EZEKIYEL 33

DEŊGA KAY TUN-SUKKA TA VOKKA

Sa ma jobta-Lawna mi ma ŋomda

1Ma-Vatɗina ka di yoboyn tan ala: 2Goora vi sana, daŋ tam sum sa hay jafna vaŋu ala: Hay li ma nan hin kew-gaferaŋa co kay nagata, la sum sa hay nagata sli sa mara jarsiya, tunum ma ŋomda, 3la san kayni iram wi kew-gaferaŋa ka tuɗay dur nagata, la nam buw togolomna di sumun goy jewe, 4la san hum buwna vi togolomnawa, may nam min tun ŋalamɗi, la kew-gaferaŋa coyawa cumawa ni, busuwam ma nig kalam nam kay tuwamu. 5Kay nam humi buwna vi togolomna, nam min tun ŋalamɗi, nala busuwam ma tun kelem nam kay tuwamu. May sa ma tun ŋalamawana ma suɗ irita valamu. 6La sa ma ŋomda wi kew-gaferaŋ ka tuɗaya, may nam min buw togolomnɗi, la sumun may humi goy jewɗi, la kew-gaferaŋa coowa, nam ci sa'a, san kayni mit ɗawni kuɗ bay-ɗigerta valamu, may nan ma jobom busuwam tam sa ma ŋomda.

7Naŋ goora vi sana, nan min tunaŋ ki sa ma ŋomda nala kay jafna vi Israyel, naŋ ma hum yoboy ma may goy hay vunan pana, naŋ ma disit goyo hay semda vanu. 8Hay li ma nan daawa tam sa ma sulukŋa ala: Sa ma sulukŋa, awa naŋ ma mita, may la naŋ di sa ma sulukŋa kiramu kay poyta valamɗi; sa ma joona namna ma mita kuɗ bay-ɗigerta valamu, may nan ma jobom busuwam vunaŋ naŋu. 9May naŋu, la naŋ di sa ma joon kiramu kay nam cal goy hay poyta valam ta joota, may la nam cal goy hay poyta valam ta jootɗi, nam ma mit hay bay-ɗigerta, may naŋu naŋ ma suɗ ciwta vaŋu.

10May naŋu, goora vi sana, daŋ tam jafna vi Israyel ala: Nigi di ala jiw-zlata vuma'a hiɗi sulukŋa vuma'a ka kuma numa'a, sutayma toy wulin kayni kuɗum namu; numa lak iri ɗawn laktige? 11Yo! Naŋ ma disi ala: Nan ka iriya! Din mi Bum-Sumuna, Ma-Vatɗina. Minda van kayn ala sa ma joon ma mitaɗi, nan min kayn ala nam muɗ varta valamu mus iriya kaw. Hotgiyaya, hotgiyay bugolgi tam hagata vigi ta joota. Jafna vi Israyel, nigi mitis goy nala ɗawn kay mige?

12May naŋu, goora vi sana, daŋ tam sum sa hay jafna vaŋu ala: Hay buur ma sa ma ɗigera li jiw-zlatawa, ɗigerta valamu as butum goyɗi; sa ma joon kaw, hay buur ma nam hin jootawa goyo, joot ta nam la' jewta as bam goyɗi kaw. Ki kayn nala kaw, sa ma ɗigera, hay buur ma nam li jootawa, nam as mus iri kuɗ ɗigerta valam ta jewta loɗi. 13La nan di kay sa ma ɗigera ala: Awa, nam mus iriya, -- la nam tun ŋalda valam kay ɗigerta valam ta jewta, li bay-ɗigerta may ni, sa humam as gum kay lopna valam ma ɗigera kep noŋɗi, nam ma mita kuɗ bay-ɗigerta ta nam la'ta. 14La nan di kay sa ma joon ala awa naŋ ma mita -- la nam ja jaram goy hiɗi sulukŋa valamu, li sle ma gasina hiɗi ma ɗigera, 15la sa ma joona hot sle ma nam deŋemna goyo, hot vul sle ma nam kulumna goyo, la nam tap kuɗ ɗota ta vul irita, li bay-ɗigertaɗi, san kayni ma mus iriya, nam ma mitɗi. 16Sa as jak humam kay suluk ma nam lum jewnɗi; kay nam li kuɗ gasita hiɗi ɗigerta, nala nam ma mus iriya.

