HOSEYA 9
9
Yawta vi sa Israyel goy gorvo'o
1Nigi sum sa Israyella,
mak tuwgi a li firiɗi,
ciriygi noŋ gidi-gidi ki jaf-sum segen naɗi.
Kay nigi wulin muɗ tuwgiyawa viyuwu,
hay li ma nigi noy Lawn goyo.
Kay nigi min wurak ma liwisna hay muɗakŋa
ma to alkamaren hayamna kafe.
2Muɗak ma to wana,
hiɗi liy ma kesl gulda guldana as hobgiɗi,
niy gulda-guldana muɗ ɗawn kiɗa kigiya.
3Nisi ma lak hay nagata vi Ma-Vatɗin loɗi;
Sumuna vi Efrayim ma hot hay Egipte.
Hay Asiriya nisi ma ti tin ma liwisna.
4Nisi as a ɦok vin goy tam Ma-Vatɗina ki ɗifin nala loɗi,
kay nam may kir Ma-Vatɗin ŋaa loɗi,
ɗifin namna muɗ kir Ma-Vatɗin ɗawn
ki fun ma tum hay buur ma tiyn nala.
Kay sum sa ti fun hay buur ma tiyn kaf nisi liwisi.
Tina visi tun ɗawn kay tuwsiya,
nisi as a cuk hay ziyna vi Ma-Vatɗin hiɗi namɗi.
5Hay buur ma ŋulona ma li Yuldeta vi Ma-Vatɗina,
nigi ma li ɗawn litige?
6Ɗuwgiya nisi tuɗ zaw; kay nagat kuɗsi waŋ ɓulakiya.
Sum sa Egipten ka jaŋay kirsiya.
Mof ma vulsi liyn ma pisi hayna.
Sle ma kirsi ŋaa ŋolo ki gurjut nalana ma saŋ goyo.
Zigiyn ma day kulo baŋal guɗukŋa visiya.
7Buur ma kitat tuɗi ɗaw;
buur ma wurak joot tuɗi ɗaw,
sum sa Israyel irgi ma wa' yo.
Sa ma jobta nam ɦoyawa,
sa ma ŋusta cuki kalamna nam gurɗi goyo,
kay joota hiɗi ŋel-gatta vigi suwi ŋolo.
8Sumuna vi Efrayim jawt ta ganayt visiyawa,
kay nisi ka goboy tam Lawna,
may nisi sar goy hay liy mara'a.
Sa ma jobta nam mi jawt ta ganay voksita,
sa ma gawta hay ziyna vi busi Lawna.
9Nisi noŋ kaf cuki gaa hay ɓulak-goyta,
ki hay buura vi Gibeya nala.
Ma-Vatɗin humam ma gum kay jiw-zlata visiya,
nam ma ka kitat kisi kay sulukŋa visiya.
10Sum sa Israyella nan fisi ay fulu,
ki vuɗna vi gulda-guldan nala.
Sumaygi nan wisi kayn ki vuɗna vi gu-gumna
ma vuɗ goy jewn nala.
May nisiya, nisi tuɗi tam Baal-Pewor,
nisi vul tuwsi goy tam lawayn ma ceɗayn ma liwisna.
Nala nisi muɗ tuwsi bisi ki nam ma nisi minimna ay nala.
11Gajijita vi sumuna vi Efrayim
ma pir goy gine hiɗi nisi ki layta pir nala;
ca as cub goor loɗi,
ca as sli hay loɗi,
ca as vuɗ goor goy loɗi lay.
12La nisi wul gurona visiyawa,
jew a wulsi vat kayn nan ma yawsi goy kisiya,
hay li ma nan hinsi goyn ɗawn irsi ma wi'e.
13Sumuna vi Efrayim ay lakay hay liyn ma ŋaana,
ki nan cuk iran goy gine hay Tirus nala.
may nisi ka nar gurona visi hay liyn ma cisi goyna.
14Ma-Vatɗina naŋ vulsiya,
naŋ min vulsit mige?
Naŋ lisi a boy-misin suroɓ goy dok-dok,
soŋ miira vi boy-misin goy so'.
15Joo ma hay diksin kaf ɗek tuwam goy hay Gilgal,
kayni hay liy ma nan slisi hay dikanu.
Kuɗ lopna visi ma milena,
nan ma digiɗsi goy hay ziyna vanu.
Nan ma minsi loɗi;
sa ŋulona visi kaf muɗi ŋel gatta.
16Sumuna vi Efrayim fi wattawa,
so'olsi ma piy gaana so goyo.
Nisi ma vuɗ jaf loɗi.
La nisi fi guro kaw,
guro nisin sa kirsi ŋaana nan ma cisi goy mati.
17Lawna van ma noysi goyo,
kay nisi min hum kuɗumɗi,
Nala nisi merawa goy jar jaf-sumuna.
Currently Selected:
HOSEYA 9: Massana
Highlight
Share
Compare
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
