigi may goy hay nan pa.
10Sa ma yalla valam asayna hinim ŋom sle namna hayamu.
Sa ma yalam tuɗ ŋaana humam ma hum sle namna.
Kay hagata vi Ma-Vatɗin ka ɗigere.
Sum sa ɗigera ma poy haya'a,
may sa ŋel-gatta ma cuk gaa'a.
Currently Selected:
HOSEYA 14: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001