HEBRENA 4

1Kay na'ta deŋga kay kal ma kalaf hay tun-sukka ka'a, kay sa jargiya ma var kay co goy bugolɗi. 2Kay labara ma firina kusi taya ki tisi nala kaw. May yoboyna ma nisi humumna li va ma ŋaa'a tisi noŋ ne'ɗi, kay sa humumna may vum hiɗi vidaɗi. 3Kay nay sa viyna, nay ka cuk kalaf hay tun-sukka ma dita di kalam ala:

Nan yi va kanu hay ɦiyda vanu,

Hay gasita, nisi ma cuk kalaf

hay tun-sukka vanɗi.#4:3 Ɗuw kayni hay Nul 95:11. Nir na'ta kepe lopna vi Lawna liyawa hay tun cawta pa;

4Kay nam di hay liyn mara kay buur ta siɗiyata ala:

Lawna tun sukam kay lopna valam kaf,

hay buur ta siɗiyata.#4:4 Ct 2:2.

5Lo hay liyn tani:

hay gasita, nisi ma cuk kalaf hay

tun-sukka vanɗi.

6Nala, ki koti kay sum sara'a kay cuk kalaf haya, nisi sa labara ma firina kusi tisi jewna fi cuk kalaf hayɗi, kuɗ bay-vida visiya,

7Lawna col buur tara lo, vaydi, hay li ma nam di goy jewe hay vun David, hay liyn ma kalay bugol ŋolo ala:

Vaydi la nigi humum delemu,

so'otgi dikgiɗi.

8Lali Yosuwa vulsi tun-sukka vuliya, Lawna as law kay buur mara bugol kayni loɗi. 9Kay na'ta tun-sukka vi sabatna ka hini kay sumuna vi Lawna. 10Kay sa ma kal kalaf hay tun-sukka vi Lawna tun sukam kay lopna valamu, ki Lawna tun sukam kay lopna valamu nala kaw. 11Gosay tuwaya kay cuk kalaf hay tun-sukka na'ta kayni, a sa ma nig gaa'a, hay li ma nam sli kuɗ bay-humda na'taɗi.

12Kay yoboyna vi Lawna ka iriya, nam dono'o kaw, siyam hiliw hiliw' suw kew-gaferaŋa ma siyam hay galam ma' pet nala, nam jik ta-ta ɓuraw ciwta hiɗi Ŋusta, gaslna hiɗi mul-zokŋa kaw, nam ka kitata kay darta hiɗi varta vi dikga. 13Va ma koti marige kaw, ma may goy vokom haraŋɗi mayɗi: Slen kaf ka goy nala'a, lakay goy haraŋi vok ir nam ma nay ma di lawta vay goy vokomna.

Yesu Kristu nam ŋol suw muliyan ŋulo sa-ɗifinna vi bonota ta jewta

14Kay nay ka hiɗi mul ŋol ma-ɗifinna kepe, ma raway hay dukalawna, Yesu goora vi Lawna, lakay ɗeŋe hay vida vaya. 15Kay nay ka kayn hiɗi mul ŋol ma-ɗifinna ma nagay kay tap hiɗi maŋayta vayɗi naɗi, may nam ma ay vok nemda ŋray ca ki nay nala vok slen pet, may li sulukɗi. 16ɦuray kulo'o hiɗi vida tam zlamda-mulda vi slugota, kay nay ma muɗ kiram hawi, fi slugota kaw, a nam ma gutaya hay liyamu.

Currently Selected:

HEBRENA 4: Massana

Highlight

Copy

Compare