EZEKIYEL 17

Law ma nir-naramna kay gu-gamna hiɗi bakŋa

1Ma-Vatɗina ka di yoboyn tan ala: 2Goora vi sana, daŋ vanbona, daŋ law ma zuturuna kat jafna vi Israyel. 3Naŋ ma disi ala: Bum-Sumuna Ma-Vatɗina di'e: bak ma ŋolla hiɗi gilaŋatam fiyoko, zlamiyam fiyoko kaw, zlamiyam goɗay kuɗ batam ŋolo, co ta-ta hay Libaŋ, nam ka sin gu-gamna goyo. 4Nam ka sin gu-gamna ma kulo fiyok ŋolla, kalam hay nagat ta li filiwna, burum hay hoyok-ziy ma li filiw haya. 5Nam sli gu ma hay nagatna ma hini goyna, pum hay liyn ma day guna. Nam pum goboy kat liyn ma niyn ka riŋ ŋolo, pum ki gikŋa nala. 6Gu namna ma hini goyna wula, nam muɗ mi gulda-gulda ma daɓay goyna, may ir giɗeŋe; ɓalam ka meɗay goy kir ɓukana, sutiyam ka gaa kuɗumu; nam muɗi mi ɓam gu gulda-guldana, ɓalam ka ɓet goy vokom lo lo.

7Bak hena ka lo, nam ŋolo, gilaŋatam fiyok ŋolo, zlamiyam diɓilik ŋolo. Gulda-guldan meɗ sutiyam goy talamu, meɗ ɓalam goy talamu kaw. Kay bakŋa ma vulum niyna. 8Nam ay piy hay nagata ŋaata, goboy hiɗi niy ma ŋolla, kay ɓalam ma daɓ goy ŋolo, vuɗ vuɗna ŋolo, muɗ mi gulda-gulda ma ŋaana kaw. 9Naŋ ma di'e: Bum-Sumuna Ma-Vatɗina di ala: Gulda-gulda namna ma wul kaw su? Bak ma jewna ma patam so'olom goyɗi su? Nam ma yawam vuɗam goyo kay humam ma so goyo ɗisu? A patam so'olom goy ɗawni, hiɗi donot ŋolɗi, hiɗi sumun ŋolɗi kaw. 10Nam ka piy gaa, nam ma muɗ ŋol su? La simeɗ ma gal kuɗuwn tun ɓalam talamu, nam ma so goyo hay liyn ma nam day hayamna pa.

11Ma-Vatɗina ka di yoboyn tan ala: 12Daŋ tam jaf-sum sa ŋel gatta ala: Van kayni nigi may wum cawamɗi su? Naŋ ma di'e: Mulla vi Babilon kalay hay Yerusalem, nam vi mulla hiɗi sa ŋulona, tuɗsi hiɗi namu hay Babilon. 13Nam vi sa ma hini goyna hay jafna vi mulda, nam jun bonot hiɗi namu, halafam kaw, nam kalay hiɗi sa ŋulona vi nagata, 14kay mulda ma li tuni hay kiliŋga bay fok-kulota, kay bonot ma li ŋomi jarsiya. 15May nam fok kulo kalamu, nam cuk sa sunda valamu hay Egipte, kay Egipte ma vulum kulumayna hiɗi sumun ŋolo. Sa ma li slen ki kayn nala donom ma ti su? Nam ma hulot goy su? Nam kus bonotawa, nam as hulot su? 16Bum-Sumuna Ma-Vatɗina di'e: Nan ka iriya, mul namna ma mit ɗawni hay nagata vi mulla ma vulum mulda, kay nam noy halaf ma mulla halafamna goyo, nam ja bonota ta jarsita goyo. Kuɗ kayni nam mit ɗawni goboy kat mul namna hay Babilon 17Farawn hiɗi sojena valam sa ŋol dak-dakŋa hiɗi sum sa kuɗum dak-dakŋa kaw ma gutum vun duuraɗi, hay li ma sa Babilonna ma gi zlaɓna, in damna kat ziyna kaw kay vat sumun goy ŋolo. 18Nam noy va ma nam yum kalamna goyawa, hay li ma nam ja bonota; nam jaɓ ɓalam hiɗi namu, nam li slen kayni kaf; nala nam as hulot goyɗi. 19Kuɗ na'ta Bum-Sumuna Ma-Vatɗina di ala: Nan ka iriya, kay nam noyom goy kayni mi va ma diy jarma'na, nam ja' goy kayni ti bono ta jarma'ta. Nan ma gi kayni gaa kalamu. 20Nan ma meɗ jawta van goy kalamu, nan ma vum hay jawta vanu, nan ma tuɗum hay Babilon, ɗawni nan ma ka kitata jarma'ta kuɗ bay-gasita ta nam la' katanta. 21Sum sa mun jaŋi hiɗi sumuna valam kaf kew-gaferaŋa ma calsi goyo, nisi sa hin goyna ma meris goy jar simeɗna. Nala nigi ma wi ala nanu Ma-Vatɗina, nan daawa.

22Ki kayn nala Bum-Sumuna Ma-Vatɗina di'e: Nan ma ka sin gu-gamna ma goɗayna, ma kulo sin tiwe tiwena, nan ma pum gaa; nan ma kam ɓalam ma goɗayna mara kep, nan kay tuwanu ma pum kulo kay hiɗiyta ta kulo gine ŋolo. 23Nan ma pum kay hiɗiyta ta kulo fiyok ŋol suwa hay nagata vi Israyel kafe, ɓalam ma daɓ goyo, nam ma vuɗ vuɗna ŋolo kaw, nam ma muɗ mi gu-gamna ma ŋaana. Layayna kuɗ jafam kaf ma tun suk gaa kuɗumu; layayn ma tun suk gaa kuɗ ɗuŋusamu. 24Nala gu ma hay sinen kaf ma wi ala nanu Ma-Vatɗina, gu ma sli yalam kulona nan hotom yalam gaa'a, gu ma hot yalam gaana nan slum yalam kulo'o, nan as so gu-ŋulomna goyo, gu ma soyna nan as goɗomu kaw. Nanu Ma-Vatɗina nan daawa, nan ma li va'a kaw.

Currently Selected:

EZEKIYEL 17: Massana

Highlight

Copy

Compare