EZEKIYEL 8

Girifta vi Lawayn waana hay Tempella

1Van li nala, hay busata ta karkiyata, hay buurta vaslta vi til ma karkiyana, hay li ma nan ka musi hay ziyna van dam', sum sa maariyana vi Yuda ka lakay goy vokan lak' kaw, hay na'ta Bum-Sumuna Ma-Vatɗina kal donota valam hayanu. 2Nan ɗuw na kayni, van vul tuwam kiranu, sli kut nala, kut tun cawis tam furam pa ta-ta gaa dab', va hena wile ki wayta ta tuwa' gorayta nala, tun cawis tam furam pa ta-ta kulo kalam dab'. 3Van ki ɓamta nala nam meɗemay goyo, nam vi vun ɗuŋus ma kanna. Ŋusta slan kulo'o jar nagata hiɗi dukalawna, hay ɗekka ta Lawn ga'ayta, na' ziyan ta-ta con hay Yerusalem, hay vun-gala ma kalafna, hay gal ma gaana, hay liyn ma va ma sli tuw hunayt nala ka haya, va ma zut Ma-Vatɗina kay muɗ ɦiya. 4Nan ɗuw kayni gajijita vi Lawna vi Israyel ka'a, ŋray ca ki nan wum hay lokŋa nala.

5Nam di tanu: Goora vi sana: Poŋaŋ iraŋ kulo'o hay gal ma gaana, nan poŋ iran kulo'o hay gal ma gaan kayni, iran wi lawayn ma waana vi hunayta hay gal ma gaana vi vun-galana vi giwin-ma-ɗifinna, hay vunam ma kal kalafna. 6Nam di tanu: Goora vi sana, slen ma nisi lumna kayni naŋ ka wum su? Kayni ti liwista ŋolda ta gurona vi Israyel ka la' tani, ta zutanu kay nan ma vi tuwan goy gine'e hiɗi liyn ma peldetna vanu. May naŋ ma wi liwis ma ŋulo ma hena lo.

7Bugol kayni nam tuɗan kalafi hay wur-daŋŋa. Nan ɗuw na kayni, baŋa ka kir gulmunna zaw. 8Nam di tanu: Goora vi sana, zlurokaŋ baŋana, nan zlurok baŋan na kayni, vunam goy mali ɗaw'. 9Nam di tanu: Kalaŋ kalafi, ɗuwaŋ liwista ta joo ŋolta ta nisi ka la' tanta tige. 10Nan kal kalafi, nan ɗuw na kayni, iran cuk kay sle ma ɦarmatna hiɗi muuriyan ma liwisna kuɗ batam kaf, hiɗi lawayn ma waana ma hay ziyna vi Israyel kaw, kaf ka ɓiriy kulo'o, ŋuyi duk gulmunna kafe. 11Sum sa maariyana dok-siɗiya kuɗ jafna vi Israyella, Yaazaniya goora vi Safan ka jar sum nisina, nisi ka lakay vok lawayn ma waana namna, gigekaw hiɗi va ma ŋal urdin hay ɓalamu, urdi ma hisna ka pat nuk ma ŋol kulo'o. 12Nam di tanu: Goora vi sana, slen ma sum sa maariyana sa hay jafna vi Israyel ka lum hay jufunda kayni naŋ ka wum su? Gigekaw hay ziyna valamu valamu, ziyna visi ka hobay hiɗi sle ma ceɗayna. Nisi ka di hay diksi ala: Ma-Vatɗina may way noŋɗi, Ma-Vatɗina noy nagatawa goyo. 13Nam di tanu: Naŋ ma wi liwis ma ŋulo hena ma nisi ka lumna lo.

14Nam tuɗan hay vun-galana vi ziyda vi Ma-Vatɗina, hay gal ma gaana. Nan wi kayni, boyna ka molay gaa hiir', ka tiy Tamuz.#8:14 Tamuz lawn ma waana vi sa Mesopotamiyana. 15Nam di tanu: Goora vi sana, naŋ ka wi su? Liwista ta ŋol suw kaynta naŋ ma wa' lo.

16Nam tuɗan hay wur-daŋ ma kalafna vi ziyna vi Ma-Vatɗina. Nan wi kayni, hay vun Tempella vi Ma-Vatɗina, jar diɓira hiɗi giwin-ma-ɗifinna, sumun ka ir ki dok-ma' yam vasl nala, ŋorsi muɗi mi Tempella vi Ma-Vatɗina, irsi ka muɗi gal kuɗuwu; nisi ka girif fatta hay gal kuɗuwu. 17Nam di tanu: Goora vi sana, naŋ ka wi su? Liwista ta gurona vi Yuda ka la' tanta kayni na' may assiɗi su? Lo nisi hob nagatawa hiɗi ɦawlata, ka ɓulakan dikanu kayni litige? Nisi ka nar hum-gomon kulo cinsi goboy lo. 18Nan kaw, nan ma muɗ ɦiya, nan ma wisi hawsi loɗi, nan ma vi ŋalan loɗi; hay li ma nisi ma siwel hiɗi delsi kulo ŋolo hay humanu, nan ma humsiɗi.

Currently Selected:

EZEKIYEL 8: Massana

Highlight

Copy

Compare