EZEKIYEL 16

Yerusalem ŋray hiɗi cata viyuwta

1Ma-Vatɗina ka di yoboyn tan ala: 2Goora vi sana, ɗekaŋ Yerusalem kay sulukŋa va'a. 3Naŋ ma di ta'a:

Bum-Sumuna Ma-Vatɗina ka di tam Yerusalem ala: Hiɗi so'olag ma may pana, hiɗi vu'da vag pa nak may goy hay nagat Kanaan; bugu mi sa ma Amoriyana, sugu ti ta Hititta. 4Hay vu'da vagu, sa may kaag hifagɗi, sa may muzag goy hay niyna kay poragɗi, sa may kurutag tuwag hiɗi mandaɗi kaw, sa may ɗutag hay sligarɗi kaw, 5sa kep kaw may cuk iram kagu kay lag va mara kep kaw kuɗ sle namna cani noŋɗi, kuɗ slugota valam kagu; may nak giys goy hay sinena, hay buur ma nak vuɗna pa, kay jibetag may kir sa loɗi.

6Nan jik goboy hiɗi naku, nan fag kayni, nak ka hiwir gaa hay busuwn waŋ, nan di tag ala: Kag jar busuwag na waŋ', nan di tag ala: Kag jar busuwag na waŋ'. 7Nan biyag ŋolo sem birim doogo, ki guro-guro ma sinen nala, nak zlibawa. Nak wulawa, nak muɗawa jifiy ŋolo, miirag dayawa, ɗuŋusag wulawa. May nak ay goy nala'a, goy nala kaɗaŋ kaɗaŋ'. 8Nan jik goboy hiɗi naku, nan ɗuwag kayni, liyna vag asiya, liyna vi darta. Nan gi vun sligar-tuwna van goy kagu, bar nalata vagu, nan yi va kanu, nan jun bonot hiɗi naku, nak muɗ ir vanu may. -- Dita vi Bum-Sumuna Ma-Vatɗina.

9Nan musag goy hay niyna, busuw ma takŋa nan ɦasam goyo, nan setag tuwag hiɗi mula. 10Nan cukag sligar ma vunam ciliyn tagu, cukag tuguru ma hiɗi bak ma direŋŋa, kusuɓag tuwag hiɗi sligar ma koti hiɗi baraw haɓna, kusuɓag tuwag hiɗi baraw-direŋŋa. 11Nan ganag tuwagu: Nan gi way ɓagu, gi jaɓ kelegu, 12gi tuju cinagu, cukag sle humagu, tun bogorayta vi mulda kagu kaw. 13Ki kayn nala nak ganay hiɗi ora, hiɗi doorota kaw, nak ganay hiɗi sligar-barawna, hiɗi baraw ma direŋŋa, hiɗi sligar ma vunam ciliyna. Nak tum mi futuw ma digeɗna, yumda hiɗi mula. Nak muɗ jifiy vokag suwa suwa, nagay kay mulda. 14Seg ma tiyna mer goy jar jaf-sumuna, kuɗ jifiyta vagu, kay na' asay ŋaa'a ŋolo, kuɗ ganta ta nan ganag hiɗi na'ta. Din mi Bum-Sumuna Ma-Vatɗina.

15May nak tap kuɗ jifiyta vagu, nak muɗ tuwag gawlaŋi, kuɗ semda vag ma tiyna nak muɗ tuwag gawlaŋ vok sum sa ka jik hay hagat kafe, nak vul tuwag goy hay ɓisiya. 16Nak yaw kuɗ sligara vagu, nak kot liyn ma ɗiŋiriŋŋa hiɗi sligar ma tuwam ɗoyna, nak muɗ tuwag viyuwu hay liy namna, va ma ki kayn nala bay li tuwa, as li noŋɗi kaw. 17Nak yaw ganna ma nan kotom katagu hiɗi doorota hiɗi ora kaw, nak kot lawayn ma jufayn hiɗi namu kay muɗ tuwag liwis hiɗi namu. 18Nak yaw sligara vag ma vunam ciliynawa, nak kusuɓumawa talamu, mula hiɗi urdina ma nan vulakgina nak lumawa talamu. 19Fun ma nan vulakgina, futuw ma digeɗna hiɗi yumda ma nan vulakgi kay tum kafna, nak vulum goy ɗifini ki his ma ŋaana nala. Kayni mi va ma co'o, -- Din mi Bum-Sumuna Ma-Vatɗina.

20Nak yaw guro-jufayna hiɗi guro-boyna vagu, sa nak vuɗantina, nak lisiyawa goy ɗifin misiya kay nisi ma mutsiya. Viyuwta vag na'ta kayni may asayɗi su? 21Nak ŋat guro-jufayna vanu, nak vulum goy tisiya hay li ma nak ŋalsi hay kuta hay semda visiya. 22Jar liwista vagu hiɗi viyuwta vag kaf kayni, humag may gag kay buur ma nak ay waya tuwanɗi, hay li ma nak ay goy nala'a, nala kaɗaŋ kaɗaŋ, hay li ma nak ay rigas gaa jar busuwagu.

