EZEKIYEL 9

Kitata kay sum sa hay Yerusalem

1Bugol kayni nam siwel hiɗi delem kulo ŋolo hay humanu ala: Nigiyay goboyo, nigi sa lopna vuli hay ɓigiya kay ɓulak hoyok-ziyna. Gigekaw hiɗi vana valam ma cim sumuna hay ɓalamu ɓalamu. 2Ɗuw na kayni, sumun karkiya co ay hay hagata vi vun-gala ma ŋolla, ma vunam gal gaana pa, gigekaw hiɗi vana valam ma ɓulak liyna hay ɓalamu ɓalamu, sa mara ka jarsi kep cuki hiɗi sligar-barawna, ɗota ka tam kantina valamu. Nisi co'o, nisi lak goboy tam giwin-ma-ɗifinna ma wayna. 3Gajijita vi Lawna vi Israyel fokay goy kay kerubena ma na' ay musi kalamna pa, na' kal kat vun-ziyda, Ma-Vatɗina yi sa ma cuki hiɗi sligar barawna, ma ɗota ka tam kantina valamna. 4Ma-Vatɗina di talamu: Jikaŋis kulo jar hoyok-ziyna, kulo jar Yerusalem, naŋ ma ɓir ɗota hay vok sum sa ka ci lasta, sa ka tiya kaw, kuɗ liwista kaf ta sumun ka la' haya'ta. 5Lo, nan hum kayni nam ka di tam sum segena ala: Tuɗgis bugolomu hay hoyok-ziyna, calgi sumuna; nigi ma wisi hawsiɗi, nigi ma vi ŋalgi tisiɗi kaw. 6Nigi ma cisi goyo, ta-ta cimsi goyo kaw, sa maariyana, joriyona, wayana, gurosgurayna hiɗi boyna; may sum sa voksi ka ɓiriyna nigi ma tun ɓigi tisiɗi, nigi ma tun cawis tam liyna van ma peldetna pa. Nisi tun caw tam sa jufayna, sa maariyan nisina sa ka vok ziyda. 7Nam di tisiya: muɗgi hay ziyd liwisi, hobgi wur-daŋŋa va'a hiɗi tuw ma mitina, cukgi goyo. Nisi cuki goyo cal sum sa hay hoyok-ziyna.

8Hay li ma nisi ka cala, nan ka coli hay liy namna zaw kaw, nan dab vokan gaa'a, nan ka siwel ala: Hih! Bum-Sumuna Ma-Vatɗina, caw sumuna vi Israyel ma hinina naŋ min vatam goy kafe su? Naŋ min gi ɦiyda vaŋ goy kay Yerusalem kaf su? 9Nam di tanu: Joota vi jafna vi Israyel hiɗi Yuda kalay ŋolo ŋolo; nagat hobi hiɗi sa ci matna, hoyok-ziyn hobay hiɗi law ma gunina, kay nisi di'e: Ma-Vatɗina noy nagatawa goyo, Ma-Vatɗin may wi noŋɗi. 10Nan kaw, nan ma wisi hawsiɗi, nan ma vi ŋalda van katsiɗi, nan ma gisi lopna visi gaa kisiya. 11Ɗuw na kayni, sana ma cuki hiɗi sligar barawna ma ɗota ka tam kantina valamna ka vul labara ala: Va ma naŋ dan kalamna nan lumiyawa.

Currently Selected:

EZEKIYEL 9: Massana

Highlight

Copy

Compare