EZEKIYEL 30
30
1Ma-Vatɗin ka di yoboyn tan ala:
2Goora vi sana, daŋ vun-jobta.
Naŋ ma di ala:
Bum-Sumuna Ma-Vatɗina ka di ala:
Yorgi tuwgi ala: Hih! Kayn mi buur mige!
3Kay buur namna ka co'o,
buura vi Ma-Vatɗina ka co'o,
buura vi jufunda, kayni mi liyna vi jaf-sumuna.
4Kew-gaferaŋa ka co hay Egipte;
lasta ma li hay Etiopiya,
hay li ma sa mitina ma cuk gaa'a hay Egipte,
hay li ma sumun ma yaw farayn goy hay ɓisiya,
hay li ma sem ziyn ma tuni gaana ma kusis goy gaa'a.
5Etiopiya, Put, Lud, sa Arabna kaf,
Kub, hiɗi gurona vi nagata vi bonota kaw,
ma cuk gaa hiɗi nisi kaf kay kew-gaferaŋa ma calsiya.
6Ki kayn nala Ma-Vatɗin di'e:
Nisi ma puk gaa'a,
gutda vi sa Egiptena,
donota visi ta nisi subur tuwsi hiɗi na'ta ma hot gaa'a;
fokay hay Migdol pa ta-ta Siyen,
nisi ma puk gaa'a hiɗi kew-gaferaŋa,
Din mi Bum-Sumuna Ma-Vatɗina.
7Nisi ma hin goy hiweŋ' jar naga ma hini goy hiweŋŋa,
hoyok-ziyna ma hin goy jar hoyok-ziy ma ɓulakay goyna.
8Nala nisi ma wi ala nanu mi Ma-Vatɗina,
hay li ma nan ma tun kut kuɗ Egipte,
hay li ma naga ma kuɗa'na kaf ma ɦoys goyo.
9Hay buur namna ɗawni,
sa sunda ma cukay goy ir van pa kulo kay lumayna,
Etiopiya hiɗi musta va' ta hay sle'ta,
nisi ma wira' tuwa'a,
lasta ma li jarsiya hay buura vi Egipte ɗawni.
Buur namna ɗaw tuɗayni!
10Ki kayn nala Bum-Sumuna Ma-Vatɗina di'e:
Nan ma vat vok ŋolla vi sum sa Egipten goyo,
hiɗi ɓam Nebukadnesar mulla vi Babilon.
11Namu hiɗi sumuna valam kuɗumu,
sum sa ɦawlat haysi suw jaf-sumun kaf,
nam ma marsiya kay to nagat gaa'a;
nisi ma cal sum sa Egipten hiɗi kew-gaferaŋa,
ma hob nagat hiɗi sum sa mitina.
12Niy-lumna Nil nan ma som goyo,
nan ma gus nagat goy hay ɓam sum sa joona;
nagata hiɗi sle ma haya'na kaf nan ma hinim goy hiweŋ'
hiɗi ɓam sum sa pulla.
Nanu, Ma-Vatɗina, nan daawa.
13Ki kayn nala Bum-Sumuna Ma-Vatɗina di'e:
Nan ma vat lawayn ma waan goyo,
lawayn ma waana ma hay Nof nan ma yawam goyo;
sa yerimana vi nagat Egipte ma li loɗi,
nan ma gi narta hay nagata vi Egipte.
14Nan ma hin Patros goy hiweŋ',
nan ma tun kut kuɗ Sowan,
nan ma hob vun kitata kat No.#30:14 No Mi hoyok-ziyn kepe hay Egipte ta kulota.
15Nan ma gi ɦiyda van goy kay Sin,
hoyok-ziy ma donona vi Egipte.
Sum sa ŋol sa hay No nan ma vatsi goyo.
16Nan ma tun kut kuɗ Egipte;
Sin ma wira,
baŋan ma co ir gulmunna vi No,
sa gawta ma sli Nof hay falay calak'.
17Sum sa joriyona vi On hiɗi Pi-Beset
kew-gaferaŋa ma yaksi gaa'a,
sum sa hay hoyok-ziy namna ma kal goy gorvo'o.
18Hay Takpanes falayta ma muɗ jufunu,
hay li ma nan ma kus juk ma kel sum sa Egiptena,
hay li ma donota visi ta nisi subur tuwsi hiɗi na'ta ma vat goyo;
ɗugulla ma duk gaa kay Takpanes,
hay li ma guro-boyna visiya ma kal goy gorvo'o.
19Nan ma hob vun kitata kat Egipte,
nisi ma wi ala nanu mi Ma-Vatɗina.
20Hay buurta siɗiyata vi til ma jewna vi busata doogo yam kepta, Ma-Vatɗina ka di yoboyn tan ala:
21Goora vi sana,
Farawn mulla vi Egipte nan kusum gilaŋatamawa,
sa ma li gurgunu vun milla valam mayɗi,
sa ma jun vun milla valamu kay gilaŋatam ma lak kulo ɗeŋe,
kay nam ma peɗ kew-gaferaŋ hay ɓalamu mayɗi.
22Kuɗ na'ta kayni Bum-Sumuna Ma-Vatɗina ka di'e:
Fuma tuwmaawa hiɗi Farawn mulla vi Egipte,
nan ma kusum gilaŋatam goyo,
gilaŋatam ta ka ŋaata hiɗi ta kusi goyta kafe,
nan ma gi kew-gaferaŋa gaa hay ɓalamu.
23Nan ma mer sum sa Egiptena goy jar jaf-sumuna,
nan ma mersi goy hay nagat tara'a tara'a.
24Mulla ma Babilon nan ma muɗum gilaŋatam dono'o,
nan ma vul kew-gaferaŋa van hay ɓalamu;
nan ma kus gilaŋat Farawn goyo,
nam ma tiy vokomu ki san tiy vok mitta nala.
25Nan ma muɗ gilaŋ mul ma Babilonna dono'o,
gilaŋ Farawn ma cuk gaa kuɗumu.
Nala nisi ma wi ala nanu mi Ma-Vatɗina,
hay li ma nan ma vul kew-gaferaŋa
hay ɓam mulla vi Babilon,
hay li ma nam ma meɗ kew-gaferaŋa goyo kat Egipte.
26Nan ma mer sa Egiptena goy jar jaf-sumuna,
nan ma mersi goy hay nagat tara'a tara'a,
nala nisi ma wi ala nanu mi Ma-Vatɗina.
Currently Selected:
EZEKIYEL 30: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
