EZEKIYEL 18

Gigekaw ma ziy joota valam kay tuwamu tuwamu

1Ma-Vatɗina ka di yoboyn tan ala: 2Law ma nir-naramna ma hay nagata vi Israyel ala: Sumayn mut gulda-gulda ma ŋirsliyna, may guron siysi zlaya. Nigi di law ma nir-naramna nala kay mige? 3Nigi ma fi liyn kay di law ma nir-naramna hay Israyel loɗi! Din mi nan Bum-Sumuna Ma-Vatɗina ma irina. 4Humgiya, ciwt kaf na' vanu; ciwta vi goora hiɗi ciwta vi bumna, hena hiɗi hena ma' pet ciwta visi na' vanu. Ciwta ta li sulukŋa, mit ɗawn ti na'a.

5Sa ma ɗigera, ma li kuɗ gasita hiɗi ɗigerta, 6ma ti kulo kay hiɗiynɗi, ma poŋ iram kulo kuɗ lawayn ma waana hay ziyna vi Israyelɗi, ma ɗut cata vi sugolomna goyɗi, ma co tam catɗi hay li ma busuwn ka ta'a, 7ma li yam saɗi, va ma nam deŋem kay sana nam hotom goyo, nam kulɗi, nam vul tin mi sa ma mayt ka lumu, nam cuk sligar tam sa ma goy nala'a, 8nam vul va goy hiɗi niyam kuɗumɗi, nam ja jaram goy hiɗi bay-ɗigerta, ka kitata ta jar sumuna hiɗi hagata ta gasita. 9Sa ma tap kuɗ ɗota-gatta vanu, li kuɗ dita vanu hay gasita, san ki kayn nala nam ɗigere. Nam ma mus iri gasiya, Din mi Bum-Sumuna Ma-Vatɗina.

10La nam vuɗ goor ma coŋ-coloŋo, goor ma ɦok busuw goyo, nam li joot kep jar slen lakŋi tam ɓasulumna, -- 11la nam kay tuwamu bay li joot lakŋi kaw -- la goora valam ti kulo kay hiɗiyna, ɗut cata vi sugolomna goyo, li yam sa ma vun lasta hiɗi sa ma hawna, nam kula, 12sle ma nam deŋemna nam may hotom goyɗi, poŋ iram kulo kuɗ laway ma waana, li law ma liwisna kaw, 13la nam vul slen goy hiɗi niyamu, gar faytana kaw, goor kayni ma mus iri su? Nam as mus iriɗi, kay sle ma liwisna cani kafe nam lumu, nam ma mit goyo gasi, busuwam ma nig ɗawn kalam kay tuwamu.

14La nam vuɗ goor ma wi suluk ma nam lum kafna, nam ka wi'e may, la nam may li ki kayn nalaɗi, 15nam may ti kulo kay hiɗiynɗi, poŋ iram kulo kuɗ lawayn ma waana hay ziyna vi Israyelɗi, la nam ɗut cata vi ɓasulumna goyɗi, 16la nam li yam saɗi, la nam may deŋ slen kay sumunɗi, kulɗi kaw, vul tin mi sa ma mayt cumna, cuk sligar tam sa ma goy nalana, 17nam li ɦawlat tam sa ma vun lastaɗi, vul va goy hiɗi niyamɗi, nam li kuɗ dita vanu, tap kuɗ ɗota-gatta vanu: San ki kayn nala ma mit kuɗ joota vi bulumɗi. Gasiya nam ma mus iriya. 18Kay curoɗ sumun kayni mi bulumu, kay nam kul ɓasulumna, nam li va ma may ŋaaɗi kat sumuna valamu, mit kuɗ joota valam ɗawn mi namu.

19Nigi di'e: Goora may ziy nekka vi joota ta bulum la'taɗi kay mige? Kay goora nam li kuɗ gasita hiɗi ɗigerta, kay ɗota-gatta vanu nam ŋoma'a, li kuɗa' kaf kaw, gasiya nam ma mus iriya. 20Ciwta ta li suluku, ma mit ɗawn ti na'a. Goora as ziy nekka vi joota vi bulumɗi, bumna as ziy nekka vi goora valamɗi kaw. Ɗigerta ma tun kay sa ma ɗigera, joota ma tun kay sa ma joona may.

21La sa ma joona ja jaram goy hiɗi suluk ma nam lumna kafe, la nam li kuɗ ɗota-gatta hiɗi ɗigerta kafe, nam ma mus iri gasiya, nam ma mitɗi. 22Jiw-zlata ta nam la'ta kaf ma li ŋomi kalamɗi; nam ma mus iriya kuɗ ɗigerta ta nam la'ta. 23Nan Bum-sumuna Ma-Vatɗina, nan mina' jew kayn ti mitta vi sana ma joona su? Nan min kayn ala nam ma cal goy hay hagata valamu mus iriya ɗisu? Din mi Bum-Sumuna Ma-Vatɗina. 24La sa ma ɗigera cal goy kay ɗigerta, li bay-ɗigerta, la nam tap kuɗ liwista ta sa joon ka la' kafta, nam as mus iri su? Sle ma ɗigera ma nam lumna kaf sa as ŋomomɗi. Kuɗ bay-vida ta nam kal tuwam hay sulukŋ hiɗi na'ta, kuɗ kayni nam ma mita.

25Nigi di ala: Hagata vi Bum-sumuna may hay liya'ɗi. Humgi yo, nigi jafna vi Israyel, may hay liya'ɗi kayn ti hagata vi Bum-Sumuna su? Hay liya'ɗi kayn may ti hagata vigiɗi su? 26La sa ma ɗigera cal hagat goyo li bay-ɗigerta, la nam mitawa kuɗ kayni, nam mit kayn kuɗ bay-ɗigerta ta nam la'ta. 27La sa ma joona ja jaram goy hiɗi joota ta nam la'ta, kay muɗ li gasita hiɗi ɗigerta, ciwta valam ma mus iriya. 28La nam mal iram goyo, ja jaram goyo hiɗi jiw-zlata ta nam la'ta kafe, nam ma mus iri gasiya, nam ma mitɗi.

29Jafna vi Israyel di'e: Hagata vi Bum-Sumuna tay ŋaaɗi. Tay ŋaaɗi kayn ti hagata van su? Jafna vi Israyel! Tay ŋaaɗi kayn ti hagata vigi hayɗi su? 30Kuɗ na'ta kayni nan ma ka kitat kigiya kuɗ hagata vigiya, nigi jafna vi Israyel, din mi Bum-Sumuna Ma-Vatɗina: hotgiyaya, hingi jiw-zlata vigi goyo, kay joota vigiya ma lin mi hiɗiy ma dabgi segiɗi. 31Gigi ci-matta ta muɗgi goy sum sa ci-matna goy gine hiɗi nigiya, ligi dik ma wuli haygiya hiɗi ŋusta ta wuliya. Nigi mit goy ɗawn kay mige? Jafna vi Israyel. 32Kay nan min ala sa mit goyoɗi, hamgiya, nala nigi ma lak iriya. Din mi Bum-Sumuna Ma-Vatɗina.

Currently Selected:

EZEKIYEL 18: Massana

Highlight

Copy

Compare