HEBRENA 8
8
Liyn ma peldetna ma wulina hiɗi bonota wulita
1May va ma ŋolla hay sle ma nay di kalamna ka ki kayn nala: Nay ka hiɗi mul ŋol ma-ɗifinna ma mus gaa gal ɓamta jufta vi zlamda-mulda vi gaŋeraŋ ma gajijita hay wuralawna; 2nam mi sa ma li lopna vi Lawna hay liyn ma peldetna, hay tabernaklena ma gasina kaw, ma Bum-sumuna kotomna, may kotom mi saɗi.
3Mul ŋol ma-ɗifinna kaf, tunum kay lopn kayn kay mar vulda hiɗi ɗifinna kaw. Nam yiya kay mar sle goyo kaw. 4May, lali nam ays kayn kay nagata, nam as muɗ mul-ma-ɗifin noŋɗi, kay nisi sa mar vulda kuɗ gatta ka lak'. 5Nisi girif sle ma ŋray ki sle ma ka hay wuralawna, ki ŋusam nala kaw, kuɗ gatta ta Musus fa'ay vi Lawni pa, hay li ma nam min kot tabernaklena: Ɗuwaŋ ŋaa'a, Lawna dumu, kay naŋ ma li slen pet ɗawn ŋray-ca kuɗ slen ma naŋ wumu kay hiɗiyta.#8:5 Ɗuw Kg 25:40. 6May wulini Kristu fi lop ma ŋol suw mul-ma-ɗifinna, nam muɗawa mi sa ma tap-jaara vi bonota ta ŋaa'a ŋol suwa, kay na' tunawa kay deŋga ma ŋaa suwna.
7Kay lali bonota ta jewta ay bay joota, kay na'ta liyn may kay gar ta ma'ta loɗi. 8Kuɗ kayni Lawna lawsi ɦiy ala:
Ɗuwgi buur ka ma'a, din Bum-sumuna,
liyn ma nan jun bonota wulita
hiɗi jafna vi Israyel,
hiɗi jafna vi Yuda kaw.
9Na' ma li ɗawn ki bonota ta
nan juna' hiɗi sumaysita naɗi,
hay buur ma nan yawsiyay goy hiɗi ɓanu,
kay kalsiyay goy hay nagata vi Egipte pa,
kay nisi kaw so tuwsi kay
lak hay bonota vanɗi,
Nan kaw human ciŋ kisiɗi,
din Bum-Sumuna.
10May kayni ti bonota ta nan min
tuna' jaran hiɗi jafna vi Israyel,
bugol buur namna kayni, din Bum-Sumuna:
nan ma kal gatta van kalaf hay yamda-wida visiya,
nan ma ɗom hay diksiya kaw;
nan ma mus mi Lawna visiya,
nisi ma lak si sumuna vanu may.
11Sa jarsiya ma hat niramna
ma hay nagata hiɗi nam kepna loɗi,
Sa as di tam ɓasulumna kaw ala:
Waŋ Bum-Sumunaɗi.
Kay nisi kaf ma wanu,
tun caw tam ma goora pa,
ta-ta tam ma ŋolla ma jarsina dab'.
12Kay nan ma lisi slugota
kay bay-ɗigerta visiya,
human ma gan kay sulukŋa visi loɗi.#8:12 Ɗuw Yer 31:31-34.
13Hay li ma nam yi bonota kayni wuliya, nam muɗ ta jewta busaya. May va ma liy busaya muɗi maari kaw, ka goboy vat goyo.
Currently Selected:
HEBRENA 8: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