23Bugol lopna vag ma joon kaf, -- joota, joot kagu! -- Din mi Bum-Sumuna Ma-Vatɗina. 24Nak in ziy ma li viyuwt hayamnawa, nak in liyn ma ɗiŋiriŋŋawa hay liyn kafe; 25Nak in liyn ma ɗiŋiriŋŋawa vun hagat kafe, nak li liwistawa hiɗi jifiyta vagu, nak vul tuwagawa mi sum sa jik hay hagat kaf, nak jor liwista vagawa voko. 26Nak muɗ tuwagawa liwisi kuɗ sa Egiptena, sum sa ziysi tagu, sum sa gaŋeraŋi, nak jor liwista vagawa kay ɓulakan dikanu. 27Kuɗ kayni nan meɗ ɓanawa goy kagu, nan kiɗa galla vagawa goyo, nan vulag goy mi sa gaw kagŋa ki va ma tina nala, si guro-boyna vi sa Filistina, sa muɗi zulo'o kay poyta vag ta liwista. 28Nak muɗ tuwag liwisi vok sa Asiriyana, kay mige nak may hobayɗi; nak muɗ tuwag liwis kuɗsiya, hiɗi kayn kaf kaw nak may hobayɗi. 29Nak jor liwista vagu hiɗi nagat Kanaan, hiɗi kayn kaf kaw nak may hobayɗi.

30Dikag muɗi maŋay ŋolo natige, nan Bum-Sumuna Ma-Vatɗina di nala. Hay lita vagu, nak muɗi ki cata ŋolda vi viyuwta nala. 31Hay li ma nak in ziyna vag ma li viyuwt hayna goy vun hagat kafe, hay li ma nak in liy ma ɗiŋiriŋŋa vagu hay liyn kafe, nak may muɗ ki cata viyuwta ta job wurakŋa naɗi kaw; 32nak muɗi ti cata bulota, ta vi jufa'ɗi, may visi si sum sa pulla. 33Boy sa gawlaŋ kaf sumun wuraksi gurju'u, may naku, nak li vulda mi sa cilena vagu, nak yawsiyawa hiɗi sle ma nak vulsitna, kay nemsi ay katagu, hay galla kaf hiɗi viyuwta vagu. 34Hay viyuwta vagu, nak lum mi va ma boy segen lumɗina, sa may garagɗi, sa may wurakag gurjuɗi kaw, may gar sumun ti naku, wuraksi gurjun ti naku may.

35Awa ŋaa'a, nak ta viyuwta, humag yoboyna vi Ma-Vatɗina. 36Bum-Sumuna Ma-Vatɗina ka di ki kayn nala: Kay nak ko farayna vag goyo, nak fok tuwag goy nala'a vok sa cilena vagu, hiɗi lawayn ma liwisna vag kafe, ki busuwna vi gurona vagu sa nak vuɗsiya nala. 37Awa ŋaa'a! Fay tuwayawa, sa cilena vagu sa nak li darta hiɗi nisina nan ma toksi kafe, nisi sa nak minsi jewn kafe, sa nak kaasi gaw jewn kafe, nan ma toksiyay goy hay liyn kaf katagu, nan ma fokag goy nala'a kirsiya, nisi ma wi nalata vag kafe. 38Nan ma ka kitat kagu ki nisi ka kitata kay boy sa viyuwna hiɗi sa ɦok busuwn goyn nala ɗifinna vi ɦiyda hiɗi hunayta ma lum hiɗi busuwna nan ma lum hiɗi naku. 39Nan ma vulag goy hay ɓisiya; nisi ma ɦo ziyna vag gaa'a, ma ɦo liyn ma ɗiŋiriŋŋa vag gaa kaw; nisi ma fok sligar ma takŋa goyo, ma yaw ganna vag goyo, ma hinag goy nala'a, goy nala kaɗaŋ kaɗaŋ'. 40Nisi ma tok tuwsi kagu, nisi ma gag hiɗi goorhoyona, ma jikag hiɗi kew-gaferaŋa; 41nisi ma ŋal ziyna vag hiɗi kuta, ma hob vun ɦiyda visi katagu, goy haraŋ puɗak kir boyn ŋolo. Nan ma vat viyuwta vag goyo, hin vok ɗawn kaw nak ma wurak gurju loɗi. 42Nan ma hob vun ɦiyda van katagu, nala hunayta van ma vi tuwa' goy katagu, nan ma cuk kacaf', nala nan ma li ɦiy loɗi. 43Kay mige humag may gag kay buura vi wayata vagɗi, kay nak muɗan ɦiya hay slen kayni kaf, nala nan min tun poyta vag kagu, nala nak ma li ci-matta hiɗi liwista vag loɗi, din mi Bum-Sumuna Ma-Vatɗina.

