HEBRENA 9

Lopna vi ɗifin ma poora hay bonota jewta hiɗi ta wulita

Kg 25; 26; 40:17-33

1Bonota ta jewta, dita-gatta va' ta kuɗ girifta hiɗi liyn ma peldetna ma kay nagat ka'a. 2Kay nisi kot guɗukŋawa vatiya, hay liyn ma jewna ma yum ala liyn ma peldetna, va ma tun fitil kalamna, hiɗi tablena vi fun ma zlaray kalamna ay lakay haya. 3Goy bugol sligara ma gaɓay ma ma'na, ay mi liyn ma suwi peldetna. 4Kalaf haya, liyn ma ŋal urdina ma ora hiɗi arkena vi bonota ma tuwam kaf ŋuyi hiɗi or cusl', kalaf hay kayn dowayta ora ta manna haya, hiɗi zugulda ta goɗayta vi Aaron, hiɗi hambulla vi bonota kaw. Hay 5Kulo kay arkena, kerubena vi gajijita ay lak', kuluɓ yam zlamda-slugota#9:5 Zlamda-slugota tani hay Testament ta Busayta na' muɗi ala goɓolokona. Slv 16:15. hiɗi ŋusamu. Slen kayn nay as a di goy kalam kep kep wulinɗi.

6Hay li ma slen kaf kayn kotawa nala, muliyan-sa-ɗifinna as cuk kalaf dok-dok hay liyna vi tabernaklena ma jewna, hay li ma nisi li girifta. 7May hay liyn ma ma'na, kal kalaf kayn mi mul ma-ɗifinna na kep, sem kep hay busata, say hiɗi busuwna ma nam maram kalam nam kay tuwamu, lo kay joota vi sumuna kaw. 8Hay kayni Ŋusta-Peldetta ɗek goy ala: Hagata ta kal hay liyna ma suwi-peldetna bay mal tuwa, hay li ma tabernaklena ma jewna ay zaw tuwa. 9Kayni mi va ma ŋra kay liyna ma vaydina; nam ɗek ala sa ma li girifta hay tap-wida valamu, vulda hiɗi ɗifin ma lina as tuɗum tam pasiyakka noŋɗi. 10Lakŋi mi dita-gatta ma hay sliwna, ma law kay sle ma tina, cina hiɗi muzta mara'a mara'a, ma tuniya kay co ta-ta tam liyn ma kot slen goy hay liyam ɗigera.

11May Kristu maawa ki mul ŋol ma-ɗifinna vi slena ma ŋaana ma min ma'a, nam raw hay tabernaklena ma ŋol suwa, ma pasiyak suw kaw, ma koti hiɗi ɓam saɗi, kayn min di'e ma may jar sle ma koti tannaɗi; 12may hiɗi busuwna vi ɦu-gamalanɗi, hiɗi busuwna vi guro-luwaynaɗi kaw, hiɗi busuwam kay tuwamu, nam kal kalaf sem kep hay liyn ma peldetna. Hay na'ta nam vulay butta-goyta ta vatɗita. 13Kay la busuwna vi fok-gamalana hiɗi luway-jufayna hiɗi butuw-kuna vi put-gunayta ma nisi yamam kay sa liwisna, nam lisi goy peldet kay liwista ta goy jiy tuwsita, 14busuwna vi Kristu nam ŋol suwɗi su? Nam ma hay Ŋusta ta vatɗita vul tuwam goy bay joota tam Lawna kay tuwam ma ɗeŋŋa, kay muz tap-wida vay goyo kay lop ma mitina, a nay ma sun Lawna ma irina.

15Kay na'ta kayni, nam mi ma tap-jaara vi bonota ta wulita, kay nanige kaw mitta ma li'e kay but sumun goyo kay raw-goyta ta nisi la' kuɗ bonota ta jewta, nisi sa yiya fi bonota nisi fi deŋga vi vocota vatɗita.

16Kay la testamenta ka'a, la linigekaw mitta vi nam ma li testamenta li goy li'.#9:16 Hay tani testamenta ɗek bolda ma san gum mi gurona valamu hay li ma nam ka vun mitta. 17Kay testamenta as li dono kayn bugol mitta, may hay li ma san ka iriya, na' may li lop noŋɗi. 18Kay na'ta bonota busayta kay tuwa' kaw li lop bay busuwnɗi. 19Kay hay li ma Musus di vun-ma-gatna kep kep tam sumuna kuɗ gatta, nam yaw busuwna vi guro-luwayna hiɗi fok-gamalana hiɗi niyna, ɗuŋus ma slaw keŋ', hiɗi hisop kaw, yamam kay ɗerwella hiɗi sumuna kaw, 20Nam di'e: kayni mi busuwna ma Lawna di kalam tigina. 21Nam yaw busuwna kay tabernaklena hiɗi slen ma lopna vi girifta kaf ki kayn nala kaw. 22Kuɗ gatta, ŋol slen muzawa goyo hiɗi busuwna; nala la busuwna ɦok goyɗi, vulda gida mayɗi kaw.

Sulukŋa yaway goyo hiɗi ɗifinna vi Kristu

23La nanige kaw sle ma ŋray hiɗi sle ma hay wuralawna gasi ma liys poray ki kayn nala, kay slen ma gasi hay wuralawna kay tuwamu ma ɗeŋŋa min ɗifinna ma ŋaa suwa. 24Kay Kristu may kal kalaf hay liyn ma peldetna ma koti hiɗi ɓam sa'a ma sli ma gasina naɗi, may nam kal hay wuralawna kay tuwamu, kay ɗek tuwam goy wulini kaya vok Lawna. 25Nam may kal kalafi sem taray ca kay vul tuwam goyo sem ŋolo ki mul ŋol ma-ɗifinna kal kalafi hay liyn ma peldetna busata kaf hiɗi busuwna ma pulla naɗi; 26la naɗina, Kristu ci lastawa sem ŋolo hay tun cawta vi nagati pa. May wulini hay dabta vi liyna, nam vul tuwam goy sem kepe kay vat sulukŋa goyo hiɗi busuwna valamu. 27Kay ki koti kay sumuna kay mit sem kepe, bugol kayni kitata. 28Nala kaw Kristu ma vul tuwam goyo sem kepe kay yaw sulukŋa vi sumun ŋolo goyo, ma vul tuwam goy haraŋ sem ma'ta lo, hay liy namna ɗawni may kay lawta vi sulukŋa loɗi, may kay sa ka zamamu kay su'da visiya.

Currently Selected:

HEBRENA 9: Massana

Highlight

Copy

Compare