HOSEYA 12
12
Sulukŋa vi gurona vi Yakub
1Sumuna vi Efrayim ŋuyanawa hiɗi ɗutta,
Sumuna vi Israyel ŋuyanawa hiɗi bay-gasita.
May sumuna vi Yuda ka tuɗ kuɗ Lawn tuwa,
vida visi kuɗ Lawn ma peldetn ka'a.
2Sumuna vi Efrayim hob haysiyawa hiɗi simeɗna,
nisi ka tuɗ kuɗ simeɗ ma may gal kuɗuw pana;
Buurta kaf nisi ka ka sinda voksi suwa,
li hiɗi dono kaw.
Nisi jun bonot hiɗi sum sa Asiriyana,
nisi ka tuɗ mula goy hay Egipte.
3Ma-Vatɗin kitat ka jaram hiɗi sumuna vi Yuda lay.
Nam ma ka kitat kay sumuna vi Yakub,
ɗawn kuɗ poyta visiya,
nam ma wuraksi lop ma nisi lumna.
4Ay kulo hay sulum pa, Yakub vi dubuk ɓasulumna,
hay li ma nam muɗ ŋolo,
nam ŋaf hiɗi Lawna.
5Nam ŋaf hiɗi sunda, nam kol kalamu.
Nam tiya, siɗaw sunda wuralawna kay lum slugo'o.
Yakub ŋafam hay Betel,
ɗawni mi liyn ma Lawna kus yoboyn hiɗi namu.
6Ma-Vatɗin kayn mi Lawna vi vok-ma-duura;
semda valam ala Ma-Vatɗina.
7May nigiya, hotgiyay tam Lawna vigiya.
Ŋomgi ŋaata hiɗi ɗigerta kulo kigiya.
Zamgi ɓam Ma-Vatɗina.
8Sumuna vi Efrayim ŋray ca ki sa Kanaaniyan nala.
Tasata visi ta ŋa slena dira' kulo dabiya,
nisi min li ir sumuna.
9Sumuna vi Efrayim di'e:
Gasiya, numa muɗi faraya,
numa fi faraynawa ŋolo.
Nam kaf zawni mi sle ma numa fum kuɗ lop ma numa lumna;
jiw-zla may hay dikmaɗi lay,
mat ma ci may hay dikmaɗi lay.
10Nanu, nan mi Ma-Vatɗina,
Lawna vigiya,
tun caw ay hay nagat Egipte pa.
Nan ma hot lakgi hay guɗukŋa lo,
ki hay buur ma yuldetna nala.
11Nan di slen ŋolo tam sa jobta,
nan vul tuwan kirgi sem ŋolo,
nan di law ma nir-niramna hiɗi del sa jobta.
12La sum sa Galaadna lum mi law ma gunina,
nisi vat dawn goyo.
Nisi li luwayn ɗifini hay Gilgal,
liyn ma nisi li ɗifin kulo kalamna,
ma muɗ ki hiɗiy ma jaki kulo kay tuwamu
goy hay sinen nala.
13Yakub pir goy hay fulda vi Aram.
Israyel li lop kay cata.
Nam ŋom farayna kay nam min cata.
14Lawn yaw sum sa Israyel ay goy hay Egipte pa kayni,
nam gumi mi sa ma jobta.
Lawn ŋom sum sa Israyel kayn hiɗi sa ma jobta.
15Sumuna vi Efrayim ɓulak dik Ma-Vatɗin dono ŋolo.
Ma-Vatɗina visi ma gisi joota kisiya,
nam hinsi ziy zulota vi ŋelda visiya.
Currently Selected:
HOSEYA 12: Massana
Highlight
Share
Compare
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