44Ki kayn nala nisi kaf sa di law ma nir-niramna ma di kag ala: Goot slum mi zlana vi su'a. 45Naku ti goota vi sugu, ta jufa'a hiɗi gurona va' muɗ kira' bisi; naku ki bosiyog sa boyn nala kaw, sa jufaysiya hiɗi gurona visi muɗ kirsi bisi. Sugiya ti goot ta Hititta, bugiya mi sa ma Amoriyana kaw. 46ɓasuk ta ŋolda, ta ka musi hay galak ma gulla kayn ti Samariya hiɗi guro-boyna va'a, ɓasuk ta goota ta ka musi hay galak ma jufna, kayni ti Sodoma hiɗi guro-boyna va'a. 47Nak may poy hay hagata visi ɦawaɗi, nak may lum mi liwis ma nisi lumna ɦawaɗi, may nak muɗ tuwag liwis suwsi nisiya hay poyta vag kafe. 48Nan ka iriya, din mi Bum-Sumuna Ma-Vatɗina, nagat Sodoma hiɗi guro-boyna va'a bay li va ma nak hiɗi gurona vag sa boyna ka lumna tuwa. 49Kayni ti joota vi ɓasukga Sodoma: Na' ka hiɗi suburta, tin ka ka' hobaya, musi kiliŋ hay sle'ta, na'a hiɗi guro-boyna va'a, may na' min gut kuɗ sa maŋayna hiɗi sa hawnɗi. 50Nisi muɗi joo ŋolo, nisi li slen ma liwisna vok iranu. Hay li ma nan wi kayni, nan basi irsi goyo. 51Samariya kaw gal sulukŋa vag bay li ka'a tuwa; joota vag liy ŋolo suw fa'na, liwista vagu muɗ bosiyokŋawa ɗiger suwagu. 52Naku ta ka kitat kay bosiyokŋa, wulin kayni liyn asawa kagu kay ziy zulota vag yo, kuɗ sulukŋa vagu ma nak muɗ tuwag liwis hiɗi nam suwsi nisina, sulukŋa ma muɗsi ɗiger suwag naku. Muɗag zulo'o, ziyag zulota vag yo, kay nak muɗ bosiyokŋawa ɗigere.

53Nan hot sa gorvona visi aya, sa gorvona vi Sodoma hiɗi guro-boyna visiya, sa gorvona vi Samariya hiɗi guro-boyna visiya, sa gorvona vagu sa ka jar sa fisina, 54kay nak ma muɗ zulo'o, kay nak ma ziy zulota vagu, kay nak ma muɗ zulo kay slen ma nak lumna kafe, kay naku ti teŋ-irta visiya. 55Bosiyok sa boyna, Sodoma hiɗi guro-boyna va'a ma hotay hay liyna visi ma jewna; Samariya hiɗi guro-boyna va'a ma hotay hay liyna visi ma jewna, naku hiɗi guro-boyna vagu, nigi ma hotay hay liyna vigi ma jewna kaw. 56Hay subur-tuwta vagu, vunag may di law kat ɓasukga Sodomaɗi su? 57Jew a joota vagu dira' pat goyo, hay li ma guro-boyna vi Aram hiɗi sa ŋuyi galgi kafna ka panagu hay galak kafe. 58Nak ka ziy nekka vi yawta hiɗi liwista vagu. Din mi Ma-Vatɗina.

59Kay Bum-Sumuna Ma-Vatɗina di ala: Nan ma li tagu ki nak li nala kaw, naku ta noy va ma yi kamna goyo hay li ma nak ja bonot goyo. 60May nanu, human ma gan kay bonota van hiɗi naku hay li ma nak ay waya tuwa, nan ma jun bonota ta vatɗit hiɗi naku. 61Humag ma gag kay poyta vagu, nak ma muɗ zulo'o, hay li ma nak ma vi bosiyokŋa, sa ŋulona hiɗi sa gurayna, nan ma vulsi magu ki guro-boyna vag nala, may kuɗ bonota ta jaraytɗi. 62Nan ma jun bonota hiɗi naku, nak ma wi ala nanu mi Ma-Vatɗina, 63kay humag ma gag kay sle ma kalayna, kay nak ma muɗ zulo'o, kay nak ma poŋ vunag kulo noŋɗi kuɗ zulota vagu, hay li ma nan ma li poora kagu kay sle ma nak lum kafna -- Din mi Bum-Sumuna Ma-Vatɗina.

Currently Selected:

EZEKIYEL 16: Massana

Highlight

Copy

Compare