EZEKIYEL 13
13
Law kat sa jobta sa bay-gasina
1Ma-Vatɗina ka di yoboyn tan ala:
2Goora vi sana,
daŋ vun-jobta kat sa jobta vi Israyel sa di law ma voksina.
Naŋ ma di tam nisi sa di vun-jobta kuɗ vaara vi diksiya:
Humgi yoboyna vi Ma-Vatɗina.
3Kay na'ta Bum-Sumuna Ma-Vatɗina ka di ala:
joot kay sa jobta sa ɦay-ɦayna,
sa tap kuɗ vaara visiya bay irsi wi va'a.
4Nigi sa Israyella,
sa jobta vigiya ŋray ca hiɗi cekemna
ma jar ziy ma ɦoy gaana nala.
5Nigi may jik kulo jar gulmunna
kay gi zlaɓ tam ziyna vi Israyelɗi,
nigi min lak dono'o vun duura hay buura vi Ma-Vatɗinɗi.
6Sle ma vul tuwam kirsin kayn waa'a,
law ma nisi dum voksina kaw mi sini;
nisi di ala: «Dita vi Ma-Vatɗina»,
may dolay kayni Ma-Vatɗin may cuksi ayɗi,
nisi hin sumun cub ala va ma nisi dumna ma li'e.
7Slen ma vul tuwam kirgin kayni waa'a ɗisu?
Slen ma nigi dum vokgina kayni mi sini ɗisu?
Nigi di ala «dita vi Ma-Vatɗina»,
may dolay kayni nan may di noŋɗi.
8Awa ŋaa'a,
humgi dita vi Bum-Sumuna Ma-Vatɗina,
kay dita vigiya ti dita waata,
sle ma vul tuwam kirgina mi sin ɦawa,
awa ŋaa'a!
Nan muɗisawa katgi wulin yo,
dita vi Bum-Sumuna Ma-Vatɗina.
9Nan ma ɗek donota van goy kat sa jobta-Lawna
sa slen may vul tuwam kirsi gasiɗi,
sa slen ma voksina ma nisi dumna ti sinda;
nisi ma lak hay tapta hiɗi sumuna vanɗi,
sesi ma ɗoys jar jafna vi Israyelɗi,
nisi ma co ta-ta hay nagata vi Israyelɗi,
nala nigi ma wi ala nanu mi Bum-Sumuna Ma-Vatɗina.
10Ki kayni nala, nisi ka viy sumuna van goyo,
nisi di ala «toyta» hay li ma toyta tayɗi.
Sumuna vanu kot gulmunna,
may nisi gum tuwam hiɗi naga-laskaɗayna.#13:10 Naga-laskaɗayna mi naga ma may dirginɗina.
11Daŋ tam nisi sa gum tuwam hiɗi naga-laskaɗayna ala:
Nam ma ɦo gaa'a,
niy ma si donona ma co'o,
mogoyna ma ɗeŋŋa ma yak gaa'a,
simeɗna ma biwa.
12Wulini gulmunna valam ma ɦo gaa'a,
nisi ma di tigi ala:
Naga ma nigi gum talamna ka arige?
13Awa ŋaa'a,
Bum-Sumuna Ma-Vatɗina ka di ala:
Hay ɦiyda vanu,
nan min hin simeɗn biwa,
hay ɦiyda vanu niy ma ŋolla ma si'e;
nan ma hin mogoy ma ɗeŋŋa yak gaa'a kay vat slen goy kafe.
14Gulmunna ma nigi gum tuwam hiɗi naga-laskaɗayna
nan ma tom gaa'a,
nan ma dabam gaa vi nagat goŋ',
bakam ma viy gaana ma hin goy puɗak-ɗak',
nam ma ɦo gaa'a,
nigi ma vatis goy jaramu may,
nala nigi ma wi ala nanu mi Ma-Vatɗina.
15Nan ma dab yam ɦiyda van goy goŋ' kat gulmunna,
kat nisi sa gum tuwam hiɗi naga-laskaɗayna kaw;
nala nan ma di tigiya:
Gulmun may loɗi,
sum sa gum tuwamna say loɗi kaw.
16Sa jobta-Lawna vi Israyel
sa di slen ma voksina kat Yerusalem,
sa slen vul tuwam kirsi kayn kay sle'ta,
may sle'ta tayɗina,
Din mi Bum-Sumuna Ma-Vatɗina.
Law kat boy sa jobta sa bay-gasina
17Naŋu, goora vi sana,
muɗaŋ iraŋ kat guro-boyna vi sumuna vaŋu,
sa di slen ma voksina kuɗ vaara vi diksiya,
daŋ vun-jobta katsiya.
18Naŋ ma di'e:
Bum-Sumuna Ma-Vatɗina di ala:
Joot kay nisi sa ɗut sligara kay ɓamta-mokayta kafe,#13:18 sa ɗut sligara kay ɓamta-mokayta Ɗek liskinna ma nisi lum tam sa co kuɗsina.
sa kot sligar ma bar kamna kay sum sa fiyokŋa
hiɗi sa galiyan kafe,
kay digiɗ ciwta vi sumuna.
Nigi ma digiɗ ciwta vi sumuna van ki kayn nala kaw su?
Nigi ma ŋom ciwta vigi nigi iri may su?
19Nigi ka vat suburta van goy vok sumuna vanu
hiɗi orgena ma way ɓigi ne' ɦawana,
hiɗi dir fu ma ne'na kaw,
hay li ma nigi ci ciwta ta nagay kay mittaɗi,
hay li ma nigi hin iriya ciwta ta nagay kay mus iriɗi,
hay li ma nigi ka sinda tam sumuna vanu sa ka hum sinda vigiya.
20Kay na'ta Bum-Sumuna Ma-Vatɗina ka di ala:
Fay tuwayawa! Nan muɗi ɦiya kat sligar ɗutina vigiya,
ma nigi digiɗ ciwta vi sumun hiɗi namu ki layayn nalana.
Nan ma jetem goy hay gilaŋgiya,
ciwta vi sumuna ta nigi digiɗa' ki layn nalata
nan ma hulota' goy hay ɓigiya.
21Sligar ma kusuɓi tigina nan ma jetem goyo kaw,
nan ma but sumuna van goy hay ɓigiya;
nisi ma li ti jawta hay ɓigi loɗi,
nala nigi ma wi ala nanu mi Ma-Vatɗina.
22Kay sum sa ɗigera
nigi ka muɗsi varta visi maŋaya hiɗi sinda,
may nan kay tuwan kaw may muɗsi yorɗi,
kay sum sa joona nigi ka vulsi donota,
kay telsi a hotay bugolsi tam hagata visi ta joota,
kay hinsi lak iriɗi kaw,
23sle ma vul tuwam kirgi bay-gasita nigi ma wum loɗi,
nigi ma law slen ma vokgina loɗi;
nan ma but sumuna van goy hay ɓigiya.
Nala nigi ma wi ala nanu mi Ma-Vatɗina.
Currently Selected:
EZEKIYEL 13: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
