EZEKIYEL 31
31
Law ma nir-niramna kay gu-gamna ma kaay gaana
1Hay buurta jewta vi til ma ɦidina vi busata doogo yam kepta, Ma-Vatɗina ka di yoboyn tan ala:
2Goora vi sana,
daŋ tam Farawn mulla vi Egipte,
hiɗi sumuna valam sa kuɗum gu' gu'na,
hay ŋolda vaŋu naŋ ŋra hiɗi gige?
3Humaŋu, Asiriya mi gu gami hay Libaŋ;
ɓam-guna valam ay ŋaa'a ŋolo,
humam goɗay ŋaa'a ŋolo,
zok-guna valam wuli kulo fiyoko,
sin-guna valam ka wuli kulo fiyoko.
4Niyn wulum kulo mi namu,
zul ma wiŋŋa wulum kulo fiyoko,
niy-lumna ka riŋ goyo hay liyn ma nam ka piy hayna,
niyn ka jaŋ goy kuɗ guwayna valam ma hay sinen kafe.
5Kuɗ na'ta kayni,
fiyokka valam suwi kulo kay gu ma hay sinen kaf,
ɓam-guna valam biya goy ŋolo,
humam ɓet goy ŋolo,
kuɗ niy ma ka riŋ kuɗum ŋolla.
6Layayn ma dukalawn kaf ka tun ziyna valam hay humamu,
muuriya ma fulla kaf ka vuɗ gurona valam gaa kuɗumu,
jaf-sumun ŋolo li ziy gaa kuɗ ŋusamu.
7Nam jifiy ŋaa'a ŋolo hiɗi ŋolda valamu,
hiɗi gilaŋatam ma ɓeti goy ŋolla,
kay so'olom kalay gaa hay niy ma ŋolla.
8Gu-gamna ma hay jardeŋŋa vi Lawna may li ŋus kalamɗi,
ɓam gu-siprena may ŋra hiɗi ɓalamɗi,
hum gu-riginna may ŋra hiɗi humamɗi.
Gu mara'a ma hay jardeŋŋa vi Lawna
ma ŋra hiɗi nam kuɗ jifiyta valamu mayɗi.
9Nan lum jifiya kuɗ ɓalam ma ɓetay goy dak-dakŋa,
nala guway ma hay Edena,
hay jardeŋŋa vi Lawna muɗ hunay talamu.
10Kuɗ na'ta kayni Bum-Sumuna Ma-Vatɗina ka di'e:
Kay mige dikaŋ li firiya kay fiyokka vaŋu,
kay sineŋ kalay ta-ta kulo jar ɗugulla,
kay suburta kalay hay dikaŋu kuɗ fiyokka vaŋu,
11kuɗ kayni nan vulaŋ goyo,
hay ɓam sum sa ŋom jaf-sumuna,
nisi ma dab ɦiyda visi goy talamu,
nan digiɗimawa goyo.
12Sum sa pulla,
sa ɦawla suwa jar jaf-sumuna kaamawa goyo,
noyomawa goyo,
humam yakawa gaa kay hiɗiyna,
hay liyn ma lokŋa kaf kaw,
hum-guna valam kusawa goyo,
cukawa goy gaa hay liy ma korkocona vi nagat kafe;
sum sa hay nagat kaf yawawa goy kuɗ ŋusamu,
nisi noyomawa goyo.
13Layayn ma dukalawn kaf cooya,
lakay hay humam ma kaays goy gaana,
muuriyan ma ful kaf in ziyna valamawa hay ɓalam ma daɓayna.
14Ki kayn nala,
gu mara ma goboy tam niyna,
ma as wul fiyok ki kayn nala may loɗi,
as wul ta-ta kulo jar ɗugulla loɗi kaw;
nala, gu-ma'asna ma ka fi niyna
ma as wul kulo fiyok ki kayn nala mayɗi,
kay nam kaf vuli goy tam mitta,
gaa hay liyn ma zulla vi nagata jar sum-wurana,
jar nisi sa jik gaa hay zul ma wiŋŋa.
15Ki kayn nala,
Bum-Sumuna Ma-Vatɗina di'e:
Hay buur ma nam jik gaa hay liyna vi sa mitina,
nan ti do'olla,
nan duk vun zul ma wiŋŋa kalam namu,
nan cak vun niy-lumna;
niy ma ŋulona nan cakam vunamu;
kuɗum namu nan muɗ Libaŋ jufunu,
gun ma hay fulda kaf so goyo kuɗum namu,
16hiɗi suwana vi ni-gaata valamu,
nan wir tuw jaf-sumuna,
hay li ma nan kalam gaa hay zulla vi sa mitina,
hiɗi nisi sa jik gaa hay zulla;
gun ma hay Edena kaf fi teŋ-irta hay liyn ma zulla vi nagata.
Gun ma ŋaa'a suwum hiɗi ma jifiya kaw hay Libaŋ,
gun kaf ma ka fi niyna.
17Nisi kayni kaw jiki gaa hiɗi namu hay liyna vi sa mitina,
kat nisi sa mit goyo hiɗi kew-gaferaŋa;
nisi sa ay si gilaŋatamu,
nisi ay lakay gaa kuɗ ŋusamu kaw jar jaf-sumuna.
18Jar gu ma hay Edena,
gajijita vaŋu hiɗi ŋolda vaŋu ŋra hiɗi gige?
Nisi ma jikaŋ gaa hay liyn ma zulla vi nagata
hiɗi gu hena ma hay Edena kaf.
Naŋ ma bur gaa'a jar sa bay ka-gosayna,
hiɗi nisi sa kew-gaferaŋa vatsi goyna.
Kayni mi va ma min li tam Farawn
hiɗi sumuna valam sa gu' gu'na.
Din mi Bum-Sumuna Ma-Vatɗina.
Currently Selected:
EZEKIYEL 31: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
