HOSEYA 10
10
Jaf ma doogona mulda visi vatawa goyo
1Sa Israyella ay jew kayn ki gulda-guldan ma liy ŋol nala.
Vuɗna visi ay ŋolo.
Hay li ma vuɗna visi jor vokom kayni,
liyn ma li ɗifinna visi ŋol suwa;
hay li ma nagata visi ka muɗ faraya,
slen ma girif Lawayna nisi inim ŋol suwa.
2Diksi ɓuraway ma',
nala nisi ma ziy makka.
Liyn ma ɗifinna visiya Ma-Vatɗin ma ɦom gaa'a,
slena visi ma inina nam ma zutum gaa'a kaw.
3Mus neeɗa nisi ma di'e:
Naya, la mulla vay may loɗi,
kayn kay nay min li nar kuɗ Lawnɗi.
Wulin lakŋ nay gar mul lo kay nam lum tayn mi mige?
4Nisi di yoboyn ma waana hay vunsiya,
yi slen kisi bay li kuɗumu,
hay li ma nisi jun bonotawa,
kitat ya' day kulo'o,
ki gu ma galakŋa day jar gu ŋaan hay sinen nala.
5Sum sa hay Samariyana sutaysi ma to'o,
kay put ma nisi inim hay Bet-Avenna,
nisi ma tiya kay lawna visi namna,
muliyan-sa-ɗifinna vi Lawayn tuwsi ma visi buk-buk kalam namu,
kay gajijita valam ta jarsita ma vat goyo.
6Lawna visi namna ma slumis goy hay Asiriya,
ki vulda-ɦawat nala tam mulla Yareb.
Sumuna vi Efrayim liyn ma viy kirsiya.
Sum sa Israyella ma muɗ zulo'o kay var ma haysina.
7Sum sa Samariyan hiɗi mulla visi lay yisi dabawa goboyo,
ki kufa ma buri kulo kay niyn nala.
8Liyn ma jiŋiliŋŋa ma hay Bet-Aven,
ma sum sa Israyel li suluk kulo kalamna,
ma to goy gaa'a;
gu-ma-zigiyna ma day baŋal liyn ma ɗifinna visiya.
Nisi ma di tam hiɗiyna:
Ŋayma ŋayge,
ma di tam liyn ma jiŋiliŋŋa:
ɦoŋ gaa kuma'a ɦoge.
9Hay buura vi Gibeya pa nigi li suluku, Israyella.
Nisi ay lakay kulo kay sesiya.
Sum sa jiw-zlata duur fisi kuɗsi vo hay Gibeya ɗisu?
10Nan ma watsi ki nan min nala,
jaf-sumun ma tok tuwsi katsiya,
ma junsiya kay sulukŋa visi ma jabi kay tuwam ma'n lakŋi.
11Sumuna vi Efrayim nisi ki putta ta ɗelit nala,
ta min to wana.
May nan min co goboyo tam pelsiya,
nan ma tun jukŋ hay del sumuna vi Efrayim,
Sumuna vi Yuda ma zuma,
Sumuna vi Yakub ma kot hay sinenis bugolsiya.
12Cukgi jafn hiɗi ɗigerta,
feɗgi sinen hiɗi slugota,
Kotgi sine ma wuliya,
liyn ma gar Lawn asawa,
ta-ta hay buur ma nam ma hoti was ɗigerta valam goy kigiya.
13Nigi zumgi jootawa,
may nigi feɗgi jiw-zlatawa,
nigi ti vuɗna vi sindawa;
kay nigi tun vida vigi kay hagata vigiya,
nigi tun vida vigi kay sumuna vigi sa wi duura.
14Gijum-gijumta ŋolda ma fok kulo jar sumuna vigiya,
Gulmun ma donona vigi kaf ma ɦo gaa'a,
ki Salman ɦo Bet-Arbel goyo hay buura vi duur nala,
hay li ma nisi kirap sumda hiɗi guron gaa kuɗ sesiya.
15Kayni mi va ma min nemgi hay Betel ɗawni,
kuɗ jiw-zlata vigi ta suwi ŋolda.
Liyn fo goy foge. Mulla vi Israyel yalam dabawa.
Currently Selected:
HOSEYA 10: Massana
Highlight
Share
Compare
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
