HEBRENA 2

1Kay na'ta nay ma li ŋal ŋol suw asa kay slen ma nay humumna, kay nay ma ba goy waa ɦawaɗi. 2Kay la yoboyna ma sa Sunda-wuralawna kusumna colay dono'o, la raw-goyta hiɗi ŋel-vunda kaf fi wurakŋa valamawa hay liyam ɗiger kaw, 3nay fi pir goyo nanige, la nay hin su'da ta ŋolda nala goyo? Su'da na'ta, Bum-Sumuna di goy ka' jew pa, ɗeki goy haraŋ taya kay sa huma'ay jewna, 4Lawna vul donot kay di-goyta visiya hay ɗekka, hay slen ma gul-yalda, hay slen ma suw mu'da ŋolo kaw, hay ɓurawta vi Ŋusta-Peldetta ta vul kuɗ minda va'a.

5May nagata ta min ma'a ta numa ka law ka'ta Lawna may tuna' gaa kuɗ sa sunda-wuralawnɗi. 6May sa kep li di-goyta ki kayn nala hay liyn mara ala:

San kayn mi gige, a humaŋ ma gaŋ kalamu?

Lebo goora vi sana mi gige a naŋ cuk iraŋ kalamu?

7Naŋ lum goy ir kiɗay tam sa sunda-wuralawna ir liyn neeɗa,

naŋ tunum bogoray ma gajijita hiɗi ma koldawa kalamu,

naŋ musumawa kulo kay lopna vi ɓaŋ kafe,

8naŋ cuk slen kaf gaa kuɗ selemu kaw.#2:8 Ɗuw Kayni hay Nul 8:5-7.

Hay li ma nam cukum slen kaf gaa kuɗ selem cukŋa, Lawna hin va mara goyo bay tun gaa kuɗumu may loɗi. 9May nay ɗuw nam ma ay koti ir liyn neeɗa kiɗay tam sa Sunda-Wuralawna, Yesu, kuɗ mitta ta nam fi lasta haya, nam fi bogorayna vi gajijita hiɗi kolda, nala kuɗ slugota vi Lawna, nam jugo mitta kay kafe. 10Kay kayni hay liyamu kay nam ma slen pet li'e hayamu, ma slen pet lakay kayn kalamu kaw, nam ma mar gurona ŋolo tam gajijita, yawsi kulo tam pasiyakka, hay lasta muɗi bum su'da visiya.

11Kay nam ma lisi goy peldete hiɗi nisi sa liy goy peldetna, nisi kaf may hay kepe. Kuɗ na'ta kayni, nam li zulo'o kay yisi ala ɓosiyomna loɗi. 12Hay li ma nam di ala:

Nan ma di goy kay semda vaŋu tam ɓosiyonna,

nan ma vulaŋ suburta jar tokŋa.#2:12 Ɗuw kayni hay Nul 22:23.

13Lo:

Nan ma tun varta van kaf hayamu.

Lo,

nan zawni, nan hiɗi gurona sa Lawna vulantina,#2:13 fi kayni hay Es 8:17-18.

14Kay na'ta ki gurona ka tapay kep hay busuwna hiɗi sliwna, nam kaw, ŋray ca, tapawa haya, kay nam hay mitta fi kirap nam ma donota vi mitta ay kalamna, min di'e: mi Matna. 15Kay but goyo nisi kaf sa, hay poyta visiya ay juni gorvo kuɗ narta vi mitta. 16Kay nam ma kayni, may kay gut kuɗ sunda-wuralawnɗi, may nam ma kayni kay gut kuɗ gurona vi Abraham. 17Kay na'ta nam ma muɗ ŋray hiɗi ɓosiyomna, hay slen kaf, kay nam fi li goy mul ŋol ma-ɗifinna, ma slugona, ma gasina kaw hay lopna vok Lawna, kay li poora kay sulukŋa vi sumuna. 18Kay kuɗ ta ala nam kay tuwamu fi lastawa hay li ma nam ay vok nemda, nam as gut kuɗ nisi sa ka vok nemda.

Currently Selected:

HEBRENA 2: Massana

Highlight

Copy

Compare