EZEKIYEL 32
32
Tiyta kay Egipte
1Hay buurta jewta vi tilla ma doogo yam ma'na, vi busata doogo yam ma'ta, Ma-Vatɗina ka di yoboyn tan ala:
2Goora vi sana,
gaŋ nul ma tiyna kay Farawn mulla vi Egipte.
Naŋ ma di talam ala:
Naŋ Egipte ŋray ca hiɗi goor-zlona jar jaf-sumuna,
naŋ ŋray ca hiɗi hurum ma goloŋ hay niy-lum ma ŋolla,
naŋ ka sluɓ jar niy-lumna vaŋu,
naŋ ka doɓ niyna hiɗi seŋu,
naŋ ka ɦiwir billa.
3Ki kayn nala Bum-Sumuna Ma-Vatɗina di'e:
Nan min was dena van goy kaŋu,
hay tokŋa vi sumun sa molay ŋolo,
nisi ma niraŋ kulo'o hay baɗayta vanu.
4Nan ma gaŋ gaa kay nagata,
nan ma meɗaŋ goy hay sinena;
nan ma mol layayn ma dukalawn kaf gaa kaŋu,
muuriyan ma gaa kay nagat kaf
nan ma hobom hayam hiɗi naŋu.
5Nan ma lakaŋ sliwaŋ kulo kay hiɗiyna,
nan ma hob lokŋa hiɗi sa mitina.
6Nagata ta naŋ ka mus haya'ta,
nan ma hoba' hiɗi busuwaŋu,
ta-ta kulo kay hiɗiyna,
zul-hiɗiyna naŋ ma hobomu.
7Hay li ma nan teweŋawa goyo,
nan ma muɗ dukalawn jufunu,
nan ma muɗ mislekŋa goy jufunu,
nan ma duk ir fatta hiɗi ɗugulla,
tilla ma vul haraŋa valam loɗi.
8Kuɗaŋ naŋu slen ma vul haraŋa hay dukalawn kaf,
nan ma muɗum jufunu,
nan ma gi jufunda gaa kay nagata vaŋu,
din mi Bum-Sumuna Ma-Vatɗina.
9Nan ma ɓulak dik sumun ŋolo,
hay li ma nan ma mar labara kay ɓulakka vaŋu jar jaf-sumuna,
hay nagata ta naŋ may wa' jewɗi.
10Nan ma muɗ jaf-sumun ŋolo ɦuyum kuɗaŋ naŋu,
muliyana visiya narta ma kal haysiya kuɗaŋ naŋu,
hay li ma nan ma wileɗ kewta van kulo kisiya;
tuwsi ma visi bat-bat' hay liyn kaf,
gigekaw kay irita valamu valamu,
hay buur ma naŋ ma nig gaana.
11Ki kayn nala Bum-Sumuna Ma-Vatɗina di'e:
Kew-gaferaŋa vi mulla vi Babilon ma calaŋu.
12Sumuna vaŋ sa gu' gu'na nan ma calsi goyo,
hiɗi kew-gaferaŋa vi sum sa jufay sa donona,
sum sa ɦawlat hay diksi suw jaf-sumun kafna,
ma vat subur-tuwta vi Egipte goyo,
sumuna visi sa gu' gu'na kaf ma ciys goyo.
13Farayna vaŋu ma goloŋ kel niy-lum ma ŋolla
nan ma cum goy kafe;
sem sa as doɓ niyn loɗi,
sem muur as doɓ niyn loɗi kaw.
14Nala nan ma tun niyn gaa'a,
nan ma hinim riŋ goyo ki mula nala.
Din mi Bum-Sumuna Ma-Vatɗina.
15Hay li ma nan ma hin nagata Egipte goy ɦawa hiweŋ',
hay li ma slen ma hay nagatna nisi ma yawam kafe,
hay li ma sum sa ziy hayna nan ma calsi goy kafe,
hay na'ta nisi ma wi ala nanu mi Ma-Vatɗina.
16Kayni mi nul ma tiyta,
nigi ma gumu;
guro-boyna vi jaf-sumuna ma gi nul namna;
nisi ma gi nul namna kay Egipte,
hiɗi sumuna va' sa gu' gu'na kafe.
Din mi Bum-Sumuna Ma-Vatɗina.
17Hay buurta doogo yam vaslta vi tilla kuɗ busata doogo yam ma'ta, Ma-Vatɗina ka di yoboyn tan ala:
18Goora vi sana,
tiyaŋ tuwaŋ kay sum sa gu' gu'na vi Egipte,
nisiya hiɗi guro-boyna vi jaf-sum sa donona,
naŋ ma jiksi gaa hay liyn ma zulla vi nagata,
hiɗi nisi sa jik gaa hay zulla.
19Naŋ suw segen hiɗi jifiyt su?
