EZEKIYEL 12
12
Nisi vi Sedekiyas gorvo'o, sumun mer goyo may
1Ma-Vatɗina di yoboyn tan ala: 2Goora vi sana, naŋ li ziy damni jar jaf-sum sa ŋel gatta, sa irsi ka kay ɗuwa may as ɗuwɗi, sa humsi ka kay huma may humɗi, kay nisi kayni si jaf-sum sa ŋel gatta. 3Naŋu goora vi sana, kotaŋ sle ma tuɗ gorvo hiɗi namna, goy kirsi falay calak', fokaŋis hay liy ma naŋ hayamna pa, kalaŋ gorvo'o, goy kirsi haraŋ puɗak: Li ŋalɗin nisi ma wi ala nisi si jaf-sum sa ŋel-gatta. 4Yawaŋ slen ma tuɗ gorvo hiɗi namna ki san tuɗ gorvo nala, goy kirsi falay calak', kalaŋ goy hay vulatita ki sum sa tuɗ gorvona ka cuk goy nala. 5Goy kirsi haraŋ kaf, naŋ ma co baŋan hay gulmunna, sle ma tuɗ gorvo hiɗi namna naŋ ma kalam goy hay baŋa namna. 6Goy kirsi kaf, naŋ ma yaw sle namna kulo kaŋu, naŋ ma kal goy hay jufunda, naŋ ma kusuɓ iraŋu, naŋ ma ɗuw nagatɗi, kay nan min ala naŋ ma li ɗekka tam gurona vi Israyel.
7Nan li va ma nam di tanu: Nan yaw slena van goy falay calak' ki sa ma tuɗ gorvon li nala. Vulatita nan co baŋan hay gulmunna hiɗi ɓanu, nan kalam goy hay jufunda, nan tunum kulo pelanu goy kirsi haraŋ pete.
8Hay graw culumta, Bum-Sumuna Ma-Vatɗin ka di yoboyn tan ala: 9Goora vi sana, jafna vi Israyel, sum nisina sa ŋel-gatta, nisi di ala: Naŋ lum kayn mi mige ɗisu? 10Naŋ ma di tisi ala: Bum-Sumuna Ma-Vatɗina ka di ala: Dit kayni diy kat mulla ma ka hay Yerusalem, tam jafna vi Israyel sa ka hayna kafe. 11Disi ala: Nanu mi ɗekka kigiya,
va ma nan li'e,
kayni mi va ma min li tisiya:
Nisi ma tuɗ goy hay naga tara gorvo'o.
12Mulla ma ka jarsina ma tun jakŋa valam kulo kalamu,
hay li ma liyn jufunu,
nam ma kala;
nisi ma co baŋan hay gulmunna kay kalam goyo;
nam ma kusuɓ iramu,
kay iram ma ɗuw nagatɗi.
13Nan ma gan jawta van goy vokomu,
jawta van ma vumu,
nan ma kalam hay Babilon,
hay nagata vi sa Kaldeena;
may iram ma wi naga na'taɗi,
nam ma mita.
14Nisi sa ŋuyi talamna kaf,
sa ŋomomna hiɗi sojena valam kaf,
nan ma mersi goy jar simeɗn kafe,
nan ma calsi kuɗsi hiɗi kew-gaferaŋa.
15Nala nisi ma wi ala nanu mi Ma-Vatɗina,
hay li ma nan ma mersi goyo jar jaf-sumun kaf,
hay li ma nan ma mersi goy hay nagat tara'a tara'a.
16May nan ma hin sum sara goy kuɗsiya,
sum nisina ma hulot goy vun kew-gaferaŋa,
mayta hiɗi mokŋa,
kay nisi ma vi labara kay joota ta co kisit kaf
tam sum sa nisi ma co jarsina,
nala nisi ma wi ala nanu mi Ma-Vatɗina.
17Ma-Vatɗina ka di yoboyn tan ala:
18Goora vi sana,
naŋ ma ti funa vaŋ hiɗi tuwaŋ vaŋ bat-bat',
naŋ ma ci niyna vaŋ hiɗi tuwaŋ wiraŋu,
hiɗi sukaŋ yaway keleŋu,
19naŋ ma di tam sum sa hay nagatna ala:
Bum-Sumuna Ma-Vatɗina ka di tam sum sa hay Yerusalem
hiɗi sum sa hay Israyel kaf ala:
Nisi ma ti funa visi hiɗi suksi yaway kelsiya,
nisi ma ci niyna visi hay hawta,
kay nagata visi ma hin goy hawi,
sle ma haya'na kaf ma kiɗa goyo,
kuɗ ɦawlata vi sum sa li ziy haya'na kaf.
20hoyok-ziy ma sumun hayam ŋolla ma toys gaa'a,
nagat ma hin goyo,
nala nigi ma wi ala nanu mi Ma-Vatɗina.
21Ma-Vatɗina ka di yoboyn tan ala:
22Goora vi sana,
nigi ka di law ma nir-niramna hay nagata vi Israyel ala:
Buura ka ɦur vokomu,
va may vul tuwam kirayɗi lay.
Nigi di nala kay mige?
23Awa ŋaa'a! Naŋ ma di tisi ala:
Bum-Sumuna Ma-Vatɗina di ala:
Nan min vat law ma nir-naramna namna;
ma yum selem kulo hay Israyel loɗi.
Naŋ ma di tisi ala:
Buura ka co'o,
ɗekka kaf vuna' ma hoba.
24Kay va as ɗek tuwam kir sa ɦawa loɗi,
sa as di law ma ɗutna loɗi jar jafna vi sa Israyella.
25Kay nanu mi Ma-Vatɗina,
va ma nan min dumu,
nan ma dumu.
Dita ta vuna' min hob goy ɗawni ya' ma viɗi;
Awa, jaf sa ŋel-gatta,
jar buura vigiya, nan ma di yoboyna,
nan ma hobom vunamu,
Din mi Bum-Sumuna Ma-Vatɗina.
26Ma-Vatɗina di yoboyn tan ala:
27Goora vi sana,
humaŋ slen ma gurona vi Israyel di'e:
Nisi di ala:
slen ma nam wumna lakŋi buura valam ka gine'e,
nam di vun-jobta kayni kay liyn ma gine'e.
28Nala naŋ ma di tisiya
Bum-Sumuna Ma-Vatɗina ka di ala:
Yoboyn ma nan dumna kaf vunam ma hob goy ɗawni,
yalam as viɗi.
Din mi Bum-Sumuna Ma-Vatɗina.
Currently Selected:
EZEKIYEL 12: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
