HEBRENA 5

1Kay na'ta, mul ŋol ma-ɗifinna kaf, vumi goy jar sumuna, tunum sun vok Lawna kay sumuna, kay mar vulda, kay li ɗifinna kaw kay sulukŋa. 2Nam as hum nisi sa wi vaɗi hiɗi nisi sa viyi goyna, kay nam kay tuwam kaw ka hiɗi maŋayta. 3Kuɗ maŋayta na'ta kayni, nam li ɗifinna kay sulukŋa valam kay tuwamu, li ɗifinna kay sulukŋa vi sumuna may. 4Sa as tun ŋolda kayni kay tuwam ma ɗeŋɗi; may san yumi mi Lawna, ki Aaron nala.

5Nala kaw, Kristu sli ŋolda kayni kay tuwamu kay muɗ goy mul-ma-ɗifinnaɗi, may mi nam ma diy talam ala:

Naŋ mi goora vanu, nan vuɗaŋawa vaydi.#5:5 Fi kayni hay Nul 2:7.

6Lo ki nam di hay liyn mara kaw ala:

Naŋ mi mul-ma-ɗifinna ta-ta hay vatɗita, kuɗ zlaara vi jaf Melkisedek.#5:6 Fi kayni hay Nul 110:4.

7Kayni nam ma, hay buura vi irita valamu hay sliwna, hiɗi siwelda ŋolo hiɗi zimiyna kaw, nam mar siɗawta hiɗi tiyta tam nam ma as kay suɗum goyo kay mitta. Siɗawta valam humi hum kay hot-yamda valam ta gaata kuɗ Lawna. 8Nam mi goora, nir na'ta kep nam cuk hum-vunda kalamawa kay nam ci lasta. 9Hay li ma nam li goy pasiyak lina, nam muɗi bum su'da vatɗita kay nisi kaf sa hum kuɗumna, 10Hay li ma Lawna di goy kalam ala nam mul ŋol ma-ɗifinna kuɗ zlaara vi jaf Melkisedek.

11Slen ka kuma ŋolo kay di kay lawt kayni, slena ma hum lopo ma sa as dum cawam goyɗi kaw, kay nigi muɗi hum lopo. 12Lali jar liyn lakŋi, nigi as muɗ goy sumay-hatta, hatta, may wulin lo nigi ka gar kay sa hatgi hatta ma gurayna hay yoboyna vi Lawna: Laliyan nigi coowa hay liyn ma nigi garam mi miira, may mi tin ma ɗeŋŋaɗi. 13Kay gige kaf ma ka vun miira nam bay hat wida vi yoboyna vi ɗigerta, kay nam mi goorgoor tuwa. 14May tin ma ɗeŋŋa kayni nam kay sum sa niyina, kay nisi sa, hay lita varta visi hatay yali kay ɓuraw jar ŋaata hiɗi joota.

Currently Selected:

HEBRENA 5: Massana

Highlight

Copy

Compare