HEBRENA 3

Yesu Kristu ŋol suw Musus hiɗi Yosuwa

Mat 21:33-38

1Kay na'ta ɓosiyonna sa peldetna, sa ir ɓurawta vigiya ka hay yita ta may wuralawn pa, tungi varta vigi kay apostolla hiɗi mul ŋol ma-ɗifinna ma vida vay colay kalamna, Yesu. 2Nam vi gasi kuɗ nam ma tunum kay kayni, ki Musus li nala hay ziyda vi Lawna kaf, 3kay nam ŋami nagay kay gajijita ŋolo suw Musus, ki sa ma in ziyna selem tiy ŋolo suw ziyda kay tuwa'a nala. 4Kay ziyda tarige kaf kota' mi sa'a, may nam ma kot slen petna kayni mi Lawna. 5Musus li sunda hay gajijita hay ziyda vi Lawna kaf, kay li di-goyta kay slen ma min diys goy bugolda. 6May Kristu nam kayni ki Goora kay ziyna valam nala. Nay mi ziyna valamu, la nay vi vida hiɗi cubta-sle'ta ta nay subur tuway ka'ta dono'o ta-ta hay dabta.

7Kay na'ta, ki Ŋusta-Peldetta di nala:

Vaydi la nigi ka humum delemu,

8So'ot dikgiya ki hay liyna vi yawta-kulota,

hay buura vi nemda hay fulda naɗi,

9hay li ma sumaygi nemanu kay wakanu,

nisi wi lopna vanu ir busat dok-fiɗi,

10Kay na'ta dikan roŋ tam jafna kayni,

nan di'e: diksi viy goy dok-doko,

nisi may wi hagata vanɗi.

11Nan yi va kanu hay ɦiyda van ala:

hay gasita, nisi ma cuk kalaf hay tun sukka vanɗi.#3:11 Fi kayni hay Nul 95:7-11.

12ŋomgi tuwgi ŋaa'a ɓosiyonna, kay sa jargiya ma li hiɗi dikga joota hiɗi bay-vidaɗi, a nam ma cal goyo hiɗi Lawna ma irinɗi. 13May hay buurta kaf gatgi jar-tuwgiya, hay li ma sa fi di ala: Vaydi! Kay sa jargiya ma so'ot kuɗ ɗutta vi sulukŋaɗi. 14Kay nay ay sa muɗi tap hay Kristu, la nay vi vida vay ta jewta dono'o ta-ta hay dabta,

15Hay li ma dit ka di'e:

Vaydi la nigi ka humum delemu,

so'otgi dikgiya ki hay liyna

vi yawta-kulota naɗi,#3:15 Nul 95:7-8.

16Nisi sa, hay li ma nisi humi hum' may nisi nef Lawna, nisi kayn si sarige? Kayni si nisi sa kalay goy hay Egipte pa hiɗi Musus ɗisu? 17Sum sa dikam roŋ tisi ir busat dok-fiɗi kayni tiɗ gige? Kayni si sa li suluku, sa mitis goy hay fulda ɗisu? 18Sa nam yi va kalam ala nisi ma cuk hay tun-sukka valamɗin si sarige? Kayni tam nisi sa min humum vunamɗina ɗisu? 19Nay kaw ɗuway hawtige, nisi fi cuk kalafɗi kayn kuɗ bay-vida visiya.

Currently Selected:

HEBRENA 3: Massana

Highlight

Copy

Compare