EZEKIYEL 19

Tiyta kay sa ŋulona vi Israyel

1May naŋu, gaŋ nul ma tiyna kay sa ŋulona vi Israyel. 2Naŋ ma di'e: Sugiya ti mige? Na' ti zlota. Na' ay buri gaa jar zlona; na' wul gurona va' kayni jar zlo ma joriyona.

3Na' wul goor-zlona va' ma kepna, nam muɗ mi zlo ma joriyo'o; nam hat kay ci muur kay tuwamu, nam ci sumuna kaw. 4Jaf-sumun hum labara valamu, nisi vum hay jawta visiya, nisi cukum zigewn cinamu, kalam hay Egipte. 5Hay li ma zlo tan-cata wi ala na' cub kayn goy ɦawa'a, a cubta-sle'ta va' ka vat goy ɦawa'a kaw, kuɗ guro-zlona va'a, na' vi mara'a, muɗum goy zlo ma joriyona. 6Nam poy jar zlona, muɗ goy zlo ma joriyona, nam hat kay ci muur kay tuwamu, nam ci sumuna kaw. 7Nam li ɦawlata tam boy sa duhulla, hoyok-ziyna visiya nam hinim goy ful ɦawa, nagata hiɗi sle ma haya'na kaf hini goy mi ful ɦawa, kuɗ gum ma nam ka cumna. 8Jaf-sumuna hiɗi naga ma ŋulona ma ŋuyi galam kafna tok tuwsi kalamu, nisi gan jawta visi gaa vokomu, nisi vum hay jawta visiya. 9Nisi musum kalafi, cukum zigewn cinamu, nisi kalam kat mul ma Babilonna; nisi kalam hay ziy ma donona, kay sa humum delem kulo kay hiɗiyta vi Israyel loɗi.

Gulda-guldana hiɗi ɓalamu

10Suŋu na' ki so'ol gu gulda-guldan nala, na' slaŋ naŋ nala, piy goboy kat niyna, na' ka vuɗ ŋolo, ɓam-guna va' ka ŋolo, kuɗ niy ma ka ŋolla. 11Ɓam-guna va' dono ŋolo, kay kot zugulayna vi mulda hiɗi namu; fiyokka va' kulo ŋolo suw fulaful ma goɗay kiɗib-kiɗibna; sumun ka sara' ŋolo kuɗ fiyokka va'a hiɗi ɓa' ma ɓeti goy dak-dakŋa. 12May na' patis goyo hiɗi dono'o, giys gaa kay nagata; simeɗ ma gal kuɗuwna so vuɗna va' goyo, ɓam-guna va' ma donona haway goyo, soy goyo kaw, kut ŋalamawa may. 13Wulin kayni na' piy goy hay fulda, hay nagata ta soy goyo, ta niy may haya'ɗi. 14Kuta kalay goy hay ɓam-guna va' pa, na' ŋal hum-guna hiɗi vuɗna valamu; ɓam-gu ma donona ma kot zugulda ta donona hiɗi namu may loɗi. Kayni mi nul ma tiyna, ma gumu kay tiyta.

Currently Selected:

EZEKIYEL 19: Massana

Highlight

Copy

Compare