HOSEYA 11
11
Lawn li ŋaat kay sum sa Israyella may nisi minimɗi
1Hay li ma sa Israyella ay joriyo tuwa,
nan minsi ŋolo.
Gurona vanu nan yisi ay goy hay Egipte pa.
2May nisi ja jarsi goy gine'e hiɗi sum sa yisi ayna.
Nisi li ɗifin tam Baal,
li ɗifin ma his fayna tam slen ma inina.
3Nanu mi ma ɗek sumuna vi Efrayim hay hagata,
nan mi ma visi ɓisi kulona,
nisi may wi ala cit milla visi mi nanuɗi.
4Nan ka sabsi bugolanu hiɗi zigew ma lumaɗna,
hiɗi jaɓ ma minda,
nan ay bugolsiya ki sa ma hin jukŋa tun kelsi ɗeŋɗi nala,
sle ma tin kaf nan vulsiya.
5Nisi as a hot hay nagat Egipte loɗi,
may vurna ti mulda kisi ɗawn si sum sa Asiriyana,
kay nisi min hotay tanɗi.
6Kew-gaferaŋa ma cal sum sa hay hoyok-ziyna visin goyo,
sum sa gut-gasina ma vat goyo.
Kewt ma mutsiya,
kayn kuɗ var ma hay diksina.
7Sumuna van varsi tuni kayn kay tuɗ goy gine hiɗi nanu.
La yisi kay nisi tuɗ kat ma kulo ginen kaw,
sa kuɗsi ma hum mayɗi.
8Sumuna vi Efrayim,
nan ma lum tigi ɗawn mi mige?
Sumuna vi Israyella, nan ma vulgi goyo su?
Nigi min ala nan ma ligi ki nan li Adma nala su?
Nan ma ligi ŋray ca ki Seboyim nala su?
Dikan ɓulakawa ŋolo,
Kir-hawta ta hay dikanta kaf geɗiya.
9Nan min li kuɗ ɦiyda van ta ŋoldaɗi,
nan ma as ɓulak sumuna vi Efrayim goy loɗi,
kay nan mi Lawna may mi saɗi.
Nan ka peldet jargiya,
nan ma coys jargi hiɗi ɦiydɗi.
10Nisi ma tap kuɗ Ma-Vatɗina,
namu ma min ci gumu ki zlon nala,
kay nam ma ci gumu,
gurona valam ma jaŋay talamu
goy hay gal niy-lumna ma ŋolla pa,
tuwsi ma visi bat-bat'.
11Nisi ma jaŋay talamu goy hay Egipte pa,
tuwsi ma visi bat-bat',
ki layta nala.
Goy hay nagat Asiriya pa, ki gukka nala.
Nan ma laksi ziy hay nagata visiya.
Kayn mi dita vi Ma-Vatɗina.
Currently Selected:
HOSEYA 11: Massana
Highlight
Share
Compare
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
