HEBRENA 6

1Kay na'ta hinay hatta ma gurayna ma jewna vi yoboyna vi Lawna ma kay Kristun goyo, tuɗay vokay tam pasiyakka, nay ma tun sem va mara gaa wuliya, kay: Hamda kay lopn ma mitina, 2vida hay Lawna, hatta vi baptisma, tunda-ɓamta, dayta-kulota vi sa mitina hiɗi kitata ta vatɗita loɗi. 3kayni mi va ma nay ma lumu, la Lawna hin liyna.

4May kay nisi sa haraŋa li tisi jew lina, sa jugo vulda ta may wuralawn pa jugona, sa muɗi tap hay Ŋusta-Peldetta muɗna,

5sa jugo yoboyn ma ŋaana vi Lawna hiɗi donota vi liyn ma min ma'a, 6nisi sa puk gaa'a, lop ŋolo kay hotta visiya hay hamda. Kay nisiya, nisi ɓal goora vi Lawna kulo kat gu-ma-grakŋa mara lo, muɗum zulo goy haraŋi. 7Kay hay li ma nagata li jafn ma ŋaana mi nisi sa ka zuma'na, kay ta ala na' ka ci niyn ma ka si ka'na dok-doko, na' fi bolda kuɗ Lawna pa. 8May la na' dayam mi zigiyna hiɗi olla, na' muɗi mi va ma waa'a, goboy kay fi be'da, ya' ma dab hay ŋal-goyta kaw.

9Sa hayan kigina, la numa di nala kaw, numa wi goy gasi haraŋ ala nigi ka hay gal ma ŋaana, ma tuɗgi tam su'da kaw. 10Kay Lawna may bay ɗigertaɗi; lopna vigiya, minda vigiya ta nigi ɗeka' goy kay semda valam hay lopna ma nigi lumu, ma nigi ka lum lo tam sa peldetna kaw, yalam as jok kaynɗi. 11May numa min kayn ala san gigekaw jargiya ma ɗek tuwam ciwer ta-ta tam dabta, kay cubta-sle'ta vigiya fi hob kulo hob'. 12Kay nigi ma muɗ nekɗi, may nigi ma sli kuɗ nisi sa hay vida hiɗi cubta ta ŋalda, fi yaw vocota ta deŋayta.

13Nala kaw, ki Lawna hay li ma nam li deŋga tam Abraham, nam yi va kalamu kay tuwam ma ɗeŋŋa, kay va mara ma ŋol suwumu ma nam as yi va kalamu hiɗi namu mayɗi, 14nam di'e:

Hay gasita nan min hin bolda kaŋ ŋolo,

nan ma biya jafna vaŋ kaw.#6:14 Ɗuw kayni hay Ct 22:16-17.

15Nala hay li ma Abraham cub hiɗi ŋalda cubna, nam fi va ma deŋay talamna. 16Kay sumuna yi va kisi hiɗi ma ŋol suwsina, va ma yi kamna, col dita visiya, vat ci-wayta kaf kaw. 17Kuɗ kayni hay li ma Lawna min vul vocota mi sa deŋga colay kisina, nam ɗek so'otta vi colda vi lawta valam ta ge'ɗita goy hay va mara'a, hay li ma nam yi va kalamu, 18kay kuɗ slen ma ge'dina ma', ma Lawna as ka sin hay noŋɗi, nay ma fi teŋ-irta dono'o, nay sa pir tam liyn ma ŋayna kay fi cubta-sle'ta ta ŋay taya.#6:18 Slen ma ma'na lakŋi mi deŋga hiɗi va ma yi kamna. 19Cubta-sle'ta na'ta, sey paawa gaa hiɗi na'a ki kawayn ma ɓal lumna nala, na' ta gasiya, dono'o kaw, co ta-ta kalaf jar sligar ma ɓuraw jar Tempella, 20liyn ma Yesu kalay hay jewe kaya, nam muɗi mul ŋol ma-ɗifinna ta-ta hay vatɗita, kuɗ zlaara vi jaf Melkisedek.

Currently Selected:

HEBRENA 6: Massana

Highlight

Copy

Compare