EZEKIYEL 29
29
Vun-jobta kat sa Egiptena
1Hay buur ma doogo yam ma'na vi til ma doogona vi busata doogota, Ma-Vatɗina ka di yoboyn tan ala:
2Goora vi sana,
muɗaŋ iraŋ kat Farawn mulla vi Egipte,
daŋ vun-jobta kalamu,
kay sum sa Egipten kaf kaw.
3Naŋ ma di ala:
Bum-Sumuna Ma-Vatɗina ka di ala:
Fay tuwayawa, naŋ Farawn mulla vi Egipte,
naŋ hurum geŋgeleŋŋa,
naŋ ma buri way niy-lumna vaŋu,
naŋ ma di ala niy-lumna Nil nam vanu,
kot tuwan mi nanu.
4Nan min cuk jaɓn gaŋaŋu,
nan min sliraɓ kuluf ma goloŋŋa kulo taŋu,
nan ma niraŋay goy way niy-lumna pa,
hiɗi kuluf ma goloŋ hay niyna vaŋ kaf,
ma sliraɓay kulo tam ɓulokoŋu.
5Nan ma gaŋ goy hay fulda,
naŋu hiɗi kuluf ma goloŋ hay niyna vaŋ kafe.
Naŋ ma nig goy hay sinena,
sa as slaŋ kuloɗi, as tokaŋ kuloɗi lay;
nan ma vulaŋ goy a ti'e mi muur ma gaa kay nagata
hiɗi layayn ma dukalawna.
6Sum sa hay Egipte kaf ma wi ala nanu mi Ma-Vatɗina,
kay gutda ta nisi gut sa Israyella ŋray ca
ki sa deŋ tam cerewna nala.
7Hay li ma nisi slaŋ hay ɓisiya,
naŋ kus goyo, naŋ ɦawsi pelsiyawa goyo;
hay li ma nisi deŋawa taŋu,
naŋ kusawa goyo,
naŋ buratsi fursiyawa.
8Kuɗ na'ta kayni,
Bum-Sumuna Ma-Vatɗina ka di ala:
Fay tuwayawa! Nan min mar kew-gaferaŋa katgiya,
sumuna vigiya hiɗi farayn kaw nan min cisi goyo.
9Nagata Egipte ma hin goy ɦawa hiweŋ',
na' ma ɓulak goyo,
nala sumun ma wi ala nanu mi Ma-Vatɗina.
Kay nam di ala niy-lumna Nil nam vanu,
ala kot niy-lumna Nil mi nanu.
10Kuɗ na'ta kayni,
fay tuwayawa hiɗi naŋu!
Hiɗi niy-lumna vaŋu kaw,
nan ma ɓulak nagat Egipte goyo,
liyn ma ɓulakay goyna ma hini goy hiweŋŋa,
fokay hay Migdol pa ta-ta hay Siyen hay jaara vi nagat Etiopiya.
11Sem sa as jik haya' loɗi,
sem muur as jik haya' loɗi,
na' ma hin goy ir busat dok-fiɗi bay sa li ziy haya'a.
12Nan ma hin Egipte goy ɦawa hiweŋ'
ki naga ma hini goy ɦawa hiweŋŋa nala,
hoyok-ziyna va' ma ɦo gaa'a,
ki naga hena ma ɦoy gaan nala ir busat dok-fiɗi.
Nan ma mer sum sa Egipten goy jar jaf-sumuna,
nan ma mersi goy hay nagat tara'a tara'a.
13Ki kayn nala Bum-Sumuna Ma-Vatɗin di'e:
Hay li ma busat dok-fiɗi vatawana,
nan ma hot tap yam sum sa Egiptena,
goy jar sum sa nisi meray goy jarsin pa.
14Sa gorvona vi Egipte nan ma hotsiyaya,
nan ma hotsiyay hay nagata vi Patros,#29:14 Patros ti Egipte ta kulota.
nagata ta nisi mays goy haya' pata,
nisi ma tun mulda ta ya' hotay gaata;
15nisi ma li ɗawni si sa yisi gaa hotay suw mulda kafe,
nisi ma muɗ ŋol kay jaf-sum sara loɗi,
nan ma kiɗasi goyo,
kay nisi ma kol kay jaf sara loɗi.
16Mulda na'ta muɗ ɗawni,
ti mulda ta sa Israyella ma tun ŋalda visi ka' loɗi,
sum sa Israyella ma kal hay sulukŋa loɗi,
hay li ma nisi job gutda vi sa Egiptena loɗi,
ki kayn nala nisi ma wi ala nanu mi Bum-Sumuna Ma-Vatɗina.
17Hay buurta jewta vi til ma jewna, hay busata dok-ma' yam siɗiyata, Ma-Vatɗin ka di yoboyn tan ala:
18Goora vi sana,
Nebukadnesar mulla vi Babilon tun lop ma dono kay sojena valamu,
kay dur Tirus,
sojena valam kaf yisi kulot goyo,
pelsi tun toŋoroŋo kaw,
may nam fi fayta hay Tirus noŋɗi,
namɗi lay, sojena valamɗi lay,
hay lop ma nam lum kata'na.
19Kay kayni Bum-Sumuna Ma-Vatɗina ka di ala:
Fay tuwayawa!
Nan vul nagata Egipte mi Nebukadnesar,
mulla vi Babilon;
nam ma yaw farayna,
nam ma vurumum kaf, nam ma ti slen ɓuraŋi,
kayni ma li ɗawni mi wurakŋa vi sojena valamu,
20kay wurakŋa vi lop ma nam lum kat Tirusna,
nan min vulum Egipte,
kay sumuna valam li lop kayni ir man nanu.
Din mi Bum-Sumuna Ma-Vatɗina.
21Hay buur namna ɗawni,
nan ma wul donota vi jafna vi Israyel,
nan ma mal vunan goy jarsiya;
nala nisi ma wi ala nanu mi Ma-Vatɗina.
Currently Selected:
EZEKIYEL 29: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