17Sum sa hay jafna vaŋ ka di ala: Hagata vi Bum-Sumuna tay ŋaaɗi. May ŋaaɗi kayni ti hagata visi nisiya. 18La sa ma ɗigera cal goy hay ɗigerta valamu, li bay-ɗigerta, nam ma mit kuɗ na'ta. 19La sa ma joona cal goy hay hagata valam ta joota, la nam li gasita hiɗi ɗigerta, nam ma mus iriya kuɗ kayni. 20Nigi di ala hagata vi Bum-Sumuna may ŋaaɗi! Nan ma ka kitat kigi ɗawni gigekaw kuɗ poyta valamu valamu, nigi jafna vi Israyel.

Kay slita vi Yerusalem

21Hay buurta vaslta vi til ma doogona vi busata doogo yam ma'ta hay li ma numa ay gorvo'o kayni, sa mara kep ma piray goy hay Yerusalem pa co tanu, ka di tan ala: hoyok-ziyn Yerusalem sliya. 22Donota vi Ma-Vatɗin ay kalay hayanu jew cota vi sa ma piray goyna, Ma-Vatɗin malan vunan goyo hay li ma nam co katanu hay graw culumta. Vunan ay mali goyo, nan may dugunu hay na'taɗi.

23Ki kayn nala Ma-Vatɗina ka di yoboyn tan ala:

24Goora vi sana, nisi sa li ziy jar hoyok-ziy ma ɦoy gaana hay nagata vi Israyel ka di ala: Abraham ay valam kep kaw nam sli nagat kayni, nay sa kuɗ tuway ŋolla naga na'ta vuli may naya. 25Awa ŋaa'a! Daŋ tisiya: Bum-Sumuna Ma-Vatɗina ka di ala: Nigi ti tina vigi hiɗi busuwna, nigi poŋ irgi kulo vok lawayna vigi ma waana, nigi ɦok busuwn goyo. Nala nigi ma lak hay naga na'ta su? 26Nigi tun vida vigi kay kew-gaferaŋa vigiya, nigi li va ma liwisna, gige gige jargiya bur hiɗi cata vi sugolomna. Nala nigi ma lak hay naga na'ta su? 27Naŋ ma di tisi ala, Bum-Sumuna Ma-Vatɗina ka di'e: Nan ka iriya, nisi sa ka jar ziy ma ɦoy gaana kew-gaferaŋa ma calsi goyo; nisi sa ka goy hay fulla nan ma vulsi mi muur ma siyna kay mutsi goyo; nisi sa ka hay liy ma donona hiɗi zul hiɗiyna bakmaran ma cisi goyo. 28Nan ma hin nagat goy va' kep, muɗa' goy hiweŋ', donota va' ta na' subur tuwa' hiɗi na'ta ma vat goyo, hiɗiyna vi Israyel ma hin goy hiweŋ', sa as jik kalam loɗi. 29Nisi ma wi ala nanu mi Ma-Vatɗina, hay li ma nan ma hin nagat goy va'a, muɗa' goy hiweŋ', kuɗ liwista kaf ta nisi li'e.

30Naŋu, goora vi sana, sum sa hay jafna vaŋu tok tuwsi gaa kat gulmunna, kat vun-galana vi ziyna visi kaw, nisi law tuwsi kaŋu jar-tuwsiya, gigekaw di tam ɓasulumna ala: Nigiyaya tuɗay humay yoboyna vi Ma-Vatɗina ma nam min di taya. 31Nisi tok tuwsi ɦini-ɦini' co kataŋu, nisi mol gaa vokaŋu, nisi hum yoboyna vaŋu, may nisi li kuɗumɗi, kay nisi li kayn kuɗ yoboy ma jibetna ma hay vunna, may diksi gara' kayn ti fita. 32Naŋ muɗi kirsi ki sa ma gi nul jifiya, ma delem sawali ma wi yal nulla nala. Nisi hum yoboyna vaŋu, may nisi li kuɗumɗi. 33Hay li ma slen namna kayni coowa, -- awa nam coowa kaw, -- hay na'ta nisi ma wi ala sa ma jobta li ays jarsiya.

Currently Selected:

EZEKIYEL 33: Massana

Highlight

Copy

Compare