EZEKIYEL 10

Veŋ ma kuta. Ezekiyel wi keken lo

1Nan ɗuw goyo, nan wi hay dukalawn ma wiŋŋa ma ka kulo kay kerubena, van kep sli hiɗiyn safir nala; kulo kalamu van kep sli zlamda-mulda nala. 2Ma-Vatɗina di tam sa ma cuki hiɗi sligar-barawna ala: Kalaŋ kalaf jar ɦiwliŋŋa gaa kuɗ kerubena, hobaŋ ɓaŋ hiɗi veŋ ma ku keŋŋa ma naŋ ma yawamay goy jar kerubena, naŋ ma wasam goy kay hoyok-ziyna. Nam kalays kiran na ɗaw.

3Sa kerubena ka lakay hay gal ma jufna vi ziyda hay li ma san co'o, ɗugulla hob wur-daŋ ma kalafna. 4Gajijita vi Ma-Vatɗina jikay kulo kay keruben pa, na' co vun ziyda; ziyda hob hiɗi ɗugulla, wur-daŋŋa vi ziyda hob hiɗi haraŋa vi gajijita vi Ma-Vatɗina. 5Suwana vi gilaŋat kerubena san as humum ta-ta goy hay wur-daŋ ma goy jiyna, ŋray ca ki della vi Lawn ma Gaŋeraŋ-Petna hay li ma nam ka lawa nala.

6Ki kayn nala Ma-Vatɗina vul hagata tam sa ma ka cuki hiɗi sligar-barawna ala: Slaŋ kuta kalaf jar ɦiwliŋŋa, jar kerubena; san kayni kaliya, nam col goboy tam sem-kekena. 7Bugol kayni kerubena mara'a meɗ ɓalam goyo jar kerubena tam kuta ta ka jar kerubena; nam sli kuta, vula' hay ɓam sa ma cuki hiɗi sligar-barawna. Nam sli kuta, kalay goyo. 8Hay gilaŋat kerubena, ɓamta ka'a sli ɓam sa-wurana nala.

9Nan ɗuw kayni, sem-keken ka fiɗi goboy tam kerubena, sem-keken kep ka tam kerubena kep kepe, sem-keke namna wile ki hiɗiyn krisolit nala.

10sem-kekena fiɗi pete sli tuwam nala; sem-keke hena ɗuw ki nam ka kulo jar sem-keke hegen nala. 11Hay li ma nam ka tuɗ vokomu, nam tuɗ hay galam ma fiɗin pete, hay li ma nam tuɗa, nam may cal goyɗi, nam tuɗ kayni hay liyn ma yam kerubena ka piy hayna, hay tu'da valamu nam may cal goyɗi. 12Tuw keruben noŋ kaf, ŋorsiya, ɓisiya hiɗi gilaŋatsiya, ay hobay hiɗi ir cep-cep', ira ŋuyi talam kafe, sem-kekena nala kaw, sem-kekena visi fiɗi pete. 13Nan jak human kayni, nisi ka yi sem-keken ala hiwliŋŋa. 14Keruben marige kaw ka hiɗi vokom fiɗi fiɗi. Vokŋa vi ma jewna mi vokŋa vi kerubena, vokŋa vi ma ma'na mi vokŋa vi fiɗina mi vokŋa vi bakŋa. 15Kerubena jikay kulo'o. Kayni mi muura ma nan wumay goboy hiɗi niy-lumna Kebar. 16Hay li ma keruben tuɗ voksiya, sem-keken ka tuɗ galsiya, hay li ma keruben meɗ gilaŋatsi goyo kay fok kulo'o kay nagata, sem-kekena ma ka galsina may cal goy noŋɗi. 17Hay li ma nisi laka, sem-keken laka, hay li ma nisi fok kulo'o, sem-keken fok kulo hiɗi nisiya, kay ŋusta vi muuriyana ay haysiya.

18Gajijita vi Ma-Vatɗina fok goy hay vun-ziyda, na' tuɗ mus kulo kay kerubena. 19Kerubena but gilaŋatsi goyo, nisi fok kulo kay nagata, nisi kal kayni nan wisi goy haraŋ, sem-kekena ka tapay kuɗsiya. Nisi laka hay vun-ziyda vi Lawna hay gal ma kuɗuwna; gajijita vi Ma-Vatɗina ay kulo kisiya. 20Kayni mi muuriyana ma nan wumu gaa kuɗ Lawna vi Israyel goboy hiɗi niy-lumna Kebar, nan wi ala kayni si kerubena. 21Gige gige jarsiya vokom ay fiɗi fiɗi, gige gige jarsiya gilaŋatam ay fiɗi, ɓam-sana ay kay gilaŋatsiya. 22Voksiya sli vok kerubena ma nan wum goboy hiɗi niy-lumna Kebar nala; nam ay sli tuwam nala. Si nisi kay tuwsi noŋo. Gigekaw tuɗis kayn vokom ɗiger.

Currently Selected:

EZEKIYEL 10: Massana

Highlight

Copy

Compare