Jikaŋis gaa'a,
nisi ma buraŋ gaa jar sa bay ka-gosayna,
20nisi ma cuk gaa'a jar nisi sa kew-gaferaŋa jiksina.
Kew-gaferaŋa vuliya,
tangi Egipte hiɗi sumuna va' sa gu' gu'na goyo.
21Sa donona sa wi duura,
hiɗi nisi sa ays gut kuɗsiya,
ma di yoboyn tisiya goy hay liyna vi sa mitin pa ala:
Nisi jikiyawa gaa'a,
nisi burawa gaa'a,
nisi sa bay ka-gosayna,
kew-gaferaŋa calsiyawa;
22mul ma Asiriyana hiɗi vokŋa valam ma gu' gu'na ka tani,
zulla visi ka ŋuyi tani,
nisi kaf calay kay kew-gaferaŋa,
si sa kew-gaferaŋa cisi ayna.
23Zul ma nam piy hayamna ka gaa kuɗ dew nagata ma wiŋŋa,
sojena valamu ka ŋuyi gal zulda valamu,
nisi kaf jiki kay kew-gaferaŋa,
ciy goyo kay kew-gaferaŋa.
Nisi sa jewe ay gi narta hay dik sum sa irina.
24Ɗuwgi mul ma Elamna hiɗi sumuna valam sa gu' gu'na,
ŋuyi kat zulla valamu,
nisi kaf jiki hiɗi kew-gaferaŋa;
nisi cuki gaa'a vok kew-gaferaŋa,
nisi jiki gaa'a bay ka gosaya,
Nisi sa ay gi narta hay nagata vi sum sa irina,
nisi ziy zulota visiyawa kuɗ tuwsiya,
hiɗi nisi sa jik gaa hay zulla.
25Nisi kot liyn ma buura valamu jar sa mitina,
hiɗi sumuna valam sa gu' gu'na,
zulla valam ka ŋuyi talamu,
nisi sa bay ka-gosayn kaf kayni cisi mi kew-gaferaŋa,
kay narta ta kuɗsita ka meray goy hay nagata vi sum sa irina,
nisi ziy zulota visiyawa kuɗ tuwsiya,
hiɗi nisi sa jik gaa hay zulla;
nisi ka zlaray jar sa ciy goyna.
26Ɗawni mul ma Mesek,
mul ma Tubal hiɗi vokŋa visi ma gu' gu'n ka'a,
zulla visiya ka zlaray katsiya,
nisi sa bay ka-gosayn kaf kayni calsi mi kew-gaferaŋa,
kay nisi ka gi narta visiya gaa kay nagata vi sum sa irina.
27Nisi may bur gaa kuɗ tuwsi hiɗi sum sa dononɗi,
nisi sa bur gaa'a jar sa bay ka gosayna.
Sum sa donona jiki gaa'a hay liyna vi sa mitina,
hiɗi sle-ma-duura visi hay ɓisiya,
nisi tunsi kew-gaferaŋa visi gaa kuɗ yisiya.
May jiw-zlata visiya na' zlubak tam zoksiya.
Kay narta kuɗ sum nisi sa donona
mus hay nagata vi sum sa irin ŋolo.
28May Egipte kaw ma toys goyo jar sa bay ka gosayna,
sum sa hayna ma buris gaa
jar nisi sa kew-gaferaŋa vatsi goyna.
29Sum sa Edomna,
mulla visiya hiɗi sa yerimana visi kafe,
hiɗi kursulita visi pet kaw,
nisi lakay jar nisi sa kew-gaferaŋ cisi goyna;
nisi buri gaa hiɗi sa bay ka-gosayna,
hiɗi nisi sa jik gaa hay zulla.
30Ka ɗawn kayni si sa ŋulona vi gal ma gaana
hiɗi sa Sidonna kaf,
nisi sa jik gaa jar sa ciys goyna,
zulo ŋolo,
hiɗi narta ta nisi ays ga' hay dik sumun kafta kaw;
sum nisin sa bay ka gosayna buri gaa,
hiɗi nisi sa kew-gaferaŋa cisi goyna,
nisi ziy zulota visi kuɗ tuwsiya,
hiɗi nisi sa jik gaa hay zulla.
31Farawn wisi ɗawni,
iram ma teŋa kay sojena valam sa gu' gu'na,
sa falamna sa kew-gaferaŋa cisiya,
hiɗi sojena valam noŋ kafe,
din mi Bum-Sumuna Ma-Vatɗina.
32Kay nan ma gi narta van goy kay nagata
vi sum sa irina,
sumun ma bursi gaa jar sa bay ka gosayna,
hiɗi nisi sa kew-gaferaŋa calsiya,
Farawn hiɗi vokŋa valam ma gu' gu'na.
Din mi Bum-Sumuna Ma-Vatɗina.
Currently Selected:
EZEKIYEL 32: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
